Panglong Agreement Maw Abiapi Deuh FACE Report Dah?

Panglong Agreement

Union of Burma tuan bia kan chim ah Panglong Conference or Panglong Agreement lawng hi a biapi tuk ah kan chim tawn. Union of Buram a rak chuahnak hi 'Panglong Conference' hnatlaknak in a chuak tiin kan theih cio. Hihi a dik ve ko nain a dik thlu ve lo. Panglong Agreement nih Union of Burma ramchung miphun a huap dih lo timi hi kan thei tuk lem rua lo. 

Panglong Agreement A Chambaunak: Panglong Agreement hi Chin,Kachin le Shan lawng nih min rak thut mi a si. Karen aiawhtu cu conference an rak kai ko nain observer dirhmun lawng in an rak i tel. A dang tlangcungmi Wa, Naga le thlanglei Chinram Arakan Hill Tracts um Kanpalet peng vialte zong hi Panglong Conference ah an rak i tel kho lo. 

Wa, Naga, Karen le Arakan Hill Tracts um Chinmi hna hi British nih a dang Kachin, Chin le Shan bantuk in adang tein a rak uk mi hna an si ve. Hi lio Chin Hills District(Hakha, Falam, Tedim) ah a rak um mi milu population hi 186,000 an rak si, Arakan Hill Tracts um Chinmi hi 34,000 an si ve(FACE report, 1947.P-4). 


Hitluk milu a tam ve ko mi Karen, Wa, Naga le Arakan Hill Tracts Chinmi hnatlaknak um loin Union of Burma kha 'Panglong Conference' Feb 12, 1947 ah rak ser a si.Mah Panglong Agreement hi Karen, Wa, Naga le thlanglei Chinmi hna nih min an rak thut ve lo caah an mah pawl hi 'Union of Burma' chungah an rak i tel cang ti khawh a har ngai,an rak i tel rih lai lo ti cu a fiang. 

FACE Report Vs Panglong Agreement: A cunglei Panglang Agreement chambau nak tete ruangah British cozah nih tlangcungmi an duhnak thuk deuh in lak ding ah Frontier Areas Committee of Enquiries(FACE) timi hlathlaitu committee an rak dirh i March- April, 1947 thlahnih chung tlangcungmi aiawhtu vialte an rak ton hna,an duhnak an rak hal hna. 

Kan mah Chinmi he zong April 19 ah voikhat, April 21 ah voikhat tiin an rak i tong ve. Panglong Conference ah cun Hakha, Falam le Tedim ramuk bawi pathum lawng an rak i tel nain FACE enquiry ah cun hruaitu an tling dih ngawt: Hakha,Falam,Tedim, Kanpetlet,Siyin, Lakher,Lunpu Mro(Mara?) le Khumi hruaitu dih lak 35 leng an rak i tel kho. 

Mah FACE report hi British King le cozah sin ah report pek than mi a si. Hi report hram bunh in 1947 Constitution(Aung San draft) zong rak tial a si. Panglong conference ah an rak chim sual mi a um hmanh ah hi FACE enquiry ah remh than khawhnak second chance an rak ngei cio hna. 

1947 Constitution nih Chinram 'autonomy or federal' a kan pek lo mi le Statehood a kan pek lomi zong kan mah duh thim a si. Kan pu le nih Burma Proper chung ah 'district' pakhat in um kan duh, 'federal' chung um kan duh lo tiah FACE committee sin ah an rak chim. Kan mah Chinmi nih Panglong Agreement kan rak buar hmasa.  Feb 12, Panglong conference ah 'Federal or full-autonomy' cu Kachin le Shan he kan rak i thim ti nain 19th April(thla hnih hnu) Maymyo ah kan pu le nih 'Burma Proper chung district pakhat in luh kan duh' an rak ti than. 

Panglong Conference cu Union of Burma a rak chuahnak hram a si nain Union of Burma ramchung um miphun a rak huap dih lo. Nain, FACE enquiry nih cun miphun fa te tiang a rak huap dih hna. Panglong Conference ah an rak i palh mi zong FACE enquiry ah chim/remh than khawhnak second chance an rak ngei. Cucaah, 'Union of Burma' a hringtu cu Panglong Agreement a si nain thlaici a tuhtu le ti a toih tu cu FACE report hi a si ko rua! 


FACE enquiry report kong a rel duh mi nih hika rel khawh a si lai. Zeiruangah Dah 1947 Constitution nih Statehood A Kan Pek Lo?(Part-2)