Myanmar Hruaitu 6 Tonnak An Lim,Zei Kong Dah An Ceih?

Myanmar ram hruaitu 6 tonnak cu tu chun kawlram caan in 2pm ah an thawk i 4pm hrawngah an dih, suimilam 2 chung an thu ti hna. Tu chun i chonhnak ah cun hnatlaknak le biakhiahnak pipa pakhat hmanh an tuah rih lo, kawl titoih puai a dih hnu ah i ton than ding hna tlak a si. 

A bik in an ceihmi hna cu 2008 constitution remhnak kong, ram chung kahdaihnak kong le tukum dongh lai ah tuah ding mi thimnak kong hna an si. An ceihmi kong thuk deuh in chimnak nawl ka ngei lo tiah President ai-awh biachimtu Ye Htut nih thawng a zamhnak ah a chim. Dr. Aye Maung a chim ningah cun tuni an ceihmi hi a tlangpi(principle) lawng in ceih a si rih, voi2 nak an ni ton than tikah thuk deuh in ceih le biakhiah a si te lai a ti. 

Suu Kyi& Shwe Mann Vs Thein Sein& Min Aung Hlaing: Tutan tonnak hi minung kan tlawm tuk, midang zong an ni tel ve awk a si tiah Thein Sein le Min Aung Hlaing nih an chim. Nain, Shwe Man le Suu Kyi nih hi zat minung 6 hi a za ko an ti ve,Dr. Aye Maung bel a holh lo.Hi zat minung 6 in a voi2 nak i ton than ding zong hnatlak a si ko caah Thein Sein le Min Aung Hlaing nih an lung an thumh ti nak a si.Suu Kyi le Shwe Mann hi a hlan in a rak tang ti lengmang mi an si, tutan tonnak zong hi Shwe Mann tawlrelnak deuh in tuah mi a si. 

An thutdan Ai Hlat Tak Tak: Minung paruk lawng i tonnak a si nain minung 60 i tlumnak khan ah an ni tong. An kar lak ah hin bawlung chuih khawh ding hmunhma a lawng. U Ye Htut nih ta far bantuk in le naihniam ngai in an i chonh biak a ti mi hi a dik deuh lo kho men. Minung paruk lawng i chonhnak ah 'mike' an hman cu ruah awk a um pah ve. 

Tutan Ai Dan Nak Pakhat: Gen. Min Aung Hlaing nih 2008 constitution remhnak kong a chim bal lo,kan humhak lai,kan zoh khenh lai timi deuh lawng a chim tawn.Nain,tutan i tonnak ah cun 2008 constitution ah poahmah(articles) cheukhat remh a herh ah cun remh ding kong zong a chim tiah Dr. Aye Maung nih RFA ah a chim. Ralkap lutlai nih 2008 constitution remh a herh timi zong a pawm ve cang ti nak a si,zeitiang remh ding dah a co hlan te lai timi bel chim a har rih. 

2008 Constitution Remh Khawh Dawh A Si Ko: Hluttaw nih nikum lei ah khan 2008 constitution remh a herhmi zohfel ding ah 31 member ai telmi committee pakhat an rak dirh. Mah committee nih 'remh a herh' an timi poahmah deuh hi mah hruaitu 6 nih ceih te dawh an si,tiah Dr. Aye Maung nih a chim rih. Mah committee ah hin ralkap zong an ni tel ve ko caah an mah nih 'remh a herh' an timi tam deuh cu hihna hruai 6 nih an ceih te lai i Hluttaw zong nih hnatlak pi te dawh a si ko. 

Kei mah hmuh ning: Hi tonnak hi cozah media le Thein Sein a nau pa Ye Htut zong nih bia tak tein an buaipi i thawng an thanh ve mi hmuh tikah thlennak pakhat khat cu tuah an timh/duh ko ti a lang ngai. 2008 constitution hi tam pi an remh khawh lo hmanh ah Suu Kyi president sinak a khamhtu 59(F) tal hi cu remh piak te dawh an si ko rua! 

Rf:BBC,RFA,VOA,DVB,Irawaddy.     

Dr. Aye Maung Le RFA biaruahnak!