US ram Indiana state um Lilly Endowment Scholarship cu Laihla sak zong a thiam i a aw a tha hlei ah a mui zong ai dawh chih mi kan far nu Emily Ngunhlei Sung nih a ngah ve. Mah scholarship nih a dih ding mi sianginn man vialte a liam piak dih lai hlei ah kum khat ah cauk le a dang herhmi cawknak ah $900 zong a pek chih te lai.
US ram sianginn man hi kum khat ah a niam bik $10,000 leng an si hna. Sianginn tha deuh ah cun kumkhat ah $30,000 leng a dih mi a si. Bachelor hi kum li kai a si caah scholarship a ngah lomi caah cun bachelor degree ngah nak ah a tlawm bik $40,000 cu dih a si. Hiti sianginn man a fah tuk ruangah Lai mino tampi cu High School an dih in College le University peh duh lo in warehouse le sathahnak hna ah rian an lut colh leng mang. Emily ca bel ah cun mah kum li chung a dih ding sianginn man vialte hi Lilly Endowment Scholarship nih a liam piak dih lai.
Scholarship timi hi mi zaran nih ngah khawh mi a si lo, a herhmi le tlinh hnga ding a tam tuk. Tanghlei hnih an awn nak mark zong bia tak tein an zoh lai i a mark sang tak tak mi le ca a thiam tak tak mi lawng pek an si. US lebang ah cun sianginn man a fah tuk tikah scholarship a sawktu an tam caah ngah zong a har khun mi a si. A ngah mi tu cu a ho poah nih upat hna i an tihzah cio hna.
Emily Ngunhlei Sung cu Laihla a ngai pah mi nih cun kan thei pah dih men lai. A aw a tha, a mui zong ai dawh fawn. A hlasakmi hi Pathian hla deuh an si hna. Nikum lei World Refugee Day 2013 ah khan International Level in Essay Tial zuamnak a rak um i 'Giving Back To Community'timi tlangtar in pakhat nak a rak ngah bal.
Emily hi Zephai khuami Pu Mangbik Sang Chin le Pi Cer Iang an fa nu a si. An chungkhar in US ram Indiana ah khua an sa.Tuhi IU Bloomington Kelly School of Business ah Business lei kai a timh. Kum 19 nungak no te a si. A mah facebook page Emily Ngunhlei Sung ah len khawh a si lai.
No comments:
Post a Comment