Thawngpang Bultan(April 6)

Hakha Mei Peknak Transformer Pahnih Teek Nih A Hrawh Hna: April 1, 4 ah tek nih Hakha mei peknak transformer pahhnih a tlak hna i a kangh hna caah tuhi an remh cuahmah lio a si i Hakha khua Dawr Thar sang le Boyoke lam vialte cu mei an ngah kho rih lo tiah The Hakha Post nih a thanh.

A kanghmi pa 2 lakah pakhat hi cu an ni chiahchungmi pakhat an thlen than colh i a ngah than nain a dang pakhat deuh caah cun thlen ding a um ti lo caah Falam lei an va lak i an rak tlun pi tik cun a ngah colh ve ko lai. Hakha mei petu transformer a vengtu caah teek khamhtu seh zong an bunh ko nain a khamh kho hlei lo ti a si. 

Mindat Ks 1,500 Million An Pek Nain Paletwa Ks 65 Million Lawng An Pek: 2015-2016 phaisa kum caah Chinram chung an budget hman ding pengkip then phawt a si i peng dang tam deuh nih Ks 1,500million an ngah lio ah Paletwa cu Ks 65 million lawng a ngah i MP Lian Cin nih biahalnak zong a tuah tiah The Hakha Post nih a thanh.

Falam peng, Thantlang peng le Mindat peng caah cun Ks 1,500 cio pek a si. Hi kong ah Pu Van Cin nih bia a hal mi cungah Pu Hung Ngai zong nih a sining tha tein a chim ve. Mah Ks 65 million hi an mah Paletwa peng aiawhtu nih an hal mi a si i hiti ai thlau tuk mi cu a phung a si ve lo caah tuaktan than ding a si tiah Pu Hung Ngai nih cun a leh. 

Muslim Pa 3 A Thattu US Pa Thihdan A Ngah Kho Men: North Carolina ah muslim pathum a that tu US pa Craig Hicks cu biaceihzung ah an hung chuahpi i biaceihtu nih thihdan pek a phu tiah a ti tiin BBC nih a thanh. 

A nih hi a bia thuk piin an ceih rih lo, mah muslim pathum hi zeiruangah dah a thah hna timi tha tein an theih khawh hnu ah thihdan pek ding ai tlak le tlak lo biachahnak an ngei te lai. A dang a sualnak zong palik nih an kawl cuahmah rih.

Craig Hicks le a thimi muslim pathum hna hi inn pa an si hna i ruah lo piin an inn ah a rat hnawh hna i meithal in a kah hna ti a si. Mr. Hicks chungkhar nih cun car parking hmunhma ruangah buainak a chuah hi a si an ti. BBC

Bangladesh Ah Thilchia Nih Minung 41 Leng A Thah Hna: Kan hnu zarhteni khan Bangladesh ram thilchia hram ai thawk i tuni tiangah minung 41 leng an thi cang hlei ah minung a za za in hma an hmu i inn tampi zong a hrawh hna tiah VOA nih a thanh. 

A tu thilchia a zualnak hmunhma hi Bangladesh ram chaklei deuh a si i an khualipi Dhaka he 230 km ai hlatnak ah a si. A thi mi tampi hi vampang nih a nenh mi, thingkung nih a nenh mi le electric nih a tlak hnawh mi deuh an si hna ti a si. 


Election Commission Nih Mon Pary A Bia An Ceih Lai: Kan hnu thla ah palik nih  kawlram sianghngakchia pawl an phomh mi hna kong he pehtlai in Mon National Party le Mon hriamtlai phu NMSP nih statement an rak chuah ti mi cu election commission nih an duh lo caah mah kong ceih ding in an auh hna tiah Irrawaddy nih a thanh. 

Election Commission va ton dingah cun MNP lei hruaitu pa 2 thaizing Moleymein kal an ni timh cang. Hiruangah election commission nih MNP dan a tat hna lai maw ti tu cu theih a si rih lo.