Thawngpang Bultan(March 20)

Kawl Cozah An Mual Pho: Acung hmanthlak hi deputy minister Su Su Hlaing nih Kawtaung khua a tlawn lio i a si. Tha tein nan zoh ah cun nithawng nan hmu lai lo,nain nithawng a thladem cu hmuh khawh a si. 

Mah hmanthlak hi Ministry of Information(MOI) facebook page ah an tar i careltu pakhat nih a hmuh i a phawtzamh ve tikah tuhi cu BBC world news le Daily Mail tiang nih an hung thanh ve cang. Facebook hmangtu cheukhat nih cun capo seihnak tiangah an hman hnawh hna. 

Mah nithawng an langhter lo mi hi zeiruangdah a si timi zong MOI lei nih thawng fianhnak an tuah rih lo caah a ruang theih khawh a si rih lo. 

Pu Zo Zam Nih Chinram USDP cozah A Thuat Hna: Tukum tuah ding mi thimnak hnu ah USDP party nih Chinram cozah an ser awk a si ti lo,an tuah hnga ding an tuah mi a tlawm tuk lawmmam tiah Chin National Democratic Pary hotu a si mi Pu Zo Zam nih RFA ah a chim.

Atu Chinram USDP cozah cu an budget tawlrel ning hmanh tha thi in an thiam lo caah hiti Chinram a thancho a nuar hi a si,an mithmai zoh loin(piat-piat-ta-ta) chim ah cun cozah hrim an ser ding a si ti lo a ti hna. Hihi Rangon khua Summit Parkview Hotel ah Chin party 10 leng tonnak an ngei lio ah a chim mi a si. 

Federal Army Kong Cu Kahdaihnak Minthut Hnu Ah Ceih A Si Lai: UNFC nih an hal leng mang mi 'Federal Army' kong cu tutan NCCT le UPWC i tonnak ah ceih a si rih lai lo, kahdaihnak min thut hnu ramkhel kong (political dialogue) ceih tik lawngah ceih te ding in hnatlak a si tiah Dr. Lian H Sakhong nih RFA ah a chim. 

Federal Army hi ralkap lutlai Min Aung Hlaing nih a doh ngai mi a si, ralkap cu i thenthek khawh a si lo a rak ti cang. Nain,kawl ralkap chungah rank sang deuhmi cu kawlmi deuh lawng te an si caah tlangcungmi nih cun kawl ralkap cohlan ding cu a si kho ve hoi lo. 

Tlangcung hriamtlai phu zong hriamnam chiahter cikcek cu an fawi men lai lo,KIA le KNU hna cu an hriam chiah an duh lai zumh a har ngai ko.

Hluttaw Nih Cozah Riantuan Tu Hlawh Kai Ter Ding Cozah An Hal: Kawlram chung cozah riantuan tu hlawh kai ter ding ah Pyidaungsuh Hluttaw nih tuni meeting ah cozah sin hal nak tuah ding hnatlaknak an ngei. 

Zeizah in dah cozah riatuantu hlawh kai ter an duh timi bel cu RFA nih a langhter lo. A tu kawlram chung cozah riantuan dihlak hi 1.4 million hrawng an si i an hlawh caah cozah tangka kyat 2.4 trillion leng hman a si.

Republican Hruaitu Boehner Nih Netanyahu A Va Ton Lai: US House speaker a si mi Republican pa John Boehner nih Israel prime minister term li nak a peh tu ding Mr. Netanyahu ton duh ah Israel kal a timh cang tiah BBC nih a thanh. 

April thla chungah hin tlawn ding ai timh ti a si. Iran kongah US Republican le Israel Prime Minister Netanyahu an ruahnak ai khat mi a si, an pahnih in Iran nuclear kongah Obama a dirhmun hi an doh tuk. Kan hnu March 3 US Congress ah biachim ding Netanyahu a sawm tu zong kha Republican an si.