2008 Ah Obama nih a rak tei mi former Secretary of State Mrs Hillary Clinton cu 2016 US President thimnak ah ai cuh rih lai,hi kong hi tuzarh zarhpini ah a fehter te lai tiah BBC nih a thanh.
Mrs Clinton hi Democratic lei ah cun an zumh bik mi a si. 2008 Obama he an rak i cuh lio zongah khan a rak tling deng mi a si cang.2008 lio a rak palhnak chung in a cawn mi a tam ngai cang lai caah tutan cu a cawlcangh ning zong hawi dang nak in puitling deuh dawh a si.
Democratic lei in Mrs Clinton a zuam cawhtu ding an zumh mi hna cu Maryland Governor Martin O'Malley le a tu Vice-President Joe Biden hna an si. Nain,an mah pa 2 nih cun Mrs Clinton tei kho dawh an si lem rua lo.
Republican lei cu zuam cawh tu tam ngai dawh an si. Tuhi Ted Cruz le Rand Paul nih an fehter cang. President hlun W. Bush nau pa Jeb Bush zong ai cuh ve lai ti a si.
Tlawmpal ah campaign tuah hram an thawk te lai, Democratic lei nih an mah le mah an ni zuam hmasa lai i mipi nih an duh bikmi an thim te lai. Republican lei zong cu thiam thiam. A donghnak ah Republican lei pakhatnak a ngah tu le Democratic lei pakhat nak a ngah tu an ni zuam than lai i a tei mi nih US president a ngah te lai.
Mrs Clinton hi Obama nih Secretary of State a rak thim hnu in vawleipi nih theih ngai mi le uar ngai mi pakhat ah ai chuah,a cauk 'The Hard Choices' timi zong a lar ngai. Secetary of State a rak tuan lio ah cozah he a pehtlaimi email kuatnak ah a mah pumpak email a rak hman caah kan hnu thla hrawng kha soiselnak tampi a chuak ve.
No comments:
Post a Comment