Chinram Cozah An Zia A Chuak Than Rua

Falam Mino Pawlkom(FMP) hruainak in Falam ah nuhrin covo kong cawnpiaknak training tuah an timh i cozah sin nawlhalnak an tuah nain Chinram cozah nih a hnon piak hna, zeiruangah dah an hnon piak hna timi zong langhter a si lo tiah Chinland Guardian nih a tial.

Hi training hi tuni April 20 ah tuah ding an rak timh i nawlhalnak zong an rak tuah diam cang nain nizaan lawngah cozah nih 'a ngah lo' timi cakuat an pek than hna. Zeiruangah dah an hnon piak hna timi zong cozah zung ah an hal hna i nawlngei tu pakhat nih 'Pu Hung Ngai lawng nih a theih lai' tiin a leh hna ti a si.

FMP hi 2010 ah an rak dirh mi a si i nuhrin covo kong le a dang training tibantuk zong cozah nawl hal lem loin a luancia caan ah an rak tuah pah leng mang cang. Tutan training ca zongah tukum thimnak ai cuh hnga ding Cherry Zahau le Salai Ngepi zong an sawm hna ti a si.