China Nih Shan Ram Ah An Flag An Phun, Khuami Nih An Thawl Than Hna

China he ramri a si mi Shan state chak lei Muse khua pawng ah China lei nawl ngei tu 20 leng nih April 3 zing ah zei thawngthanh hmasatnak hmanh um loin an rak lut hlei ah Myanmar ram chung ah Chinese flag an phun i cuka khuami hna nih an duh lo nak an langhter caah an kir than tiah DVB le RFA nih an thanh.

 

Mah China mi 20 chungah hin meithal aa tlai mi border guard zong an ni tel ve. An rat ah hin Shweli tiva hlei donh ding ah kan ra an ti hna. Hiti China mi nih kawlram chung an rak luh le Chinese flag hna an phun hi cuka khuami minung 500 leng nih an duh lo i an va kal hnawh hna, Shan state level in an duh lo nak cakuat zong an va pek hna caah a ra mi Chinese 20 leng cu an kir than colh ti a si.

Hika hmun ah hin nikum zongah China le Myanmar cozah kar i theihthiam lo nak a rak um cang. Hika hmun ramri hi fek tein an khiah kho rih lo mi a si.


China le Myanmar hi kan hnu kawl ralkap nih China ram bomb an thlak sual i minung 5 an thih hnu ah ram ri buainak a rak um pah leng mang. China nih Myanmar ramri ah ralkap le raltuknak vanlawng tampi zong a rak thlah hnawh hna.