Matupi Peng Angta Khua Gangaw Peng A Phan Mi Lak Than An Duh: Ne Win chan 1972 hlan ah Matupi peng a rak um mi Angta khua cu Gangaw pengah a um cang caah a tu cozah nih Chinram chung Matupi pengah chiah than ding in Matupi peng MP Pu Van Cin nih a voi 10nak Chinram Hluttaw meeting ah halnak a tuah tiah The Hakha Post nih a thanh.
Mah Pu Van Cin a hal mi hi Chinram uknak lei Chief Deputy Director U Maung San nih hiti hin a leh: "Angta khua hi Chin Ramkulh Matupi peng ah a rak um bal timi ca kan hmu lo. Bungzung Forest area belte cu a um. Chin Ramkulh chung chiah khawh nakding ahcun Magwe Ramthen le Chin Ramkulh Chief Minister an i ceih i hnatlaknak tuah a hau".
Malaysia Ah Bomb Puah A Timhtu Ralhrang Terrorist 17 An Tlaih Hna: Malaysia khualipi Kuala Lumpur khua ah bomb puah ding timhtuahnak a ngei tu ralhrang 17 leng cu zei hmanh an tuah khawh hlan ah Malaysia palik nih an tlaih khawh hna tiah BBC nih a thanh.
Mah 17 lakah minung 2 hi IS ralhrang pawl an lor nak Syria in nai te ah a rak kir mi an si hna. Mah ralhrang hna hi hriamnam ngah khawh dingah Kuala Lumpur um palik le ralkap umnak hna luh hnawh an timh cang ti a si. An tlaihmi hna hi kum 14-44 kar an si hna.
Tuni kha Malaysia cozah nih ralhrang dohnak (anti-terrorism bill) upadi an fehter i hmual ngei deuh in ralhrang an doh khawh cang lai ti nak a si.
Australia Ah Ngakchia Ninga Chung A Tlau Mi An Hmuh Than: Australia ram Victoria ah ngakchia kum 11 pa cu an chungkhar in holiday an kal lio ah a tlau i ninga chung an kawl hnu ah a nung in an hmuh than,si-inn ah an kal pi colh i a nunnak caah thin phan awk a um lo tiah BBC nih a thanh.
A tlaumi Look Shambrook hi thluak lei tlamtlinlonak a ngei mi a si i midang he ai chonh bia kho deuh lo mi a si. Hi pa a tlau ruangah Lake Eildon ah holiday a kal mi tampi cu an holiday ngol in amah an kawl cio ve ti a si.
Thein Sein Telh In Kawlram Hruaitu 48 Thaizing An Ni Tong Lai: Kawlram chung party lutlai, tlangcung miphun pakhat cio aiawhtu le cozah lutlai pawl i tonnak 48 party talks cu thaizing Naypyidaw um President inn ah tuah a si lai tiah Pu No Than Kap nih 7Day Daily ah a chim.
Hi tonnak ah ram pumpi huap kahdaihnak minthutnak (NCA) ding kong, tukum thimnak kong, thimnak tuah hlan ah ram chung daihnak a um khawhnak ding kong hna ceih a si lai. Hi bantuk hruaitu 48 i tonnak hi a luancia January thla chungah an rak tuah bal cang.
CACC GS Thlahlawh Ks 360,000 Pek Ding An Fehter: Ram kip um Chinmi hna telh in Chin Association for Christian Communication (CACC) a voi 9nak Triennial Meeting cu April 4 in Hakha ah an tuah i CACC riantuan hna thlahlawh zong an fehter, CACC GS cu thlakhat ah Ks 360,000 pek ding hnatlak a si tiah The Hakha Post sin thawng theih a si.
CACC meeting nih an fehter mi CACC riantuantu thlahlawh cu a tanglei bantuk in an si:
GS Ks.360,000
AGS Ks.340,000
Dept. Secretary Ks.330,000
Clerk/ Accountant Ks.235,000
Driver Ks.225,000
Peon + Keeper Ks.215,000
Family allowance Ks.10,000
Housing allowance Ks.35,000
Housing allowance Ks.25,000
Office assisitant Ks.235,000
Treasurer Ks.110,000
No comments:
Post a Comment