1 April 2015

Ralkap Zia:Kahdaihnak Kongah Lunghrinnak A Um Than Colh Cang

2nt Left khi Lt-Gen Myint Soe a si. Nizaan MPC thawngzamhnak

March 30 ah ram pumpi huap kahdaihnak minthut ding in NCCT le UPWC nih hnatlaknak an rak ngah i nizaan zong kha kahdaih hnaltaknak draft zong President mithmai ah min an thut. Nain,ralkap nih cun 2008 constitution tang lawngah kahdaihnak kan kal pi lai an ti peng rih ko tiah Irrawaddy le 7Days News nih an thanh. 

Ralkap nih 6 points in kahdaihnak kal pi an duh, mah 6 points chungah hin tlangcung hriamtlai phu nih an cohlang kho bak lo mi hriam chiahter nak 'disbarment' timi a um. Mah six points ningah cun kahdaihnak min thut hnu ah tlangcung hriamtlai phu nih an hriamnam an chiah a hau ding a si. Nain, tlangcung hriamtlai phu nih cun an hal mi 'federal puitling' an ngah hlan lo hriam chiah an timh ve lo. 

Mah hriamnam chiahter nak le ralkap kong hi tuan deuh NCCT le UPWC an rak i chonh ah khan kahdaihnak minthut hnu political dialogue tik lawngah ceih te dingah hna tlak a si. Nain, ralkap cu a lungthul ding ai timh bak rua lo. 

Hi hriam chiahter kong le six points i tlaih peng nak ding kong hi nizaan NCA draft min an thut hnu thawngzamhnak ah ralkap bawi Lt-Gen Myint Soe nih a chim mi a si. NCCT hruaitu Nan Han Tar zong nih fak ngai in a leh ve, kan hal mi 'federal puitling' kan ngah hlan lo hriam kan chiah kho lo tiin. An nih hi hmunkhat te ah thawng a zamh ti mi an si.


Ralkap nih mah six points kan i tlai peng ko lai an ti mi hi tlangcung hriamtlai phu caah cun lung rawk ngai a si. NCA min an thut ding zong hi ruahchannak a tlawmter ngai than. A puitling mi 'federal' an kan pek lo le political agreement ngah hlan ah hriam chiah ding 'order' pek a si ah cun kahdaihnak um kho dawh a si lo. Abik in KNU le KIA cu fawi tein an hriamnam chiah duh dawh an si hrim lo. 



No comments:

Post a Comment