Hakha Sianghleirun Kai Sianghngakchia Nih Hakha College Hmun An Zoh

Hakha College Saknak ding hmun

Hakha University Students Fellowship siangngakchia hna nih Hakha Artlaangzau hmun i sak dingmi Sianghleirun sianginn thar hmun cu April 14 ah an zoh.

"Hakha khuanu khuapa upa hna tiin Hakha Artlaangzau hmun ah sak dingmi Sianghleirun sianginn thar hmun cu HUSF kan rual tein kan va zoh. A hmun hi a kalmi kan zate nih kan hmuh bak in kan lung a tling cio dih. Hakha khua i kan ngeihmi hmun ahcun a thabik le aa rembik hmun a si lai tiah kan ruah. Sianginn sak tik bel ah khoika zawn ah zeibantuk inn sak te ding timi tu cu, tuanvo ngeitu le khuakhaangtu hna nih chan he aa tlak ding le a tha bik ding in kan sak piak te hna seh ti hi kan saduhthah a si," tiah Salai Joseph Khai nih Hakha Post ah a chim.

Hi hmun an zoh ni ah hin Carson Hall ah 2015-2016 cacawn kum caah hawi thar donnak le riantuantu thar thimnak zong an ngei. "Hi ni ah Hakha khuanu khuapa in Pu Siang Mang, Pu Hrang Vung le HUSF Senior friend in Postor Chan Hnin Thang hna nih HUSF hmailei saduhthahpiaknak le thazaang peknak an kan ngeih caah kan i lawmtuk," tiah Salai Joseph Khai nih a chim chap. 

April 23-27 Thantlang zong ah, a voi 17nk CUSF (Chin University Students Fellowship) Conference zong Chin miphun huap in tuah an i tim than. "Tutan CUSF i tonnak ah hin peng kip in biapi ah ruahmi biatung zong chuahpi cio ding a si caah HUSF chungtel vialte pel lo tein nan rak i tel cionak lai kan in sawm hna," tiah Salai Joseph Khai nih a chim.