NCA Kong Ceih Ding Tlangcung Hriamtlai Phu Conference Ah CNF An Sawm Hna Lo

Laiza Conference

May thla 1-3 tiang Wa hriamtlai phu um nak Pangsang khua ah NCA minthut ding kong  ceih ding tlangcung hriamtlai phu vialte i tonnak conference ah CNF telh in a dang NCCT member a si mi tampi zong an sawm hna lo tiah Shan media a si mi Pinglung Shan Herald thawngzamhca nih a thanh.

Mah conference hi Wa hriamtlai hu UWSA,KIA le NDAA hna nih an tawlrel mi a si. Mah conference a tawlrel tu nih committee an ngei i mah committee nih 'sawm awk a si' a ti mi lawng sawmnak ca an kuat hna hi a si. 'I tel ve dingah nawlnak ca kan hmuh mi zong a um. A si khawh chung in hriamtlai phu pakhat hmanh hrelh lo kan ni zuam lai' tiah UWSA ai-awh biachim tu U Aung Myint nih a chim. 

An sawm lo mi hna lakah NCCT member min lang deuh tampi an ni tel. Arakan Liberation Pary(ALP), CNF, Democratic Karen Buddhist Army(DKBA), Lahu Liberation Union(LDU), Karen Peace Council(KPC) le Wa National Organization (WNO) hna hi sawm an si lo. 


Hiti hriamtlai phu cheukhat an telh hna lo ruangah i theih thiam lo nak a chuak sual hnga maw ti phan a um ngai. Mah an hrelhmi hriamtlai phu hna telh loin NCA minthut kong ceih ding zong a si kho deuh lo mi a si. Zeiruangah dah an sawm hna hnga lo timi hi ruah awk ngai a si ve.

Phung ning tein sawmnak ca an kuat mi hna cu hriam tha deuh a ngei mi phu 12 an si.

Original source ah rel a duh mi nih: Pangsang Summit ‘must include all ethnic armed groups’