Kokang Ral A Zual Chin,Kawl Ralkap Hma A Hmu Mi&A Thi Mi 300 Phan Dawh An Si

Kokang ralkap

A luancia Feb 9 in ai thawk mi kawl ralkap le Pho Kya Shin hruaimi Kokang hriamtlai phu kar i kahnak cu nizaan thawk in bia tak tein a zual than i kap hnih in a thi mi le aa hliam mi an tam ngai,kawl ralkap lei a thi mi le hliam hma a hmu mi dih lak hi 300 hrawng an phan kho men tiah Kokang hriamtlai pakhat nih VOA ah a chim. 

Tutan i kahnak hi an ni kah mi vial te lakah a zual bik a si, kawl ralkap phu nga in an thuat hna. Phu khat ah minung 300 leng an si i an za tein cun 1800 leng nih a ka kip in an phomh hna ti a si. Ralkap thawngzamh ningah cun, Kokang hriamtlai phu an saa-khan 20 leng zong an chuh khawh hna i Kokang hriamtlai phu caah a biapi ngai mi tlang tam ngai zong an lak khawh. Kawl ralbawi 10 lawng an thi an ti(Kokang lei an chim mi he cun ai dang ngai).  

Tuni VOA he an ni chonh 11am tiangah an ni phomh cuahmah rih, kawl ralkap lei nih cun ke ralkap lawng si loin hriamnam ngan pipi in an thuat hna. Kokang hriamtlai phu lei hi minung 20 hrawng hliam hma an pu ve i pathum an thi ve ti a si.