A Fiang Lomi Lamthluan Ka Rak Zulh Lio

Tanghra ka awn hnu in ka rak tinhmi le ka rak ruahchih peng mi cu nikhat khat ah Western ram pakhat ah cacawn ding hi a si.Ramdang cacawn cu phaisa tam tuk a herh hlei ah tlinh ding a tam tuk caah keimah bantuk mi zaran caah cun a si kho lo tluk in ka rak theih. Nain,Good English grammar cauk tialtu Dr. Minn Tin Muun nih ‘Tuah duhnak lungthin a um ah cun tuahnak lam a um ve’ a timi bia nih ka lung aka thawn ter ngai tawn. Caa zoh ka lung dongh caan ah hi Dr. Minn Tin Muun cabia in thazang kai pe tawn.


India In Kawlram Ka Kir: Kumthum chung sianghleiruun ka kai hnu ah Bachelor degree cu ka ngah ve. Ka sianginn kai ti tampi cu Master peh ding in an ni timhlamh,nain kei bel vanlawng ticket le degree certificate ah ka rak buai. Hawidang sianginn peh an timh lio ah umnak ram kir cu a nuam lo ngai. Nain kan nun lamthluan ai dang cio caah kan mah le tinhmi cio ah panh a si.Kan college in certificate hna ka ngah dih hnu ah a zeibantuk hmunhma dah a ka phakpi lai ti theih rih lomi ka lamthluan zulh in kawlram lei ka rak kir than. 

Sianghleiruun ka kainak Chennai in Imphal(Minipur khualipi) tiang vanlawng in ka ra,vanlawng cungah khua tampi ka ruat,”England sianginn kainak ka tuah ding hi tlamtling hlahsehlaw ka sianginn kai ti hawi Master an dih ah kei cu vaivuan in maw ka va um rih ko hnga!!”.Vanlawng cung siseh,mawtaw cung siseh,biaruah ding an um lo caah England sianginn kai ding lawng ka tuaktan,ka seih-kuu-ziin a pin ngai kan ti lai cu! Voidang mawtaw ka rii tuk tawn nain tutan cu ka zei a ti lo,ka ruahmi tam tuk caah maw zei dek!Cuticun,I theih manh hlan  ah Hakha ka phan.

Hakha Um Cim Hlan Ah Rangon Ah Ka Lanh Than: Ka nu le ka pa sin zarhkhat fai lawng ka um hnu in Rangon lei mawtaw ticket ka cawk than. Ka nu rawlchumh ei le a muihmai zoh ka cim rih hrim lo,nain kaa tinhmi tlolh lai phan ah Rangon lei panh in a mui rihmi ka lamthluan ka rak peh than. Kei hi Rangon ka rak phan bal rih lo,kawlholh zong thathi ka thiam lo. Rangon cu a min ka rak theihnak sau ngai cang caah phak lai kaa ngeih ngai.

Hakha in zaan khat chung kan kal hnu ah Mandalay kan phan,Rangon kalding mawtaw kan ni thleng than,an mawtaw cu a tha tak tak,India hmanh ah cutluk mawtaw tha ka hmu bal lo.Rangon le Mandalay kar mawtaw I cit cu India vanlawng I cit nak in tha a dam deuh,lungthin hrim a fresh tuk. Kawlram hi India hmanh nih a tluk lonak a um ve len hi teh ka ti len.Nazi paruk hrawng kan kal hnu zaan muih lai ah ka nunnak lamthluan caah biachahnak hmun British Embassy umnak Rangon kan rak lut.

Rangon Ka Phakka Hrawng: Rangon ka phak thaizing ah Rangon khuapi map kai cawk colh, British Embassy ka kal I student visa caah a herhmi tete ka hal hna. Aherhmi a dang cu ka tlinh pah ngawt,IELTS(International English Language Testing System) tuhi ka phi rih lo caah phit ta a hau an ka ti. IELTS cu India sianghleiruun ka kai ah ka rak zoh pah len cang,a thluangthlam cu ka thei pah. 

IELTS phit dingah tuition ka kai ta hnga maw ti ka laklawh ngai,ka hawi le tampi nih tuition kai hmasat an ka duh pi. IELTS hi mitampi cu kumkhat-hnih caan an pek hnu ah an phi tiin an ka chim. Kei zong nih tuition kai ta cu ka duh ve nain tuition man ah tingthum,exam man ah ting khat hlei a dih ding a si caah ka budget nih a rak chei ti lo. Rangon hi August 3,2013 ah ka phan I August 28 ah IELTS phit ding in register ka tuah.Cuticun IELTS zong cu ka phi I ka sianginn nih an hal zat ka hmu ve.

Rangon Ka Um Chung Ka Nuamhnak le Ka Harnak Tete:England sianginn kai kaa timh hi ka chungkhat nih an ka duhpi lo,a kai kho tak tak lai ti an rak zum lo caah a si. US um ka u le nih cun India ah Master peh an ka duh pi. An ka duhpi ning in ka um lo tikah phone hna ka chon ngam hna lo, phaisa zong ka cah ngam hna lo,Hakha lei ka nu le ka pa cah ah le ka sia rem than lo. Um man le ei man hna pek a hau caah rian pakhat tal tuan lo a si kho ti lo. Culio ah The Hakha Post nih Rangon reporter an herh ti ka theih le cangka in phone ka chon hna I an ka cohlang colh ve.

Ka rian cu Rangon um laimi kan thawngpang hlat le zarhpini LBC pumh dih poah ah The Hakha Post zuar,laimi tam deuhnak hmun poah (46 sang,Hlaingtirih Innya tbk) ah an inn tiang va phawt khi a si. Part time in bible college pakhat ah mirang ca ka chim pah hna. Kei mah hna nih B.Th final a kai lio mi mirang ca ka chim hna cu ka lawm ngai nain LBC pumh dih in nungak hmai ah The Hakha Post ka zuar ah cun tlangval pakhat dirhmun in ka ningzak pah ngai tawn,ka sianghngakchia nih an ka hmuh caan ah hin an khuaruah a har. 

Cuticun Reaching the World Bible College ah mirangca chimh pah buin The Hakha Post cu ka zuar chih I Rangon laimi lakah cun ‘The Hakha Post zuartu’ tiin an ka thei pah ngai. Achel caan ah cun ka lung fak ngai, laimi cheukhat an inn tiang ka kal hnawh hna nain kutka hna onh duh lo,nan ca zuar a tam,nan cazual le a man ai tlak lo,sipuazii nan thiam tuk,tuhnu kan zuarh ti hlah tbk a tam ngai. The Hakha Post ka zuar ruangah ka ningzah caan a um len nain thatnak tampi zong aka pe ve,media lei rian tuanning le catial ning tampi aka cawnpiak,hawithar tampi aka hmuhter hlei ah laimi kan pa le tampi chonhbiak caan hna a ka pek ve. 

A Sau Khun Mi February Zarhkhat nak:UK Tier 4 student VISA caah a herhmi passport, acceptance letter, bank statement, certificate tbk ka ngah dih hnu ah VISA ka lut. Voidang khuachung kal poah ah bus(lain-kaa) peng in kaa cit nain VISA luhni ah cun ka U Sangcin(tleicia) nih taxi in a ka hlan piak,ka hruk bal lomi necktie he smart ngai in ka thawh. VISA interview cu nazi pakhat deng mang an ka tuah,an ka halmi vial cu tluang tein ka let khawh hna. Interview a ka tuahtu an mithmai tha ngai in ka hmu hna. Ka application cu an headquarters umnak Bangkok ah kuat in zarhhnih chungah result a chuak lai an ka ti.


VISA ka sawk tiangah phaisa ka dih mi tlawm ti lo,kawlram phaisa a tingza in ka dih cang.Phaisa ka dih lawng si loin ka caan,ka ruahnak dihlak pek in ka tuahmi a si caah VISA sungh lai cu ka ruat kho hrim lo. Ka VISA result chuahlai cu kaa ngeih tuk,ka tihtuk fawn.February zarhkhatnak nicaan a kal ning cu a nuar khun in ka rak theih. Zei ka tuah poah ah VISA result lawng ka mitthlam a cuang. 

Ka Lungthli Tum Ka Khen Caan Te: February 6 chun cu zeituah ding um lo caah ka hawipa he Sule ah I chawk ding kan kal,bus a ciat ngai i thutnak kan ting lo. A lin pah ngai. Traders’ Hotel kan phak lai ah ka phone a ra,”Hello,John Lungthli Tum,British Embassy in a si.Na visa result Bangkok in a phan cang,tuchun nazi 4pm hlan ah rak hlam” an ka  ti ko. Ka thinphang a zual,bus in kan tum colh I Strand Road(kannaa road) lei kan ni mer than. Lam ka kal zong kaa thei manh lo,mawtaw lamphiat hna ka rang khun.

Lukmalak ah British Embassy hmai kan rak phan,ka lungtur a zual. Ka result zoh lai cu ka tih bak ko,zoh lai zong ka ngeih tuk fawn. Sungh ko ning law ka nu le ka pa an lungfah lai ka ruah hrim ah ka celh lo.Tlawmpal ah security nih an ka check i a chung ka lut,file an pek, inn chungah zoh rih hlah an ka ti caah inn lengah ka rak chuahpi. 

Alengah cun ka lungchung tein minute pahnih hrawng thla ka cam hnu ah ka file cu ka zoh. Ka passport ka hung kau I a tlakthumnak ah ‘UK Entry Clearance’ timi ka vun hmuh cu ka lawmhnak mitthli a hai,Hakha lei ka nu ka theihter colh.Aa nuamhtuk nak ah tap,holh kho thitha lo tiangin aa lawm ve.A thaizing ah vanlawng ticket ka cawk I February 12 ah ka lungthli tein ka rak ruahchan mi London khuapi ka hung phan ve.


Nikum Bongva Mekazine caah ka rak tial mi a si.!.