Iran Nuclear Deal Kongah Obama Nih Republican 'Nan Luan Tuk' A Ti Hna

Obama party Democrats hruainak in tuthla thawk ah Iran nuclear chiahter ding hnatlak nak an rak tuah mi cu Republican nih an soisel ngai, 'tih a nungmi hnatlaknak a si' an ti len hnu ah Iran Supreme Leader zong nih US a rak thihphaih than caah Obama nih Republican pawl 'kap khat lei lawng in mit an au,an luan tuk' a ti hna tiah BBC nih a thanh.

'Republican pawl nih Iran Supreme Leader cu US zumh lo ding in an forh' a ti hna. 

Iran nuclear deal kongah Obama nih a hrilhfiah mi hnatlaknak(Obama's version) le Iran nih an hrilhfiahmi hnatlaknak(Iran's version) hi ai thlau tuk tiah Republican hruaitu Mr. McCain nih fak ngai in a rak soisel. Ai dan nak pakhat cu Iran cung sipuazi phih piak mi zei tik ah dah dorhpiak a si lai timi hi a si. Iran nih June 30 hnatlaknak min thut le cangka in sanction dorh piak colh ding a ti nain Obama bel nih cun hnatlak nak min thut hnu ah Iran nih Uranium 66% in a zor ter i hihi zohfeltu IAEA nih a fehter hnu lawng ah dorh piak ding a ti ve. Hika ah cun ai kalh ngai tak tak ko. 

Republican senator 47 nih an mah lungthawh in kan hnu March thla zongah khan Iran ralrinnak cakuat an rak pek bal. Hihi Obama nih fak ngai in a soisel,an rian a si lomi an tuan a ti hna. 

US Congress cu Republican nih nikum November thla election hnu khan a control khawh cang i Obama an rengh ngai cang. Thil pakhat khat tuah duh ah Obama duhning in a kal kho ti lo,a si khawh chung in Republican nih an doh ve.(Ai zuam cawhmi Party kar lak ah cun a phung si ve ko).