Thanwgpang Bultan(March 22)

Singapore Ram Ceutertu Lee Kuan Yew A Thi Tak Cang: Leitang chuak zeihmanh a ngei lomi Singapore ram vawleicung ram nuam bik pakhat ah a ser kho tu Lee Kuan Yew cu sii-inn ah nitam ngai a um hnu in tunai ah khan a thi cang tiah cozah lei nih an fehter cang. 

Lee Kuan Yew a thih cu Singapore lawng si loin vawlei pi a hninh ko, vawleicung media minthang The Guardian,BBC, New York Times le CNN tbk nih an cahmai pakhatnak ah an langhter cio. Anih hi 1959-1990 tiang kum 31 chung Singapore Prime Minister a tuan mi a si, 1990 hnu zongah nawl a ngei tuk rih thiam thiam.A tu a thih ah kum 91 a si cang.  

Kahdaihnak Kongah NCCT le UPWC I Chonhnak Tlam A Tling Rih Lo: Kawlram chung kahdaihnak a um khawhnak hnga tiin tlangcungmi hriamtlai phu ai-awhtu NCCT le cozah lei ai-awhtu UPWC kar i chonhnak cu March 17-22 tiang an tuah i hnathlaknak tampi an ngah nain NCA minthut ding cu a tlamtling rih lo. 

An ceihmi hi Chapter 7 a um i 7 ning in an ceih khawh cang ko nain biafang hman ding tete ceih than ding a um caah March 30 ah an ceih than lai tiah Dr. Lian H Sakhong nih RFA ah a chim.Hiti ning an kal ko ah cun March 30 ah cun NCA minthut ding hnatlaknak zong ngah dawh an si ko cang. Nain, tuni kawl ralkap le KIA an ni phomh than tiah DVB nih a thanh than mi bel lung a rawk pah ve.

Man U Nih Liverpool An Hmaichia Lak In An Tuah Hna: Tukar Liverpool an hung kai deuh ngai ve nain tuni cu Man U he an cil i Man U nih 2-1 in a thuat hna, an cilnak celhhmun hi Liverpool ta a si fawn caah Liverpool cu an lung a rawk khun lai. 

Tuhi Primier League cu Chelsea nih mark 67 in a pakhatnak ah a um rih, 2nak hi mark 61 in Man City a si i a pathumnak a si mi Arsenal he mark 1 lawng an ni thlau, Man U le Arsenal zong mark 1 lawng nih a dan ve hna.

IS Ralhrang Nih US Ralkap 100 Leng Thah A Timh Hna: IS ralhrang nih US ralkap 100 leng an min cazin le an address hna an website ah an chiah i tlawmpal ah thah ding an si tiah an thanh.

Hiti thihphaihnak hi US ralkap nawlngei tu zong nih biatak tein zohfel an timh, mah min cazin chung ai tel mi zong an um kal i ralrin deuh ding ah ralrin an pek cang hna. IS ralhrang pawl nih cun mah min cazin le an address hna hi computer hack nak in kan ngah mi a si an ti hna. BBC

UK Rammi Doctor 9 Nih IS ralhrang Sin An Ni Fonh Ve: UK rammi muslim doctor 9 cu IS ralhrang bawmh ding ah Syria ram an lut cang i tuhi cu IS ralhrang a um mi si-inn hna ah rian an tuan cang men lai ti a si.

Mah doctors 9 hna hi kum 20 hrawng deuh an si hna, Sudan ram in UK ram ah a rak pem mi an si. An chungkhar nih Syria le Turkey ramri tiang an kal hnawh hna i UK ah rak kir ding an hal len hna nain an chonhbiak kho hna lo.IS ralhrang hi Australia le UK um muslim tampi nih an bawmh peng hna ti a si. The Guardian