Iran Nuclear Deal Hi Iran Chunmang A Si Nain Vawlei Mangchia A Si: Kan hnu April 2 ah US le ramthawng pa 5 nih Iran nuclear chiahter nak kong hnatlaknak an ngah mi mi cu Israel Prime Minister nih 'Iran caah cun a chunmang a tlinh a si lai,nain, vawlei caah cun mangchia a si' tiah NBC nih bia an hal nak ah a leh hna.
Hnatlaknak ah hin Iran nih nuclear bomb sernak ah a biapi bikmi Uranium a thawnternak centrifuge 66% in dor ter ding le Iran nih nuclear thazang a hman ning zong IAEA nih zoftel ding tibantuk hna a biapi deuh in an ni tel. Hi hnatlaknak Iran nih a zul lawngah Iran cung an chiah mi sipuazi phihnak hna dorh piak ding a si.
Mah hnatlaknak hi Republican cheukhat an lung a tling ve lo. Israel Prime Minister Netanyahu kau hi a zual. Hi Iran nuclear kongah Obama he an hua ngai.
Kawlram Chung Ramkhel Thawngtla 500 An Phan Than Cang: President Thein Sein thutnak a lak hnu in kawlram chung ramkhel thawngtla tam pi a rak chuah hna nain nai hrawng an tlai than mi hna an hung tam ngai than caah tuhi ramkhel thawngtla 500 hrawng an phan cang tiah kawlram chung ramkhel thawngtla a bawmhchanhtu Association for Political Prisoners(AAPP) nih RFA sin an chim.
Mah thawngtla 500 chungah hin nuhrin covo lei a cawlcanghtu, fimcawnnak lei upadi duh lonak a rak langhtertu sianghngakchia le sianghngakchia a bawmtu hna an ni tel ve ti a si. Mah ramkhel thawngtla pawl hi Insein thawnginn le Tha-ya-wa-di thawnginn deuh ah an chiah tawn hna.
Kawlram Cungah UK&Australia Sianghngakchia An Khuaruah A Har: UK ram le Australia ram University sianghngakchia 7 cu kawlram chung fimcawnnak kong hlathlai duh ah April 2 ah Rangon an phan.Dagon University le Sipuaizi University va len ding cozah sin an hal nain an pek hna lo caah an khuaruah a har ngai tiah RFA nih a chim.
Sianginn lei va len ding an phih hna caah a leng lawngah sianghngakchia hruaitu hna he an ni tong than ti a si. Mah sianghngakchia 7 hi Oxford University, Liverpool University le Australia ram sianginn minthang in a ra mi an si hna.
Cozah Nih Rakhine Hriamtlai Phu ALP Sual An Puh Hna: Kan hnu March 29 ah Rakhine hriamtlai phu pakhat a si ve mi Arakan Army(AA) le kawl ralkap an ni kahnak ah Arakan Liberation Party (ALP) ralkap 8 an ni tel ve tiin cozah lei nih an puh hna i hlathlai nak zong an tuah ti a si.
ALP lei nih AA hriamtlai phu he pehtlainak kan ngei lo tiin an leh hna i cozah lei nih hiti pehtlainak an ngei lo nak ca pakhat in cozah sin tial ding nawl an pek hna.
March 29 ah AA le kawl ralkap kar i kahnak ah hin kawl ralbawi pakhat a thi i AA nih ralkap 2 an tlai beh hna. RFA
Melbourne Ah Nu Pakhat Nazi 7 Chung Hrem A Tong: Australia ram Melbourne khua ah nam aa tlai mi pa nih nu pakhat restaurant chung ah suimilam 7 chung a hrem, palik nih electric (taser) hmang in mah a hremtu pa cu an kah khawh i an tlaih beh i nu zong cu a luat than.
A hremnak a ruang hi an mah pahnih kar ah i theihthiam lo nak a um ruangah a si men lai ti a si. Cu ka restaurant ah rian a tuan ti mi an rak si bal. Mah pa cu thaizing hi palik nih bia an hal te lai. The Sydney Morning Herald
No comments:
Post a Comment