17 April 2015

South Africa Buainak A Karh Chin, Ramdang Mi An Dawr An Khangh Piak Thluahmah Hna


Ramdangmi nih South Africa ramchung rian vialte an kan chuh dih an ti caah South Africa mipi cheukhat nih ramdang mi thawl dih an timh hna, ram dang dawr vialte khangh piak le hrawh piak an timh hna. Nizaan tiang kha cu Durban khua lawngah buainak a rak um nain tuni cu khuadang Johannesburg tiang a karh cang tiah CNN le BBC nih an thanh.


Hiti buainak a tuah tu pawl hi hreitlung le nam a ngan phun an ni ken cio ti a si. Tuhi minung 6 an thi cang i ramdang mi a thawng thawng in refugee camp an panh. Palik zong nih minung 112 leng an tlaih cang hna ti a si.



South Africa hi Nelson Mandela hruainak in 1994 ah mirang uknak in an rak luat hnu ah Africa continent ram hna lakah a thangcho bik pakhat ah ai cang. A pawngkam ram mi tampi nih an panh ve. 

Hibantuk ramdang mi huatnak hi 2008 zongah a rak zual ngai i fak ngai in an rak buai caah minung 62 leng an rak thi cang.   

No comments:

Post a Comment