Liberal Takmi Rand Paul Nih US President A Cuh Ve Lai: US ram Kentucky state senator a si mi Rand Paul cu a ralaimi 2016 US President thimnak ah kaa cuh ve lai tiah tuni ah a fehter cang.
A nih hi a ruahnak le a poming ai dang ngai. Republican a si ko nain an party lutlai John McCain le Mitch McConnell he zong an ni rem lo. President Obama a policy hrim cu a huat tak tak, mawngtu ngeilo raltuk nak vanlawng US nih a ngei mi zong hi a doh ngai hlei ah FBI nih a thli tein mipi zeidah kan tuah timi a zoh mi 'surveillance' khi a uar lo ngai mi a si. Nain, gay le lesbian thitumnak le pawchung um fa thahnak (abortion) ti bantuk ah cun a lung hak ngai ve mi a si.
Hringtu a pa Ron Paul zong US President caah voi tam ngai aa pe ve nain a rak tling bal lo. A nih hi Republican lei in President ai cuhding a fehter tu a pa 2nak a si. Tuan deuh ah khan Republican Ted Cruz nih a fehter ve. Democrats lei cu a ho hmanh an cawl rih lo, Hillary Clinton hi zumh ngia mi a si. BBC, Yahoo News
US Maryland Ah Pa Fa Minung 8 An Ruak In An Char Hna: US ram Maryland ah pa fa 8 hna cu mei man an pek kho lo i mei an ngah ti lo caah a lummi chuahter nak generator an hmang i cuka in cun thihnak a chuahpi tu carbon monoxide nih a chem hna caah an thi dih tiah BBC nih a thanh.
Athi mi an pa Mr. Todd hi kum 35 a si i a fa le hi pa 2 le nu 5 an si hna. Mei man an pek kho lo caah mei a mit i ngakchia thli lum pek dingah Mr. Todd nih generator a cawk hi a si. Carbon monoxide cu gas phun khat a si i a tam tuk dawp ah cun thihnak tiang a chuah pi kho mi a si.
I Kahnak A Daih Lawngah NCA Min Thut Khawh A Si Lai: Kan hnu thla ah rampumpi huap kahdaihnak (NCA) minthut ding NCCT le UPWC kar hnatlak nak an ngah mi cu kawl ral kap le tlangcungmi hriamtlai phu kar i kahnak a daih hnu lawngah tuah khawh a si lai tiah tlangcung hriamtlai phu komh a si mi UNFC nih an thanh tiah BBC Burmese nih a tial.
A tu lawlawse dirhmun in cun ram chung kahdaihnak a um kho rih lo, a tu le tu in hriamtlai phu he an ni phomh than leng mang lo. Ram pumpi huap kahdaih minthutnak (NCA) hi zeitikdah an tuah te lai timi a fiang rih lo, May thla thawk ah tlangcung hriamtlai phu vialte Wa ram ah tonnak an ngei hnu ah fiang te dawh a si.
Sianghngakchia Nih An Rak Tah Hnawhmi Hluttaw Nih A Pek Cang: Kawlram sianghngakchia nih an mithli he an rak hal mi lakah a biapi bik pakhat a si mi rampi budget 20% cu fimcawnnak ah hman ding timi cu tuni Pyituh Hluttaw nih an fehter cang i Amyotha Hluttaw nih a fehter ve ah cun a nungmi upadi ah a si cang lai.
Rampi budget 20% hi fimcawnnak ah hman ding timi hi kum khat hnu kum khat an kai ter lai i 20% cu kum nga chungah tlinter a si te lai. A dang biapi deuhmi cu University kip ah Students' Union zalong tein ser khawhnak, tlangcungmi holh cawnnak ding le tanghra awnnak mark nih a tlinh lo zongah mah le duhmi University ah admission sawk khawh nak ding hna an si.BBC,RFA
India Palik Nih Mifir 20 An Thah Hna: India ram Andra Pradesh state ah thing man ngei phun khat a si mi Sandalwood an fir nak ah palik nih an kah hna i minung 20 an thi tiah BBC nih a thanh.
Hiti tiang in thah ding an rak timh hna lo nain mah mifir lei nih hreitlung, thingtan le lung hmang in an rak thuat hmasa hna hnu ah hiti tiang in meithal an hmang nak a si ti a si. A thimi 20 chung 12 hi Tamil mi an si caah Tamil Nadu ah cun duhlonak fak ngai in an langhter cang tiah The Times of India nih a thanh.
No comments:
Post a Comment