Chin Association For Christian Communication (CACC) hi a min cu kan theih pah dih ngawt lai ka zumh. Nain, zei bantuk rian dah an tuan timi bel a thei rih lo mi kan tam pi rih men lai. CACC hi Laiholh a thancho nak ding lawng ah rian an tuan rua tiin kan ruah cio kho, nain, an rian tuan ning thuk deuh in zoh tikah Chinram caah suttung bantuk an si ti hmuh khawh a si.
Kan nunphung le kan caholh an dirkamh lawng si loin Chin miphun kan i funtom khawh nak caah tiah thlanglei Chinram a si mi Paletwa le Kanpalet hna ah bia tak tein rian an tuan. Paletwa ah sii-dawr an tuah i sii man fawi tein an zuar hlei ah siibawi zong an hlan piak chih hna. Kanpalet ah Victoria Boarding an tuah piak hna i ngakchia 40 leng an zohkhenh hna. Hiti Rakhine le kawlmi nih an dolh deng cang mi hna thlanglei kan unau he pehtlainak an ngei mi hrim hi uar an um tuk.
Kan caholh a thancho khawh nak hnga tiin bible cauk nam, hla cauk chuah le cauk dang le mekazine hna an chuah leng mang. Kan Laiholh tial tikah zulh ding grammar zong an ser i Laiholh thancho ter an ni zuam. Chinmi nih kan zohtla tuk mi Chin Christian College zong an mah tawlrelnak in tuah mi a si. Nikum ah khan hlasak zuam nak 'Chin Idol' zong hlunghlai ngai in an tuah. Tuhi Hakha ah ramkip um Chinmi hna he meeting an kai cuahmah lio a si i CCC zong CCU(university) ah an thlen cang lai tiah The Hakha Post nih a thanh.
Ramkip um Chinmi nih CACC an riantuan nak tanhpi cio hna u sih!
No comments:
Post a Comment