6 April 2015

Tuzarh Ningani Ah Suu Kyi A Hal Leng Mang Mi Six-party Talks An Tuah Cang Lai


Kawlram 2008 constitution remhnak kong ceih dingah Hluttaw le NLD hruaitu Suu Kyi hna nih nikum lei pi in 6-party talks timi nawl ngeitu minung 6 i tonnak an rak hal leng mang mi cu tuzarh ningani ah tuah a si cang lai tiah Pyidawngsuh Hluttaw hotu Thura Shwe Mann nih tuni ah a fehter cang tiah BBC,RFA le DVB nih an thanh.

Hi tonnak ah hin NLD hruaitu Suu Kyi, cozah lei in President Thein Sein, ralkap lei in Min Aung Hlaing, Hluttaw pahnih hotu veve le tlangcungmi ai-awhtu Dr. Aye Maung hna an ni tel te lai. Tutan i tonnak ah zeibantuk agenda dah an ceih lai timi bel cu an chim kho rih lo nain 2008 constitution remh ding kong deuh a si lai, a bik in Suu Kyi kawlram President si khawhnak a khamh tu Article 59(f) hi ceih dawh an si. Suu Kyi nih hihi ka remh piak uh a ti te hna men lai.


Hi six-party talks tuah ding ah ralkap party a si mi USDP MP U Myint Htun nih nikum November 25 ah khan biatung a rak dirh i dohtu um lo zapi hnatlaknak in Hluttaw ah an rak fehter. Nain, President Thein Sein le ralkap lutlai Gen. Min Aung Hlaing nih an rak duh lo caah tu tiang an tuah kho rih lo nak a si. 

Kan hnu zarh Reuters thawngzamhca nih Suu Kyi bia an hal nak ah tukum thimnak hi NLD nih a boycott kho men, Thein Sein zong 2011 lio bantuk in zumh awk a tlak ti lo tiah Suu Kyi nih a rak chim. Hiti a chim hnu tlawmpal ah six-party talks tuah ding an hung fehter tikah Suu Kyi bia nih a hninh pah ko rua hna ti awk in a um. Six-party talks result cu hngakhlang a um ngai ko!  


No comments:

Post a Comment