US FBI Director James Comey Cung Poland An Lung A Rawk,Lihbia A Chim An Ti

Hitler nih a thahmi Jews miphun

Dictator Hitler hruaimi Nazi Germany nih Jews miphun 5 million deng an rak thah hna nak kong he pehtlai in US FBI Director nih Washington Post thawngzamhca ah capar pakhat a tial,a tial mi ah Poland zong nih Hitler a rak bawm ve tiin a sual lam a chuahter caah Poland cozah nih fak ngai in an doh, ngaihthiam kan hal seh an ti tiah BBC le The Guardian nih an thanh.


'Mitha zong nih mithattu an rak bawmh hna....An mah ruahnak ah cun, mithattu le mi thah a bawmtu Germany, Poland, Hungary, thil sual pakhat hmanh an rak tuah lo bantuk in an um. Kan tuah awk hrim hrim a si an rak ti' tiin Poland ram Jews miphun thahnak ah Poland zong nih a rak bawm ve hna ti phun in James Comey nih cun a tial.

Mah ti Mr. Comey nih ca a tial hnu ah Poland President le Prime Minister hna nih fak ngai in an doh colh, Poland mipi zong nih an duh lo nak an langhter ve. 'Mah capar nih Jews miphun a rak bawmhtu Poland mipi a sersat a si' tiah Poland President Komorowski nih TV ah a chim.

Poland, Germany le Hungary ram um Jews miphun 5 million hrawng cu World War Two ah Hitler nih a rak thah dih hna. Hihi Holocaust tiin theih a si i kum fatin philh lo nak an tuah taw,nizaan zong kha an tuah rih. 

Hiti Hitler nih Jews miphun 5 million deng a rak thah khawh hna hi Poland, Hungary le Germany mipi zong nih an rak bawmh pah ve hna tiin soiselnak a rak um pah ve. Jews miphun hna an rak bawmh hnga ding tluk in an bawmh hna lo an ti cio.