U Nu Plan Suai Tam Le A Theipar Ei Awk A Um Lo Ning

British kut in 1948 ah kawlram independence kan ngah hnu in U Nu hruaimi cozah nih plan 'sii-man-king' an suai mi a tam ngai nain ei awk a thei par ngai ngai an chuak kho lo. AFPFL hruaimi cozah nih April, 1948 ah 'Two-Year Plan' an rak ser. Socialist policy an rak i tlaih, private company thazang an rak pe lo,cozah nih company vialte control dih ngawt a si.

Two-year plan cu tha tein an nunter hlan ah Karen hriamtlai phu nih 1949 ah Rangon tiang lak an rak timh caah cozah nih kum hnih chung(1948-50) zeihmanh a rak tuah kho lo. British kut tang ah kawlram a rak um lio 1939 ah kawlram GDP(kumkhat ramchung thil man vialte fonhmi man) Kyat 4,945 million leng a rak si nain 1950 ah cun GDP kyat 3,431 million tiang a rak tla,milu bel cu a rak karh chin. 

April, 1952 ah American engineer le economists thiamsang pawl hmang in 'Eight-year plan' or 'Pyidawtha' plan an rak suai than hoi.Mah 'Pyidawtha' plan hi cu mipi zong nih an rak i ruahchan ngai ve,kum riat hnu ah kawlram chung inchungkhar pakhat nih inn pakhat, mawtaw pakhat, radio pakhat le thla hlawh Kyat 800 ngah ding in rak timh a si. Nain,an ruahning bantuk in thil a kal ti lo caah 1955 ah an hnon than. 

Pyidawtha plan an hnon hnu in 1956 ah a dang 'Four-year plan' an suai than hoi. Nain,mah plan thar zong hi 1958 ah cozah tlai tu AFPFL party an rak i then caah an hnon than ve. U Nu cozah hi plan suai le seih-ku-zin cu a thiam ngai nain a tak tak ah a tuah khawh mi a rak um tuk lo. British kuttang kawlram a um lio 1939 ah kawlram chung per capita income (minung pakhat nih a hmuh mi hlawh) Kyat 302 a rak si nain 1957 ah cun per capita income kyat 247 tiang a tum. 

Rf:
Brown, I (2013) Burma’s Economy in Twentieth Century, Cambridge: Cambridge University Press.

Mali, K.S (1962), Fiscal Aspect of Development Planning In Burma 1950-1960, Rangon: University of Rangon. 

Than, T. T. M (2007) State Dominance In Myanmar: The Political economy of industrialization, Singapore: Institute of South East Asian studies. 

Thein, M (2004) Economic Development of Myanmar, Singapore: Institute of South East Asian studies.