Myanmar Le Russia Nuclear Kong An Ceih

Nuclear sernak tiah an puhmi khur,Taungkyi pawngah

Myanmar ram nih nuclear thazang hmang in mei(electricity) a chuah khawh nak dingah a herhmi thilri le fimthiamnak pawl bawmhnak kong he pehtlai in Russia nawl ngei tu le Myanmar nawlngeitu hna an ceih ti cuahmah lio a si tiah RFA nih a thanh.

March thla zongah khan nuclear kong ceih dingah Russia lei ai-awhtu Nikolay Spassky cu Myanmar ram a ra cang. Mah pa a rat lio ah Minister Ye Htut nih nuclear thazang hmang in Myanmar ram chung mei chuahter a duh nak kong zong a rak chim cang.


Russia le Myanmar hi 2007 ah nuclear thazang in mei chuah khawhnak 'nuclear reactor' ser ding hnatlaknak an rak tuah cang. A tu zong hi Myanmar mi 300-350 leng Russia ram ah nuclear kong an cawn lio a si. 

Myanmar hi nuclear hriamnam ser a timh, North Korea le Russia nih a herhmi thilri le fimthiamnak an bawm tiin 2009 hrawngah khan thawng a rak leng. Nain, 2012 ah khan Myanmar nih nuclear hriam ser kan timh lo an rak ti cang. 

A tu mei ngahnak caah a hman ding nuclear thazang hi kum tam nawn aa timh ah cun 'nuclear bomb' ah ser khawh mi a si ve.