Thawngpang Bultan(April 9)

US Nih Iran 'Warning' A Pek: Yemen ram hriamtlai Houthi tapung pawl Iran nih a bawmh hna ruangah US nih Iran 'warning' a pek, Middle East ah Iran nih a thihphaih mi ram poah cu US nih a zoh sawh sawh lai lo tiah John Kerry nih a chim. 

Yemen ram um hriamtlai phu tapung pawl hi an thawng ngai, an President Mansour Hadi zong tuan deuh ah khan an rak thawl cang. President Hadi cu Saudi Arabia ah ralzam dirhmun in ai dor. 

Mr. Hadi a dirpi tu Saudi Arabia nih hi hriamtlai Houthi pawl hi vanlawng in a thuat ve hna, US zong nih hihi a dirpi ve. Iran bel nih hriamtlai phu Houthi pawl a dirpi ve hna. Yemen ram ah hin Houthi phu lawng si loin adang hriamtlai phu al-Qaeda zong an um ve, an ni phomh cio ko hna.  

Myanmar Ah Ramdang Bank An Lut Kho Cang Lai: Ne Win chan in ramdang he pehtlai nak a rak rawk tuk hnu in Myanmar ram chungah ramdang Bank an rak um ti lo, nain tuthla April 23 thawk in ramdang Bank 3 nih ramchung ah rian tuan hram an thawk cang lai tiah Irrawaddy nih a thanh.

Hi bank pathum lakah pa 2(BTMU le SMBC) hi Japan bank an si i a dang pakhat (Overseas-Chinese Banking Corporation Ltd) hi Singapore bank a si. Mah bank hna nih hin ramdang company Myanmar ram chung investment tuah a duhmi poah phaisa cawih khawh a si te lai. Myanmar ram chung investment tuah a duhmi company caah a tha khun ti nak a si.

Thailand Nih US Kal Tak In Russia&China Sin Ai Mer Deuh Cang: Nikum May thla ah Thailand ram buainak a tam tuk caah ral kap nih uknak an rak lak,hi uknak an lak hi Thailand hawi a si mi US le nitlak lei ram nih an rak doh ngai hnu in US le Thailand kar pehtlai nak a rak tha tuk ti lo. Tukar hi Thailand le US ral ngan bik Russia& China pehtlainak a hung tha deuh than ve. 

Nizaan kha Russia ram Prime Minister nih Thailand a rak tlawng,hihi kum 25 chungah a voikhatnak a si. Thailand nih Russia chuak raltuknak vanlawng le hriam nam pawl cawk a timh. 2016 chung Russia le Thailand kar chawlednak zong $10 billion tiang phakter an timh. 

Thailand le China pehtlainak zong a hung tha deuh ngai ve. Nizaan kha Thai ralkap lutlai le Defence Minister zong China tlawn an timh ve. Business Insider, Reuters, Bangkok Post


Shan Cozah Nih China Ramri Lam Pakhat An Phih: Kan hnu zarh ah China le nawl ngei tu nih Shan ram chung an rak lut i Chinese flag hna an phun nak pawng ramri lam cu Shan state cozah nih an phih chung tiah 7Day Daily nih a thanh. 

Hika lam in China ram chuak thil a lut i kawlram thil chuak zong China ram a lut tawn nak lam a si. Kan hnu April 3 ah khan China lei nawl ngei tu nih hriamnam aa tlai mi border guard tampi he an ra i hika hmun ah China flag an phun caah hika khuami 200 leng nih an duh lo nak an rak langhter i an rak thawl than hna. 

Hakha Ah TB Zawtnak A Ngeimi A Lak In Thlop An Si: 3MDG timi mizaw zokhenhtu le Myanmar Health Assistant Association bawmhnak in Hakha mipi TB zawtnak an check hna i zawtnak a ngei mi cu a lak in an thlop hna tiah The Hakha Post nih a thanh.

Hiti an zoh hna hi Hakha lawng si loin Hniarlawn le Zokhua zongah kal an ni timh rih ti a si. Falam zong ah minung 400 leng an zoh hna i 15 nih TB zawtnak an ngei i a lak tein an thlop cang hna.