Suimilam Pakhat Ah A Niam Bik $15 Pek Ding Ah US Mipi Nih Lam An Zawh

US ram a niam bik hlawh(minimum wage) cu suimilam pakhat ah $15 tal pek ding ah mipi tampi cu New York khuapi le Chicago khuapi hna ah lam an zawh i cozah sin hal nak an tuah tiah BBC le The Guardian nih an thanh. 

Hi lam zawh nak hi US ram khuapi 230 ah kan karh ter lai tiah tuanvo ngei tu nih an chim. Chicago le New York ah cun poster ngan pi pi an ni tlaih i cozah an au hnawh hna. Hiti hlawh kai ter ding an hal hi 2012 in an rak thawk cang mi a si. 


Atu lawlawse US ram chung a niam bik hlawh hi suimilam pakhat ah $7.25 lawng a si. Rian pe tu nih hi $7.25 nak tlawm pek khawh a si lo,zeibantuk rian chia a si zong ah. UK a niam bik hlawh hi $9.75 a si ve,US nak in tlawmpal a tam deuh. 

US ram chung a niam bik hlawh kai ter deuh ding ah Obama zong nih a rak chim leng mang cang mi a si. Nain, suimilam pakhat ah a niam bik $15 pek ding timi bel cu a si kho ngai hnga maw ti awk in a um ve.