Tuni Naypyidaw um President umnak inn ah Myanmar ram hruaitu 44 hna tonnak an ngei i ram pumpi huap kahdaih minthutnak ding kong, tukum thimnak tuah ding kong le teinak a ngah tu sin nawl ngeihnak tluang tein pek khawh a si nak ding kong hna an ceih i Pu Thein Sein nih tuzarh ninga ni ah six-party talks(hruaitu 6 tonnak) tuah ding zong bia a kamh hna tiah BBC,DVB le RFA nih an thanh.
Tuni a kai kho mi hna cu President Thein Sein, Vice-president pahnih, NLD hruaitu Suu Kyi, Hluttaw hotu 2, ralkap lutlai bik changtu, election commission hotu, tlangcung party hruaitu hna le tlangcung miphun aiawhtu vuanci pawl an si i an za tein 44 an si hna. Ralkap lutlai Gen. Min Aung Hlaing bel cu khual a tlawn lio a si caah ai tel kho lo. Shan party SNLD hruaitu Khun Htun Oo zong a kai kho ve lo.
Tutan tonnak ah Aung San Suu Kyi nih ram pumpi kahdaihnak sernak ah NLD zong i tel a duh ve nak kong le tukum thimnak zong a dikmi mi thimnak a si lai ti a zumnak kong zong a chim tiah Rakhine MP Zaw Aye Maung nih DVB ah a chim.
Tuzarh ninga ni ah cun, President biakam bang, 2008 constitution remhnak kong he pehtlai in NLD hruaitu Suu Kyi, President, ralkap lutlai Min Aung Hlaing, Hluttaw hotu 2 le tlangcungmi ai-awhtu Dr. Aye Maung hna an ni tong te lai. Hi tonnak hi kawlram thlennak caah a biapi tuk mi a si te kho!
No comments:
Post a Comment