Thawngpang Bultan(April 10)

Kawlram Hruaitu 6 Kar I Chonhnak An Thawk Cang: 2008 Constitution remhnak kong ceih dingah Aung San Suu Kyi le Hluttaw nih an rak hal leng mang mi hruaitu 6 kar i chonhnak cu a tu nai kawlram caan 2pm ah an thawk cang,pa 6 ning tein an ni tel kho. 

Hi tonnak ah ai telmi hna cu President Thein Sein, ralkap lutlai Gen. Min Aung Hlaing, NLD hruaitu Suu Kyi, Hluttaw pahnih hotu veve le tlangcungmi ai-awhtu Dr. Aye Maung hna an si. Acung hmanthlak hi U Ye Htut nih tunai ah khan a facebook ah a rak tar mi a si, 'tuanbia ah a hmun hnga ding' tiin a tial chih. 

Hi tonnak in Myanmar ram chung thlennak tampi a chuah pi kho mi a si. Aung San Suu Kyi nih Myanmar ram president si khawhnak a khamh tu phunghram 59(F) hi ka remh piak uh ti te dawh in a lang. 

Iran A Zia A Chuak Than Cang: Kan hnu zarh ah US nih biatak tein a rak lawmhmi Iran nuclear chiahternak kong hnatlaknak cu US lei nih an chim mi le Iran lei nih an chim mi ai kalh tuk caah Iran hruaitu lakah nawl a ngei ngai mi(supreme leader) Mr. Khamenei nih 'US cu mi hlen a hmang mi le hnatlaknak a buar peng mi an si' tiah Twitter ah a thuat hna tiah BBC nih a thanh.

Iran Supreme Leader Twitter in lak mi

US a chimmi he ai kalhtuk mi pakhat cu zeitik ah dah Iran cung sipuazi an phih mi sanction an lak dorh than lai timi kongah a si. Iran nih cun hnatlaknak min thut le cangka in sanction vialte an phoih dih a hau a ti. Nain,US nih cun Iran nih Uranium 66% a hloh timi IAEA nih a fehter hnu lawngah economic sanction phoih piak ding a ti ve. 

Tukum Thimnak Ah Nusal Cheery Zahau Aa Cuh Ve Lai: Chinram level lawng si loin kawlram level le international level tiangah nuhrin covo kong he pehtlai in bia a chim kho tu Cheery Zahau cu a ralaimi thimnak ah kai cuh ve lai a ti tiah Irrawaddy nih a thanh, Union level or State level in dah ai cuh lai timi bel cu a fiang rih lo.

A nih hi Pu No Than Kap hruaimi Chin Progressive Pary(CPP) Secretary a si i CPP in ai cuh te lai. Khawika hmuhma(constituency) in dah ai cuh lai timi bel cu theih a si lo. 

Cheery Zahau hi Thailand ram Mahidol University in nuhrin covo lei a pehtlaimi degree a ngah tu a si i UN le UK parliament tibantuk zongah bia a chim leng mang mi a si. Mirang ca mekazine lakah kawlram chung min a lang bikmi Irrawaddy zongah capar a tial leng mang mi a si. Chinnu ah cun amah tluk a nusal mi an um men lai lo an ti theu.Kum 33 a si.  


Matupi-Paletwa Mawtaw Lam A Pem Tak Tak Cang: Chinram kulh Matupi-Paletwa kar lam cu Chinram cozah nih kum hnih chung an cawh piak hna i an lim cang, April 6 le April 8 ah khan lam honnak zong an tuah cang tiah The Hakha Post nih a thanh.

Hika lam a pem hlan ah cun Matupi in direct kal khawh a si lo caah Paletwa kal duh poah ah Mandalay in rak i hel a hau tawn i caan tampi pek a si. A tu lam an pem hnu ah cun pehtlai nak a tha deuh lai hlei ah chawlehnak lei zong tampi a thahnem te lai. 

Hi lam hi meng 135(suimilam 3 hrawng kal) a sau i pe 24 a kau mi a si. Hi lamthluan um pe 440 a sau mi Myi tiva hlei zong an donh piak chih cang hna ti a si. 

Hakha Um PK Pawl Nih Saikel Ngei Khuami An Cawnpiak Hna: Tutan kawl titoih puai chung khawndennak a um lo nak hnga caah tuanvo ngeitu Hakha traffic police (PK) pawl nih April 9 ah Hakha khuami an cawn piak hna tiah The Hakha Post sin in theih a si.

An cawnpiak mi hna cu khuachung ah motor le saikel mawngh tikah zul ding mi phung(laing-sii-kan) philh lo ding le rang tuk in motor le saikel mawngh lo ding timi pawl an si hna. Hi zulh phung hi mipi zong an theih khawh ve nak hnga tiin catlap(leaflet) zong mipi an phawt chih hna ti a si.