Mawtaw Accident Ruangah CBC Youth Secretary le Taigen Pastor Nunnak A Liam

Nikum lei Falam pawng ai let mi

CBC(Falam) mawtaw cu Falam le Kalaymyo lam Zawngkong khua pawng ah tuni chun 11:30am ah aa let i CBC Youth Secretary Pastor James Khai Tual le Taingen khua pastor Cin Thian Nang a hmun ah an thi an thi tiah The Hakha Post sin in theih a si.

"A hmun ah cun thi colh hna kaw, an i leh ning hi aho hmanh nih fiang in theih a si rih lo. Saya James hi a fapa le pahnih an i tel i an nih tu cu an i khawng ve nain thin phang tuk cu an si lo. An ruak hi palek nih Kalay ah an kirpi hna i Kalaymyo ah siibawite nih an zoh hnu ah an khua cio ah kalpi ding an si". 

"Saya James Khai Tual hi SRBA (Sizin Region Baptist Association) i Khuasak khuami a si. Kanmah kan duh ning ahcun an ruak hi CBC ah phanhpi i program ngeih hnu ah an khua ah kalpi kan duh nain Kalay lei an phanh cang caah an fale tu hi siibawi te nih an zoh lai i kal pi awk an that ah cun kalpi ding an si. Cu caah thawng a theimi vialte nih chungkhar le zung riantuantu hna caah thlacamnak in rak kan bawm cio u," tiah CBC Vice Chairman Rev. D. Vai Lian Zul (FBC) nih Hakha Post ah a chim.

Saya James le Saya Cin Thian Nang hi CBC Youth Department program in Limkhai ah Conference an kal i an kir lei ah hiti accident an ton a si. An motor hi Pajero a si. Saya James hi fa paruk a ngeimi a si i, Saya Cin Thian Nang hi Chin Christian Institute of Theology ah M.Div a kai pah in an khua ah pastor a tuanmi a si. Saya James a fapale pahnih hi Falam sii-inn ah an phanhpi hna.