Khuate Tampi Cu Tanghra Sianginn Then An Pek Hna Nain Cachimhtu An Pe Hna Lo

Zephai sianginn

Thantlang peng khuate cheukhat cu cozah nih tangkua&tanghra sianginn then (Sub High School) a pek hna nain cachimhtu cu tlamtling in an pe kho hna lo,cachimhtu pakhat hmanh an pek rih lo mi khua cheukhat zong an um len tiah Thangtlang peng fimcawnnak zung in theih a si.


'Cung lei in rian hi rak pek a si. Kan mah nih pek a si lo. Pazeizat kan um, pa zeizat kan bau timi cu thla fatin kan theih ter peng ko hna. Zeitikdah an chiah te hna lai ti cu ka chim kho ve loh' tiah Thangtlang peng Township Education Officer Pu Siang Ling nih catialtu a reporter sinah a chim. 

Phung ning tein cun tangkua&tanghra sianginn then pakhat ah cachimhtu 7 tal pek ding an si. Nain, Thanglang peng tangkua&tanghra sianginn then nih tling tein a ngah mi an um rih lo. Cheukhat cu pakhat tal hmanh an ngah rih lo ti a si. 

'Cachimhtu 7 hmanh hi a za rih lo. Nain, tucu pasarih hmanh an pe kho hna lo tikah sianghngakchia caah sunghnak le fahnak tampi a chuah pi kho. Hi bantuk dirhmun in cun sianginn then pawl hi an pek lo a tha deuh. Tu lio nawlngahtu USDP pawl nih an mah minthatnak lawng an ni ruah caah a si. Mee ngah duh caah a si tiin ka ruat' tiah min langhter a duh lomi Sayaci pakhat nih a chim. 

Tangkua&tanghra sianginn then hi nikum hrawng in khuate ngan deuh cheukhat nih hmuh cio a si. Thantlang pengah cun Farrawn, Zephai, Aibur le khuadang dang nih an ngah ve. Cheukhat khua ah cun kum tam nawn an dirh nain cachimtu chambau ruangah tanghra awng kho an um tawn lo i an hnon than mi zong an rak um len.