Canada Pa Senator Ted Cruz US President Ai Cuh Ve Lai: Canada ram ah a chuak i nikum lawngah khan Canada rammi sinak a chuahtak tu Republican senator Ted Cruz cu hmaikum 2016 US President thimnak ah kai cuh ve lai tiin a fehter cang.
Republican party lei in cun a mah lawng nih President i cuh ding a fehter rih,adang zong a tu tlawmpal ah an fehter cio men lai. Ted Cruz hi mi lunghak(conservative) ngai a si, Sep,2013 ah khan Obama nih ngandamnak lei a kalpi ning a rak duhlonak suimilam 21 chung a rak chim,Senate speech lakah a sau bik lei a si.
Anih hi Canada ram ah a chuak nain US ah a um, nikum tiang kha citizenship pa 2 a rak ngei. Tuhi cu Canada rammi sinak cu a kal tak cang. Texas state in 2013 ah Senator ah an rak thim. BBC
Tukum August Dih Hlan Ah Ebola Zawtnak Ci Hmih Cikcek An Timh: Nikum August thla hrawng in a rak zual i vawleicung a kan lauter tu Ebola zawtnak cu tukum August thla dih hlan ah hloh cikcek ding timh a si cang tiah UN ngandamnak lei tuanvo ngeitu WHO nih an thanh cang.
Ebola in a zawmi hi tuhi cu an damh khawh cang hna, zawtnak a karh ning zong a nuar tuk cang. Nikum ah a thi mi an rak tam biknak Liberia hmanh ah zarhhnih ah minung pakhat sin lawngah zawtnak a karh cang caah August thla ah cun hi zawtnak hi a ci mit dawh a si cang ti a si. Tutiang ah hi zawtnak in a thi mi 10,251 an si.
India Le China Ramri Kongah An Ni Chon Than Lai: Kum tampi chung an rak i cuh cang mi ramri kongah India le China i chonh than ding in a tu hi New Delhi ah China lei ai-awhtu Yang Jichie a rak phan i India lei ai-awhtu Ajit Doval he an ni chon lai tiah BBC nih a thanh.
A tu China ram chung um mi Aksai Chin le Ladakhs khi India nih kei mah ram a si a ti ve. Hi ruangah 1962 ah China le India an rak i phomh bal cang,tutiang hi an ni rem kho rih lo. A tu an ni tonnak hi a voi 18nak a si cang lai.
India nih ka ram a si a ti mi Aksai Chin ram hi 37,244 square kilometres a ngan mi a si, Chin state nak in tlawmpal te a ngan deuh.
Hi ramri kong lawng si loin China in chuak a duh mi Tibet ram kong zongah India le China hi an ni rem lo ngai ngai. An ni phomh hnik leng mang. China cozah a dohtu Tibet mi poah cu India nih refugee a pek hna, a ram mi bantuk in sianginn zong a kai ter hna. Tibet mi nih an Pathian bantuk in an ruahmi Dalai Lama India nih a cawm mi hrim hi China nih a duh lo tak mi a si.
Tunisia Prime Minister Nih Palik Bawi 6 An Rian A Phuah Hna: Kan hnu zarh ah IS ralhrang pawl nih Tunisia ram Museum pakhat an rak kah i minung 23 an thihnak ah an daithlang deuh tiin Tunisia Prime Minister Essid nih palik bawi 6 an rian a phuah hna.
Mah mithattu pathum lakah pa 2 cu palik nih an thah khawh ve hna nain pakhat bel cu an kawl cuahmah lio a si. Tlawmpal ah an tlai kho cang lai tiin an zumh.
Tunisia hi beach a tam nak a si caah khual tlawng mi tourist nih vawlei ka kip in an rak panh nak a si. Nain,a tu vanchiatnak an ton hnu cun khual tlawng an zor deuh ngai lai i Tunisia sipuazi zong tla ngai dawh a si. BBC
No comments:
Post a Comment