Thawngpang Bultan(April 2)

New York Ah IS Citizen Ai Timi Nu 2 Nih Bomb Puah An Timh: US citizen an si nain an mah tein Islamic State citizen kan si ai ti mi nu 2 nih New York khuapi Mahattan um Herald Square cu bomb puah hnawh an timh nain an tuah tak tak hlan ah US palik FBI nih an tlai manh hna. 

Mah hna pahnih hi room-mate an si i New York khua the Queen section ah an um. An pahnih in bomb ser kho dingah chemistry le electricity hna an cawng, 2013 lio Boston bomb puahnak i an rak hman mi cooker bombs serning hna zong an kherhlai len ti a si. Pakhat nu nih cun al-Qaeda hruaitu Osama Bin Laden cu 'paral tha' 'hero' a ti ti a si. BBC

Kawl Ral Kap Nih 'Kan Palh' An Ti Cang: Kan hnu thla ah kawl cozah nih Kokang hriamtlai phu a kah nak ah China ram ah bomb a thlak sual i minung 5 an rak thi, mah bomb thla tu hi kan mah kan si lo, Kokang hriamtlai phu nih an tuah mi a si lai tiin kawl ralkap nih an ni pheh len nain tuhi cu 'kan mah tuah mi a si ko' tiin China cozah ngaithiam an hal cang hna tiah VOA nih a thanh.

Kawl ralkap bomb ruangah China mi 5 an thih hnu ah hin China nih a raltuknak vanlawng tam ngai ramri ah a rak thlah hnawh len ve i ram hnih kar i theihthiam lo nak a rak zual ngai. 

Soisel A Tong Ngaimi Indiana Upadi Thar An Remh Than Lai: Gay le lesbian pawl a thleidan kho tu Indiana state biaknak lei upadi cu kan hnu zarh ah an fehter i mi tam ngai nih an soisel hnu ah tuhi cu remh than ding hna tlak a si than cang.

A tu an remh than hnu ah cun, business pawl nih gay le lesbian thleidan lo in an thilri le an service zuar ding a si lai. An remh hlan ah cun business pakhat khat nih a biaknak he ai kalh an ti ah cun gay le lesbian thil tuah piak lo in um khawh a rak si. Biakinn, biaknak lei sianginn le biaknak lei organization bel nih cun an biaknak he ai kalhmi poah cu tuahpiak lo in um khawh a si thiam thiam rih lai. BBC

Iran Nuclear Kongah Hnatlaknak An Ngah Cang: US le ramthawng pa 5 nih Iran nuclear kong Iran an chonh mi cu March 31 ah hnatlaknak ngah an rak timh nain a dang ni 2 an ni chonh than i tuni cu hnatlaknak an ngah tak tak cang. 

Hi hnatlak nak ah Iran nih nuclear hriam sernak ah a biapibik Uranium thawnter nak centrifuge cu cheuthum ah cheu hnih (66%) in zor ter ding, a hman ti lo mi centrifuge pawl cu ngiathlaitu International Atomic Energy Agency(IAEA) kut cung chanh ding, Iran nih hnatlaknak a zul le zul lo IAEA nih zohfel peng ding le hiti Iran nih hnatlaknak a zul ko ah cun IAEA nih an zohfel hnu ah EU le US nih sipuazi an phih mi onh than ding hna an si. 

Obama zong nih ai lawmh nak a langhter len ve. Iran mipi zong nih teinak pakhat kan hmuh an ti i hi hnatlaknak cu an lawmh cio.The Guardian,Abc News

Kenya University Ah Ralhrang Nih Minung 147 Leng An Thah Hna: Kenya ram Garissa University ah al-Shabab timi ralhrang hna nih campus chung an luh hnawh hna i meithal in an kah hna caah minung 147 leng an thi i mi tam ngai hma an pu tiah BBC nih a thanh.

Mah ralhrang pawl hi mah tein i thah beh ding ah ai ready mi an si, mah tein i that nak ding angki 'suicide vest' an ni hruk dih i a donghnak ah an mah tein an ni that dih ve ti a si. al-Shabab ralhrang hi Somalia ram ah hmun khur mi an si i ralkap thazang 9,000 leng an ngei hna. 


KIA Nih Hpakant Khuami Nu Pakhat An Tlaih: Kan hnu March 30 ah khan Hpakant khuami nu pakhat cu khuami cheukhat he bia an i al ruangah KIA hriamtlai phu pathum nih an rat hnawh i hmun dang ah an kal pi i March 31 ah biaknai lei upa pakhat nih a va nawl than hna hnu in an rak thlah than tiah 7Days News nih a thanh.

Hiti hriamtlai phu nih inn tiang an rat hnawh i an mah duhning in an kal pi cu Hpakant mipi kan him hrim lo tiah KIA nih an kalpi mi nu a va pa nih a chim.