A tu lawlawse election commission ah hin minung 8 an um i kawlmi deuh an si hna. Hiti kawlmi deuh lawng nih kawlram chung election tuanvo an lak hi a dik lo tiin tlangcungmi tam pi nih an rak soisel cang.
A tu tlangcungmi 8 leng an thim than hna hnu cun tlukruannak a um deuh cang lai tinak a si. Nain,mah an thim mi hna hi ralkap party USDP he pehtlainak a ngei ding an si le si lo theih a si lo. President nih a mah duh tein a thim mi an si hna, an min zong a kuat chih cang hna. Hihi parliament nih a fehter hmasa a hau mi a si.
NLD He Pehlainak A Ngeitu Kawl Phungki A Rian Phuah A Tong: NLD he pehtlainak a ngeih lawng si loin ramkhel kong le cozah nih sianghngakchia an phomh ning hna a soisel ngai tu phungki pa Ashin Pyinna Thiha cu kawlram chung phungki phu komh bu State Sangha Maha Nayaka Committee nih phungki phung abuar an ti caah mipi sin phung chim kho ti lo ding in bia an khiah piak cang.
A nih hi phungki pakhat a si ko nain zalong tein biachim a hmang mi a si. 2011 ah US Secretary of State Hillary Clinton kawlram a rak tlawn zongah an rak i tong i cu tlawmpal ah kum khat chung phungchim bar a rak tong bal cang mi a si. Irrawaddy
NCCT le UPWC Nih Rampumpi Kahdaih Hnatlaknak Draft Min An Thut: Kum hnih leng an ni chonh hnu in nizaan ah hnatlaknak an ngah mi ram pumpi huap kahdaih hnatlaknak draft cu NCCt hruaitu le UPWC hruaitu hna nih tuni ah min an thut cang tiah BBC,RFA le DVB nih an thanh.
Ram pumpi huap kahdaihnak minthutnak bel hi cu a cunglei hruaitu hna he an ceih than hnu ah an tuah than te lai. NCCT nih a cung lei biachahnak nawl ngei tu hriamtlai phu an ngei ve bang in UPWC zong nih a cunglei biachahnak nawlngei tu UPCC an ngei ve.
Tutan hnatlaknak draft min an thut mi cu President Thein Sein zong nih a rak tel pi ve hna. Kan mah CNF in Dr. Lian Hmung Sakhong nih min a thut ve.
Iran Nuclear Kong I Chonhnak Ni An Khiah Mi A Luan Cang: US le vawlei ramthawng pa 5 nih Iran nuclear chiahter ding an chonh mi cu tuni March 31 (22:00 GMT) ah a tlangpi in hnatlaknak ngah ding an rak timh nain a tlamtling kho rih lo caah thaizing i chonh than ding bia an khiah.
Tu tiang a ni chonhnak ah cun a tluang ngai rih ko ti a si. Nain hnatlaknak ngah dingah cun a caan tam deuh bel a hau rih rua.
US nih hin Iran hi nuclear hriam ser khawh lo ding in tuah a duh. Nain, Iran nih nuclear hriam sernak ah a biapi bik a si mi Uranium kal tak a duh ve lo, nuclear hriam sernak ah hmang ka timh lo,sii-ai test nak le a dang research tuahnak caah hmang ka timh a ti ve hna. Israel hrim nih Iran kut cungah Uranium a um rih ding hi a tih tuk mi a si.
US Arkansas Nih Soisel A Tong Ngai Mi Indiana Upadi Bantuk An Fehter Ve: Kan hnu zarh ah Indiana state nih gay le lesbian pawl thlendan khawhnak upadi thar an fehter hnu in tuni ah Arkansas state parliament zong nih Indiana upadi bantuk biaknak lei upadi thar an fehter ve cang, governor min thut ding lawng a tang.
Mah upadi thar ning ah cun mi pakhat khat a biaknak he ai kalh mi pakhat khat or business pakhat khat nih a biaknak he ai kalh a ti ah cun gay le lesbian pawl thitumnak tuah piak lo, hmanthlak ding fial zongah tuah piak lo in um khawh a si.
Indiana ah cun mah upadi thar ruangah company tampi nih Indiana ah sipuazi kan tuah ti lai lo an ti. Apple CEO Tim Cook, White House le Hillary Clinton zong nih fak ngai in an rak soisel ve. BBC
No comments:
Post a Comment