Mah Boko Haram ralhrang tih ruangah February ah tuah ding a si mi election zong an rak tuah kho lo, March ah an rak thawn than. An nih hi al-Qaeda le ISIL ralhrang pawl he pehtlai nak a ngei mi an si. Ralkap minung 10,000 hrawng an ngei lai ti a si. BBC
Tuni EU le UK ah Thlapa Nih Nika A Khuh Lio Hmuh A Si Lai: Thlapa ai hel i nika he a naih bik caan le nika le vawlei kar a um caan 'solar eclipse' timi cu tuni ah UK le EU ram in hmuh khawh a si lai. London in cun 9:30 am GMT ah zoh khawh a si te lai.
Mah solar eclipse hi 1999 hnu in a tu a voikhatnak a si. Hihi 2026 tik lawngah hmuh khawh than a si te lai. Solar eclipse ah cun thlapa kha vawlei le nika kar lak ah a um lai, vawlei in ni kan hmu kho lai lo, suimilam tlawmpal a mui lai ti nak a si. The Mirror
Khualtlung Min Cazin Checknak Upadi Hnon Ding Hal A Si: Kawlram chung ah immigration pawl nih an duh caan poah ah khualtlung min cazin an check tawn mi hi nuhrin covo an buar a si an ti caah Fortify Rights group nih hi phunglam hi hnon dingah hal nak an tuah tiah RFA nih a thanh.
Kawlram ah hin Immigration nih zaan tlai pi zongah an vak i khuatlung min cazin an check tawn,a it cang mi zong an thawh hna i an inn tiang an check piak tawn hna. Mah hi cozah lei nih cun humhimnak caah a si an ti ko nain mipi caah cun hna a hnawk ngai mi a si.
Atu upadi ning in cun riantuan tu nih an mah duh caan poah ah inn pakhat khat khual a ngei le ngei lo check khawh a si. Mi pakhat nih inn dang a riah ah cun a riahnak khua or sang um nawlngeitu sin theihternak tuah a hau ti a si.
Amazon Nih US Ah Thilphortu Vanlawng A Hneksak Khawh Cang Lai: Internet online in thil zuar kho bik a si mi Amazon company nih a thil phor piak tu monghtu ngei lo vanlawng cu tlawmpal ah a hneksak test cang lai ti a si, Amazon in thil cawk mi ngah a fawi deuh cang lai ti nak a si.
Mah vanlawng hman khawh dingah Amazon nih US cozah a hal nak kumkhat deng a si cang nain tu lawng hi test khawhnak nawl an pek hna. Mah vanlawng hi chun ah pe 4,000 tang lawng ah zuan khawh a si. Amazon in thil cawk tikah mah vanlawng fa te nih hin nan inn hmai tiang an rak phorh piak lai ti nak a si. Traffic hna a um lai lo caah rang tein thil cawkmi ngah khawh a si lai. BBC
Muko Mekazine Kum 20 A Tling Ve Cang: Laimi kip nih kan rel mi le pehzulh tein thla thum dan ah voikhat a chuak kho peng mi Muko mekazine cu kum 20 a tling ve cang tiah Muko Editor Joel Ling nih a facebook ah a thanh.
Muko Mekazine hi 1995 ah Rangon khua um Laimi hna nih an rak thawk mi a si. Tuhi thlathum dan ah voikhat peng an chuah khawh. Tutiang Laica in chuahmi Meikazine ah cun rel bik mi le theih bik mi a si.
No comments:
Post a Comment