Chinram khualipi Hakha ah kawl miphun an tam deuh cang caah kum dang nak in tukum titoih puai cu minung zong an tam deuh i a hlunghlai deuh ngai tiah The Hakha Post nih a thanh.
Tukum kawl titoih puai ah Buddhist a si mi cozah lutlai Pu Hung Ngai le ramri lei vuanci Zaw Min Oo zongg an ni tel lo,khual an tlawn lio a si nain Hakha um company rian tuan tu kawl miphun an tam ngai cang caah puai an hman mi zong a hlunglai ngai ko ti a si.
'Cu hlan cu a tu bantuk titoih puai ah cozah lei nih Hakha um sangkip khuabawi kha khuami chung in a laam dingmi nungak tlangval le ngakchia chuah pi ding in tuanvo pek kan si tawn. Cun, thawhbur le uniform zong cawk ter kan si tawn. Tukum cu meeting ah 'minung na chuah pi kho hna lai maw' tiah an ka hal i 'ka chuah pi kho hna lai lo' ka ti hna. Cun ka hawi le sangdang cio zong nih 'kan chuahpi kho hna lai lo' an ti cio i, tukum cu zei hmanh ah kan i tel ti lo. An mah tuah in an tuah ko' tiah Dawrthar sang khuabawi Pu Hrang Kep nih The Hakha Post ah a chim.
Tukum titoih puai cu Chin ramkulh cozah zung hmai ah tuah a si i khuami hnahnawh lo ding in palik le lam kilvengtu(PK) nih tha tein an kilven hna ti a si.
No comments:
Post a Comment