Thawngpang Bultan(April 8)

Boston Bomb Puahtu Thihdan Ngah Dawh A Si Cang: US ram Boston khua ah bomb a rak puahtu Mr. Dzhokhar Tsarnaev cu sualnak 30 an puh i biaceihtu nih a sual ko a ti cang, zei bantuk dantatnak dah an pek lai timi bel cu Massachusetts state biaceih tu lutlai phu 'jury' nih bia an chah te lai.

A sualnak tampi hi thihdan pek phu mi an si hna caah thihdan an pek lai tiah mi tampi nih an zumh. April 15, 2013 ah khan Mr. Dzhokhar Tsarnaev le a u pa nih Boston khuachung marathon a tli mi lakah cooker bomb an puah i minung pathum an rak thi. Palik pakhat zong an rak thah rih. BBC

IS Ralhrang An Piang Thar Rua: Iraq chak lei ah an hrem mi Yazidi minung 200 leng cu IS ralhrang nih an thlah than hna i an umnak hmun zong an phan than cang tiah Kurdish ralkap nih BBC ah an chim. 

Hi an thlah than mi hna chungah hin ngakchia 40 leng an ni tel ve. Zeiruangah dah IS nih hiti an thlah than hna timi bel cu theih a si rih lo. Mah hna hi nikum August thla in an rak tlaih cang mi hna an si. January thla zongah khan IS ralhrang nih Yazidi minung thiam thiam 200 leng an rak thlah bal cang hna. BBC

Minak Pa Kahnak Kongah Lai Mino Hmuhning Ai Dang Ngai: Catialtu nih tuzing ah mirang palik nih minak pa a kah nak kong 'uico thah in a thah' tiin a tial mi cu facebook hmang Lai mino tampi nih ceih ngai a si,ruahnak zong ai dang ngai. 

Cheukhat nih palik pa an mawtchiat tuk lo nain cheukhat nih cun an mawtchiat ngai. Palik pa lei in a dirtu nih cun 'minak pa a tlik awk a si lo' an ti i minak pa tu an mawtchiat. Nain, cheukhat bel nih cun 'a tli hmanh a tli kho huaha lomi dawi ta loin meithal a kah cu a phung a si lo' an ti ve. A dang pakhat bel nih cun 'uico cu kha ti khan maw an thah tawn' tiin catial tu biahal nak a tuah ve. 

Kawlram Nih Ramdangah Facang A Zuarmi Rice Export 40% In A Kai: March thla ah a dongmi 2014-2015 phaisa kum chung kawlram nih ramdang ah facang a zuar mi rice export cu tuan deuh phaisa kum(2013-2014) nak in 40% bak a kai tiah Myanmar Farmer Association chairman U Soe Tun nih Irrawaddy sin ah a thanh. 

Facang ramdang ah zuarnak in kawlram cozah nih $645 million leng a hmuh. Hi facang an zuar biknak ram cu China thiam thiam a si. Hi phaisa kum chungah ramdang a zuar mi facang dihlak hi 1.7 million tons an si i 1.1 million tons hi China ram ah a lut. A dang cu Japan, Europe, Africa le Asean ram hna an si. 

Kawlram hi British kuttang an rak um lio 1939 tiang cu vawleicung facang zuar kho bik a rak si, 1940-1945 kar Japan ral ruangah ram chung facang chuak fak tuk in a rak zor. U Nu cozah tang zongah British chan tluk in facang an rak chuah kho ti lo, Ne Win uknak a lak hnu in a rak zual chin i a tu Thein Sein a kai hnu bel in thazang a hung ngei deuh than nak a si. 


Hakha Sianghleirun Kai I Hawikawmhnak An Ngei Lai: Kumkhat ah voikhat tuah tawn mi Hakha sianghleiruun sianghngakchia i hawikawmhnak cu a ralaimi April 14 ah Hakha College peknak hmun ah tuah an timh,hi tikah mithar donnak le hmaikum caah hruaitu thar thimnak zong an tuah lai tiah The Hakha Post nih a thanh. 

Hi i hawikawmhnak hi Hakha University Sianghngakchia Hawikawmhnak (HUSF) hruainak in tuah mi a si i ramchung sianghleiruun kai mi poah an ni tel. HUSF hruainak in Hakha sianghnleirun kai kho min cazin zong lak a si i tuhi Hakha in kawlram chung sianghleirun kai lio mi 2,000 leng an si hna.