Vawleicung Company Minthang IBM Ah Software Engineer Thawngzapum Lian

GCN lak mi

International Business Machine (IBM) hi vawlei ka kip ah branch an ngei i hika rian tuan ding hi sianghngakchia tam pi an hmuitinh a si. Vawleicung University tha tha Harvard, Yale, MIT sianghngakchia tampi zong nih IBM,Google, Microsoft, Facebook ah rian tuan khawh hi an saduhthah ngan bik a si ve. IBM cu vawleicung 170 ram ah branch an ngei i computer he aa pehtlai mi poah(software, hardware, service) a tawlreltu an si,computer cung DVD khumhnak 'Hard Disk Drive' le phaisa na chuah tawnnak ATM zong kha an mah ser mi a si.

IBM logo

Hitluk minthang a si mi company ah kan Laipa Thawngzapum Lian cu software engineer in rian a tuan kho ve. Hi bantuk company minthang ah zeitluk in dah rian ngah a har lai ti cu tuak tan khawh ngai a si ko. Ramtha ah cun restaurant ah waiter te tuan duh hmanh ah tlinh ding a tam tuk khi mu.Hi IMB ah rian ngah khawh cu thiamnak nih a tlinh tak tak a hau mi a si.  A tu Thawngzapum Lian a tuan mi cu 'Cloud System Software' tangah a si i 'code' tampi an tial hlei ah computer holh 'programming language' zong tampi hman a si tiah Globalchin News sin ah a chim. 


'Code' le 'Programming Language' cu a tu 21st IT Century ah a lar bik mi le hman bik mi an si hna. Shopping mall na kal i kutka hmai na phak ah a mah tein kutka ai awng mi, mawnghtu um loin vanlawng 'drone' hna zong an zuan ter khawh khi mah 'programming language' an hman ruangah a si. Robot hna minung bantuk in an kal ter,an holh ter i rian hna an tuan ter khawh mi khi 'code' le 'programming language' hmang in tuah mi an si hna. Kan unau Thawngzapum Lian a tuan mi zong hi hna lak ah pakhat a si ve. 

A nih hi US um Pu Peng Lian le Pi Kyi Kyi Mya an fa upa bik a si. Indiana um Purdue School of Engineering in 'Bachelor of Science in Electrical Engineering' degree a ngah mi a si. A facebook ka thei lo,a email cu thawngv@gmail.com a si lai.