Kachin ram Maingnii pengah kawl ralkap le Kachin hriamtlai phu KIA an ni phomh than leng mang ko, nizaan zarhpini ah khan cun kawl ralkap nih raltuknak vanlawng tiang in an phomh hna i tuni March 23 zinglei tiang an ni kap peng rih ko tiah BBC le VOA nih an thanh.
Hiti an ni kahnak hi kawl ralkap nih cun phung ning loin tlorthing a phortu khamh ding an timhnak ah KIA he an ni kah sual a si an ti. Kap hnih lei in a thi mi an langhter lo. Rangon ah kahdaihnak kong an ceih cuahmah lio i hiti an ni phomh than leng mang cu lung rawk ngai a si ko.
Rangon ah NCCT le cozah lei an ni chon lio zongah KIA le kawl ralkap cu an rak i kap thiam thiam rih ko. Mah i kahnak kong zong KIA hruaitu nih cozah sin an chim ko nain i kahnak cu a zor deuh hlei lo. Kawl ralkap cu kan hnu zarhpini ah khan PNLA(Pa-o National Liberation Army) he zong voili tiang an rak i kap hoi.
Hiti a cung lei ah kahdaihnak ser ding an ceih cuahmah lio i a tanglei ah an ni kap than leng mang mi nih kaphnih kar i zumh lo nak zong a zual ter kho ngai mi a si. March 30 ah NCCT le UPWC an ni ton than tik tu ah zeidah an lawh te hnga, rampumpi huap kahdaihnak(NCA) zong min thu hna sehlaw i kap than leng mang dawh an si ko rua!
KIA hi U Nu nih 1961 ah Burma ram vialte Buddhist ram ah ser a rak timh hnu in dirhmi a si. 1994 ah kawl ralkap he kahdaihnak min an rak thut nain 2011 thawk in an ni phomh than. An nih hi ral an thawh ka ah cun Independence hmuh ding bak in an rak cawl nain tuhi cu Federal lawng an hal ve cang.
No comments:
Post a Comment