 |
| Pu Zo Bawi |
Pu Zo Bawi: Hlan ah BEHS No.1(Hakha) ah cachimtu ka rak tuan i cu lio ah 88 buainak a rak chuak. Cu tikah kan inn ah Teacher Union minung 14 in kan rak tuah. Ralkap cozah an rak kai tikah Teacher Union i minung hleili kha ramri kam a harnak ah thial kan si. Kei cu an ka thialnak ah kal ti lo in ka chuak i NLD ah rian ka tuan hi a si.
Post: A dikmi Democracy le Federal State hi zeitindah an i pehtlaih ning a si?
Pu Zo Bawi: A dikmi timi le Federal State cu a phunphun a um nain kannih cu a dikmi Democracy le, Federal State kha kan dirpimi a si ko. A khat ko.
Post: Tu lio thawng a leng ngaimi ah 2015 thimnak ah NLD i tel ding in biakhiah a si rih lo ti a si. Zeitin?
Pu Zo Bawi: Hi kong hi cu a hmanung bik NLD Center Committee tonpumhnak ah USDP pawl an i peknak poah ah a zapi in kan i pe ve lai tiah biachahnak kan ngei cang. Asinain kan ram thil sining cu anmah nih a lu le a taw hi lungfiang lo in an tuah lengmang caah nihin ni tiang ah aa cuh ding palai zong kan i thim rih lo. A fian tik ah kan i thim lai tiin kan ruahmi a si. Thimnak tu ah cun USDP an i peknak poah ah kan i pe ve lai tiah Center nih biachahnak a ngeih cangmi a si.
Post: Nai ah Senthang area an tlawng ti kan theih. Zeitik ah dah nan kal i khua zeizat dah nan tlawn khawh?
Pu Zo Bawi: March 23-28 zarh khat chung kan tlawng. Tlawn dih kan timh hna nain ruah a sur caah Phaizawng le Lungrang kan kal kho lo. Zapi sin biachimnak le biaruahnak zong tlamtling tein kan ngei kho.
Post: EC lei in tah zeizat dah nan kal kho?
Pu Zo Bawi: EC in pali kan kal kho. Peng huap riantuantu in Secretary Pu Sui Thio, Ramkulh Teikhotu Committee in Pu Ni Cung, peng huap EC chung in Nu Sung le keimah kan si.
Post: Tutan ah zeidah biapi in nan kalpi, nan chim?
Pu Zo Bawi: Tutan thimnak hi kan ram caah a biapibik thimnak a si. Cucaah NLD nih USDP an i peknak hmun kip ah kan i pe lai kan ti tikah NLD nih a tei a si ahcun a dikmi democracy, federal state kan phan lai. USDP nih a tei a si ahcun anmah keel an si ko lai timi kha biapi in kan kalpimi kan chimmi a si ko.
Post: NLD nih Chin miphun caah a hlei in biapi nan chiahmi?
Pu Zo Bawi: NLD cu 88 in kanmah policy a um ko. A dikmi democracy, federal state kha kan dir pimi a si ko.
Post: Kan miphun thanchonak ding ah na saduhthah?
Pu Zo Bawi: Pathian thawng in teinak kan hmuh ahcun nihin ah kan Pi (Aung San Suu Kyi) thawng in vawlei cung ramkip ah kalnak kan ngei cang i kan miphun hi ramdang Tlangcungmi federal state pawl an riantuannak le an i timhtuahnak vialte i zohchun in kan ram zong hi tuah ve ding in timhtuahnak kan ngei. A bik in kanmah bantuk in tlang ram a simi Switzerland le New Zealand ram hna an fimthiamnak le chawleh chawhrawlnak (economic) hna kha i zohchunh in, kum zabu 21 ah chawleh chawhrawlnak lei mifim pawl an timhtuah ning tein kalpi kho usih law kan ram hi amah le a phunglam ning tein kan kal khawh a si ahcun Pathian nih thluachuahnak a kan pek lai timi hi kan zumhmi a si.
Post: Tutan ah nangmah tah naa pe (na cuh) lai maw?
Pu Zo Bawi: Tutan cu ka pe ko lai. 2012 By-election zong ah khan kan Pi nih 'nangmah' a ka ti hmasa nain 2015 thimnak tu ah Ramkulh in i pek ding in a ka timh than. Ka thinlung tu cu a ka timh ning in Ramkulh ah i pek dingin timhnak ka ngei ko.
Post: Khoika me hmun in dah naa pek lai?
Pu Zo Bawi: A hmunhma tu cu zeihmanh ka chim kho rih lo. Kan fehter rih lo.
Post: 2010 lio ah nan rak lut lo, atu luh nan i timh tikah hi kong hi rammi sin ah zeitindah fianternak tuah na duh?
Pu Zo Bawi: A si. Kha lio 2010 ah khan thimnak ah a lut ding party poah nih 2008 Phunghram kha kan kilven lai tiin commission nih min nan thut lai ti a si. 2008 phunghram hi cu a dikmi democracy le federal state sinak he aa ralkahmi a si caah mi zapi caah tuahmi si lo in ralkap caah an tuahmi a si kha fiang tein a lang. Kilveng ding in cun min kan thu kho lo. Kilven si lo in upat in zulh ding ti tu in kan remh piak u kan ti i an remh duh lo caah kan luh lonak a si. 2012 caan karlak thimnak ah khan cun 'upat in kan zulh lai, tiin kan in remh piak hna lai i, nan lut lai maw' an kan ti i kan cohlan ve. An remh caah thimnak ah kan lut ve. Federal state kong zong hi Hluttaw kan luh hnu lawng ah kan aupi i, tu cu anmah USDP zong nih federal state kong an chim len vemi hi zapi theih a si ko.
Post: Tutan thimnak hi, that le tluan dawh in na hmu maw?
Pu Zo Bawi: Thimnak hi cu buaibainak a phunphun in an tuah ko lai. Zei bantuk buaibainak a um zong ah kannih nih cun a ningcang tein teinak hmuh kha kan i zuam lai. Hi hna nih ningcang tein an tuah lai maw ti tu hi cu tuak khawh le hngalh khawh a si lo.
Post: A dang chap na duhmi?
Pu Zo Bawi: Hranhram uknak kha democracy ah a thlengtu cu media an si ko. Party kan dirhmun le kan chimmi kha zapi sin thanh khawh lawng ah zapi lung a fiang lai. Kan ram si ning fiang tein an hngalh lawng ah kan ram aa thleng lai. Kan ram thlennak caah a muru tawh tlaitu cu media a si ko. Kan ram thlenremhnak ah media hi nan biapit tuk caah Hakha Post zong thazaang rak chuah chinchin ko uh.
No comments:
Post a Comment