Ram pumpi huap kahdaih minthutnak(Nation-wide Ceasefire Agreement) cu May thla chung ah tuah kan duh,May thla donghter cu kan duh ti lo tiah CNF Supreme Council member le NCCT chungtel Dr. Lian Hmung Sakhong nih DVB he tonbiaruahnak ah a chim.
An ni ruahmi a kong: Tonbiaruahnak hi minute 18 chung a rau. Zeitikdah NCA minthut ding, NCA minthutnak ah hriamtlai phu zeizah dah an ni tel lai,kahdaihnak minthut hnu kap hnih hriamtlai phu kar zulh ding kong, NCA minthut hnu ceih te ding political dialogue kong hna an si.
A tu an ceihmi peace process hi step 7 a um:
1. Tuthla chungah tlangcung hriamtlai phu tonnak an ngei lai. Cuhnu ah NCA timi ram pumpi kahdaihnak min an thut lai, May thla chungah si te dawh a si.
2. NCA min an thut thlahnih hnu ah political framework timi cabuai cung an ceih ding mi kong an tial lai,a tial tu ah hin hriamtlai phu, cozah le ramkhel party an si te lai.
3. NCA min an thut thla thum hnu ah political dialogue timi cabuai cung ram khel kong ceih tia si te lai,hriamtlai phu le tlangcung ramkhel party hna nih an duhmi an chim lai. A bik in federal kong an ceih te lai.
4. Hriamtlai phu kong a si cang lai. Kawl ralkap Tamadaw nih ramchung ralkap pakhat lawng a um awk a si an ti. UNFC nih 'Federal Army' ser ding an ti ve. An bia hrang pah te dawh a si. Dr. Lian H. Sakhong nih hi kong hi cu 'kum tam nawn a rau te lai' a ti.
5. Political dialogue le hriamtlai phu kong an ceih mi an lim hnu in 'Panglong Agreement' bantuk a biapi tuk mi hnatlaknak pakhat an ser te lai. Hihi cu cozah thar a kai hnu ah si te dawh a si.
6. Step 5 hnatlaknak hrambunh in 2008 constitution an remh or a thar in an tial than te lai. Hi an remh mi or an thar an tial mi constitution hi parliament nih a fehter hmasa lai. Dr. Lain H. Sakhong nih cun 'constitution a thar tial nak in 2008 constitution tu hi remh ah a tha deuh,a him deuh lai' a ti.
7. A cung lei hnatlaknak vialte cu step 7 ah a ho poah nih zulh le tlamtlinter a si lai. Hi step 7 phak ding hi cu cozah term pakhat cu rau rih dawh a si.
No comments:
Post a Comment