Kawl Thawngzamhca Eleven Media Nih Chinram Paletwa Peng Cu Rakhine Ram Ah An Luhter

Khumi Media

April 19 chuak Daily Eleven thawngzamhca nih Rakhine hriamtlai phu AA le kawl ralkap an ni kah nak kong an tial mi ah 'Rakhine ram Paletwa peng' tiin an tial sual, Eleven Media tuanvo ngeitu nih Paletwa peng hi Rakhine ram ah a um tiin an ruah caah a si.


Hiti an tial palh mi an hmuh hnu ah Rangon um Paletwa peng nawlngei tu cheukhat nih an duh lo nak cakuat zong Eleven Media sin an kuat hna i tuni chuak Daily Eleven ah Editor-in-Chief nih theihternak a tuah than. 'Rakhine ram Paletwa' tiin tial mi kha 'Chin ram Paletwa' tiin rel piak ding ah a hal than mi a si.

Nikum lei zong ah Eleven Media nih Paletwa peng Rakhine ram a luh ter sual nak a rak um bal cang. Theihter nak zong an rak tuah than tiah Chinland Guardian nih a thanh.

Arakan Army zong an ram a si lomi Chinram ah an rak lor tuk ko cang rua, ALP zong hika Paletwa pengah an rak lor ngai leng mang. Paletwa peng hi Rakhine nih influence a tuah tuk cang ti nak a si. Rakhine nih kan ram a si ti nak ding hna a fawi pah cang rua ti awk in a um.