India Caafir Kong Tukar A Lar Ngai: India ram chung state lakah a si fak bik pakhat a si ve mi Bihar state chungah tanghra caminpuai an phi lio ca an fir mi hmanthlak le video tete internet chung an thlah cio i vawleicung media minthang BBC, The Guardian tbk tiang nih an hung thanh ve cang.
Mah ca an fir mi hi an nu le an pa tiang nih an bawmh hna ti a si. Palik zong nih an control kho hna lo, palik zong phaisa an pek hna i caminpuai phit nak hmun ah an cauk zong an ni put kho ko. Cheukhat cu an hawi or an nu le pa nih thlalang awng in cafir ding an chanh hna. Hika link ah hin rak zoh ve.
China Cozah Nih Reuters Thawngzamhca Website An Block: Reuters thawngzamhca website cu China cozah kong an tial ruangah China cozah nih nizaan ah khan a block piak hna,a tuhi China ram in Reuters website zoh khawh a si ti lo.
China communist cozah chiatnak a chim mi poah cu hiti hin block thluahmah an si ko. Reuters lawng si loin a dang New York Times, Wall Street Journal le Blomberg hna zong tuan deuh ah an block cang hna. Facebook, Tweeter le Youtube hna zong hi China cozah nih an cohlang lo, China ram ah hman khawh a si lo. The Telegraph
Yemen Ram Ah IS Ralhrang Nih Muslim Mi 137 Leng An Thah Hna: Yemen ram ah hmunhma a khur ve mi IS ralhrang 5 nih muslim biakinn mosque bomb an puah hnawh hna i minung 137 leng an thi i adang 345 leng hliam an tong hna.
A thi mi lakah 13 hi ngakchia an si hna. Ralhrang bomb puah tu zong an thi chih. Bomb an puah hlan ah thi ding ai ready cia mi an si. Athi mi hna hi Shia muslim an si hna, IS ralhrang nih Shia muslim hna hi an rem hna lo.The Guardian
New Orleans Airport Ah US Palik Nih Nam Aa Tlaimi Pakhat A Kah: Richard White timi pa nih New Orleans airport riantuan tu hna nam in a zuan hnawh hna caah palik pa nih pistol in voithum a kah i sizung an tlik pi ti a si,a thi hraw lo.
Richard White,62, hi khual a tlawng ve mi a si le si lo timi le zeiruangah dah airport riantuan tu a hliam hna ti zong theih a si rih lo. Khual tlawngmi tampi zong mah pa ruangah aa hliam mi an um len ti a si. BBC
India Tlanglawng Accident Ruangah Minung 34 An Thi: Deradun le Varanasi kar a kal mi tlanglawng cu nizaan ah khan lam a pial sual caah minung 34 leng an thi i minung 50 leng hma an pu.
Hiti lam a pial sualnak a ruang theih a si rih lo. India ah hin tlanglawng accident a um pah lengmang, kan hnu thla zongah Bangalore le Ernakulam kar a kal mi tlanglawng ai let hoi i minung 11 an rak thi cang. BBC
No comments:
Post a Comment