Thawngpang Bultan(March 4)

March Thla Chung US Rian Thar A Karh Ning A Nuar Ngai: A luancia thla 12 chungah US ram chung ah thlakhat rian thar 200,000 leng a rak karh peng nain kan hnu March thla bel ah cun 126,000 lawng a karh, March thla chung US rian a karh ning hi thladang nak in 37% in a nuar deuh ti nak a si.

Hiti rian a zor nak a ruang bik cu nikhua caan a chiat ruang le factory pawl an rian tuan ning a nuar deuh caah a si. Hlawh bel hi suimilam pakhat ah $0.07 a kai deuh ve. March thla chung US ram rian tuan tu an rian tuan caan suimilam zong a zor caah mipi ngah mi hlawh zong a zor ti nak a si. CNN Money,BBC

China Nih An Tlaihmi US pa An Thlah Than Cang: China cozah thilthup a fir an ti ruangah 2007 ah an rak tlaih mi US pa Dr. Xue Feng cu China cozah nih an thlah than cang tiah nuhrin covo lei a cawlcang tu Dui Hua foundation nih BBC ah a chim.

Dr. Xue hi China ram oil industry pawl an data pawl US sin ah a zuar caah hi ti an tlaih hi a si. 2007 ah khan an rak tlaih i thawnginn kum 8 thlak ding bia an rak chah,nain, thawnginn chung a um zia a tha caah thla 10 an zuh piak than. BBC

NLD Nih Tukum Thimnak An Boycott Kho: Tukum donghlai thimnak hlan ah Pu Thein Sein cozah nih 2008 constitution an remh lo ah cun thimnak i cuh lo in kan boycott kho men tiah NLD hruaitu Suu Kyi nih Reuters thawngzamhca he an ni ton lio ah a chim.

Reuters he an ni ton lio ah cun Pu Thein Sein cozah a zumh deuh lo nak kong le 2008 constitution an remh lo ah cun zei lam dah NLD nih kan ni thim ah a tha bik lai timi a tuak tan lio nak kong zong a chim hna. 

Suu Kyi nih 2011 lio Pu Thein Sein he an rak i ton hmasat lio ah cun Pu Thein Sein hi thlennak a duh tak tak mi ah a rak ruah nain a tu a hmuhning bel cu ai dang ngai cang a ti hna. 2008 constitution an remh lo ah cun Suu Kyi hi kawlram President a si kho ding a si lo. BBC, Yahoo News


Tlangcungmi Hriamtlai Phu Vialte Wa Ram Ah An Ni Tong Lai: Kawlram pumpi huap kahdaihnak minthut ding NCA ding kong ceih ding ah tlangcung hriamtlai phu aiawhtu vialte cu Wa hriamtlai phu UWSA an headquarters ah a ralaimi May thla thawk ah tonnak an ngei te lai tiah VOA le 7Day daily nih an thanh.  

Hi tonnak ah hin tlangcungmi hriamtlai phu hruait hna nih NCA(nation-wide ceasefire agreement) min thut tikah zeitindah cawlcangh a si lai timi kong hna an ceih te lai. I tonnak hi May 1 in an thawk lai i a tlawmbik nithum tal ceih ding an timh.Hi tonnak ah hin NCCT member 16 an ni tel te lai. 

Tutan tlangcung hriamtlai phu tonnak hi a voi 3nak a si lai, KIA headquarters Laiza ah voikhat an rak tuah, KNU headquarters Lawkhila zongah voikhat an rak tuah cang. 
Wa hriamtlai phu hi kawlram ah a thawng bik mi an si, NCCT zongah member an si lo. Kawl ralkap zong nih a thuat ngam hna lo.