Iran Nuclear Deal Kongah Zarif Nih Obama A Thihphaih Than Hoi Cang

Obama Vs Iran President

Iran Foreign Minister Zarif cu Switzerland ram ah US le ram thawng 5 he a nuclear programme ngolnak kong an ceih i hnatlaknak an ngah hnu in nizaan ah Iran a rak phan than. Iran mipi sin bia a chim lio ah 'Kap khat lei nih hnatlaknak a buar hmasat ah cun hnatlaknak hnon khawh a si' a ti hna tiah The Guardian nih a thanh.

Javad Zarif

Obama a chim ning ah cun economic sanction (sipuazi phihnak) hi June 31 ah hnatlaknak min an thut hnu zongah Iran nih hnatlaknak a zul i hnatlaknak ning tein Uranium a thawnter ning a zor ter deuh hnu lawng ah dorh piak ding a si. Iran nih nuclear hriam sernak caah a biapi tuk mi Uranium a thawnter ning a zor ter(hnatlaknak bantuk in) deuh cang tiah International Atomic Energy Agency(IAEA) nih a fehter hnu lawngah US le EU hna nih Iran cung sipuazi an phih mi dorh piak ding ti a si. 


Nain, Iran nih cun hnatlaknak min thut le cangka in Iran cung an chiahmi sanction vialte an dorh dih a hau a ti. US nih cun 'suspended' a ti, Iran nih 'lifted' a ti ve. Ai kalh ngai. 'US nih an mah duh ning in an chim. Hi kong (sanction dorh piak colh ding) hi John Kerry pumpak sin zongah ka rak al leng mang cang' tiah Zarif nih Fars News Agency sin ah a chim. A chim rih mi cu 'Nuclear programme hi zeitik caan poah ah kan thawk than kho. Theihgalhnak zong kan mah tein kan ngei ko caah a ho hmanh nih an kan lak piak kho lai lo'. 

April 2 ah US hruainak in ram thawng 5(Germany,France, China, France, Russia le UK) hna nih Iran nuclear chiahternak kong ah Iran he hnatlaknak a hrampi in an ngah. Nain, zeitikdah Iran cung an chiah mi economic sanction an dorh lai timi bel ah cun an ruahnak ai kalh ngai,hnatlaknak an ngah rih lo timi hmuh khawh a si.