Dr. Aye Maung Hruainak In Rankhine National Party Nih Direct In China Cozah An Chonh

Dr. Aye Maung

Rakhine ram thancho nak ah China nih a si khawh chung in bawmh ve ding ah Dr. Aye Maung hruaimi Rakhine National Pary(RNP) upa hna cu April 12 in 15 tiang China cozah ser tu Communist Party of China(CPC) he chonh biak nak le ceihti nak an ngei tiah Dr. Aye Maung nih VOA ah a chim. 

RNP hruaitu nih a bik in an hal mi cu China cozah le Rakhine mipi direct in pehtlainak ser i Rakhine ram thancho nak caah China nih a si khawh chung in bawmh ding, China cozah nih a tlaih mi INGO bawmhtu hna Rakhine ram ah luhter ding hna an si. Hiti ceihmai nak an ngei mi cu a cunglei nawl ngei tu China cozah sin ah an thanh than i a cung lei nih bia khiah a si te lai. 


China nih Rakhine ram chuak ziinan(crude oil) le leitang chuak gas(natural gas) pawl cu kawl cozah he hnatlaknak a ser i pipe in a dawp hna. Hihi Rakhine mipi caah thahnem nak a chuah pi mi a um lo, kawl cozah sin lawngah phaisa a lut dih mi a si. Hiruangah Rakhine mipi nih duh lo nak zong an langhter leng mang. 

Tutan i chonhbiaknak hi China lei nawlngei tu nih an sawm mi hna a si. Hiti China cozah nih Myanmar cozah theihter lem loin Rakhine party a chonh hi Myanmar cozah a thin hung sual hnga maw ti phan a um pah ve. State le Region kip nih mah duh ning in ramdang he pehtlai nak ser kho cio u sih law a tha tuk hnga!