Tunai Hillary Clinton nih 2016 US President thimnak ka cuh ve lai tiah a fehter mi cu US President a tlin tluk in media kip nih thawngzamh cio a si. Tuzarh chung media puitling deuh an cahmai cu Mrs Clinton hmanthlak le a min deuh nih a huh ko hna. Republican nih a control mi Fox News bel nih a chiatnak lei a hung thai leng mang ve.
Obama Le John Kerry Nih An Tanhpi Cang: Nizaan Panama City an tuah mi America continent chung hruaitu pawl i tonnak ah Obama nih Mrs Clinton cu 'US President puitling a si kho lai' a ti cang. John Kerry zong nih ABC News sinah 'hawi tha' a ti ve. Democrats lutlai pahnih nih an hung tanhpi cang hnu cun 'Party nomination' zong fawi tein tling te dawh a si ko. A mah nak in zumh deuh mi Democrats an um ti lo.
Republican An Thin Phang,An Thin Tawi Khun: Mrs Clinton tei ding a har timi cu Republican zong nih an thei fiang tuk cang ko. A si khawh chung in Mrs Clinton a sualnak an kawl,a lam kip in an thuat. Mrs Clinton Secretary of State a rak tuan lio Libya ram ah US Ambassador an rak thahnak, Clinton charity in phaisa an ngahnak, le cozah rian kongah a mah pumpak email a rak hman nak tibantuk ah a sualnak an kawl i a min chiatter an ni zuam.
2012 election lio ah biatak tein Obama a rak zuam cawhtu Mitt Romney nih 'Mrs Clinton hi cu zumh tlak a si lo' tiah Fox News ah tunai te kha a thuat ve. Republican lei aa zuam ve ding Rand Paul le Jeb Bush zong nih an phomh leng mang cang.
Democrats Nih Kum 12 Chung Peh Ding Bel cu US mipi an ii tuk cang sual hnga maw ti mi ruah awk ngai a si. US mipi cu thlennak a uar mi an si caah Republican zong a thawng ngai kho mi a si. Nikum November thla thimnak ah khan Republican an rak thawng ngai fawn caah US mipi nih a minung zoh lem ti loin Republican zong an thim kho mi a si.
Mrs Clinton hi kum 67 a si cang, kum 18 leng US cozah rian lian a rak tuan. A va pa Clinton US President a si chung kum tampi zong White House ah a rak um cang. 2009-2013 tiang US Secretary of State a rak tuan chih caah US ram hruai ning cu thuk ngai in aa fiang mi a si lai.
'American mipi nih ni fatin champion pakhat kan herh,cu champion cu kei si ka duh' Mrs Clinton.
No comments:
Post a Comment