Nigeria Election: Khrifa Pa President Hlun Jonathan Cu Muslim Pa Buhari Nih A Tei Cang

Boko Haram an lor bik nak bik nak le Africa ram oil chuah kho bik tu Nigeria ram election cu ralhrang an tih hna ruangah thlakhat leng an thawn hnu in March 28 ah khan an tuah than, tuni kha vote an rel dih i opposition party leader a si mi Mohammadu Buhari nih President hlun Goodluck Jonathan cu a tei cang. 

A tu tan election hi 1999 ralkap uknak a dih hnu in opposition party APC nih a voi khat an tei nak a si. Jonathan nih a hruaimi PDP party nih tei nak an rak hmuh peng nain tu tan hi cu Jonathan nih ram a hruaining le Boko Haram a tei khawh bak hna lo caah Nigeria mipi nih ralbawi hlun Buhari vote an pek deuh nak a si ti a si. 

Buhari hi muslim a si, 1983 ah Nigeria ram ralkap nih a voi2 nak uknak an rak lak lio ah hruaitu bik a si. 1983-1985 tiang ralkap lutlai (head of state) a rak tuan. Tuhi kum 72 a si cang.

Nigeria ram hi British sin in Independence an rak ngah 1960 hnu ah biaknak pakhat le pakhat kar buainak, mi phun pakhat le pakhat kar buainak tete a rak chuak pah leng mang. Nigeria ram chaklei hi Muslim an tam nak a si i khrifa an him lo ngai. Nigeria ram 49% lawng hi khrifa an si, 48% hi Muslim an si ve. Tutan muslim hruaitu nih teinak a hmuh caah muslim le khrifa kar buainak a chuak kho men ti a si. BBC,CNN,The Independent, Financial Times

Tukum Thimnak Ah Bay-luh-wah Nih Cakei Hla Swe A Zuam Cawh Lai

Amyotha hluttaw MP a si mi Hla Swe cu facebook ah kawlram film industry ah a lar ngai mi capo seih thiam Bay-luh-wah he ui co le meheh bang in an ni thuat leng mang hnu ah Bayluhwah nih a ralaimi thimnak ah khawika hmunhma poah in Hla Swe ka sing-khaw lai a ti cang tiah Irrawaddy blog nih a tial. 

Magwe ramthen USDP MP cakei Hla Swe hi kawl ralkap hlun a si i milung hak tak tak a si. A duh lomi poah cu an mual pho lak in a thuat ko hna. KIA zong kha 'sui kut chanh i an lak duh lo ah cun meithal kuang tu chanh ding an si' a rak ti bal, Suu Kyi zong 'angry bird' tiin fak ngai a rak soisel. Bay-luh-wah he cun facebook ah a tu le tu in an ni thua ko. Minister Ye Htut bantuk in a nih zong hi facebook ta-maa bak a si ve.  


Bayluhwah hi kawlmi nih an tuah mi puai pakhat khat ah bia chim an fial tawn ve i a tu cozah hi fak ngai in a thuat ve tawn hna,a bik in ralkap hi a huat khun hna. A biachim mi pawl zoh tikah mi men te a si lo,pa za ngai a si ve.  

  

Youtube Chung Hla Ngaih Awk Tete

Sui Ngun Rem: I Din Ta Law

Sui Ngun Rem: A Dong Cang

Dawt Hlei Hniang: Welcome To Chinland

Zung Iang: Kan Ngai Tuk Tu Zaan Cu

Dawt Hlei Hniang: Mei Hma Bang 

Thawngpang Bultan(March 30)

US NSA Headquarters Chung Luh A Timh Mi Kah An Tong: Washington khuapi pawng a um mi US ram humhimnak lei vengtu National Security Agency(NSA) headquarters chung hram hram in luh aa timhmi mawtaw cu palik nih an kah i pakhat a thi, pakhat fak ngai in hma a hmu. 

Mah pahnih hi nu thilthuam an ni hruk i tuzing 9am hrawngah mi sawh sawh luh a ngah lo nak NSA campus chung an rak lut, palik nih an khamh len hna nain palik zong an pah chih hna caah hi ti tiangin palik nih an kah beh hna nak a si. An nih hi ralhrang he pehtlainak an ngei le ngei lo theih a si rih lo, an mawtaw chungah ritsi cocaine tu hmuh a si. 

NSA headquarters hi mi sawh sawh nih fawi tein luh khawh a si lo nak hmun a si. Hika campus chungah ralkap riantuan tu 11,000, adang rian sawh sawh tuan tu 29,000 leng an um ti a si. CNN,BBC

Jackie Chan Nih Nungak Dang Fa A Pawiter Nak A Phuan: Jackie Chan nih amah konglam cauk pakhat 'Jackie Chan: Never Grew Up,Just Older'timi a tial i cu chungah 1999 lio nungak dang fa a rak pawiter nak kong hna a tial chih hna. 

A tu a nupi Lin Feng-Jiao he fa pakhat Jaycee an ngei hnu in Hong Kong mintami Elaine Ng cu 1999 ah fa a rak pawi ter i a nupi nih a rak ngai thiam. Hiti thil sual a tuahmi aa ngaichihnak zong a tu a cauk ah tampi a tial. A nungak dang Elaine Ng he an hrinmi a fa zong a nungak deng ve cang, a min ah Etta Ng ti a si. Yahoo! News

Soisel Ngai Mi Indiana Biaknak lei Upadi Thar Remh Than Dawh An Si: Nudawk pa dawk (gay le lesbian) pawl a thleidan kho tu ding upadi thar cu Indiana state parliament nih kan hnu zarh ah khan an fehter i mi tam ngai nih an hung soisel caah a cafang pawl bet chih ding le remh dingah timhtuah nak an ngei cuahmah than cang ti a si. 

Mah upadi thar hi 'religious freedom law' ti a si i mi pakhat khat or business pakhat khat nih a biaknak he ai kalh a ti ah cun gay le lesbian pawl thitumnak tuah piak lo, hmanthlak ding fial zongah tuah piak lo in um khawh a si. Hi ruangah company tampi nih Indiana ah sipuazi kan tuah ti lai lo an ti. Apple CEO Tim Cook zong nih fak ngai in a rak soisel ve. BBC

Mandalay Um BBC Reporter Thawng A Tla Kho Men: Palik nih an tlaihmi sianghngakchia pawl thlah than dingah kan hnu ningani ah khan Mandalay ah mitam pi nih duhlonak an langhter i BBC reporter Nay Myo Lin cu palik pakhat nih ai cit liomi a saikel ning cang loin a tuah piak caah voikhat a thawngh,hiruangah palik nih ta-za cuai an timh ti a si. 

Mah a thawnghmi palik pa cu a mit ah tlawmpal te ai hliam ti a si. Ralkap uknak chan ah cun hiti palik pakhat khat a thi chuah sual ah cun thawnginn kum tampi thlak khawh a si. Irrawaddy

Nika Vanlawng Solar Impulse 2 China Ah A Tum Cang: Nizaan ah kawlram Mandalay in a rak thawh mi nika thazang in a zuangtu vanlawng Solar Impulse 2 cu China ram Chongqing khua ah tluangtein a tum kho cang ti a si.

Mandalay in Chongqing khua tiang hi suimilam 20 chung a rau. Tuhi Chongqing khua ah nikhua a chia ngai caah zeitikdah Nanjing lei a zuang than lai timi theih a si rih lo. Nanjing khua in US ram Hawaii ah ai thawh than te lai i zaan nga le ninga a zuang te lai. 

Hawaii hnu in Phoenix le New York hna ah a rak tangpah te lai i Europe ram pal pah in a khualtlawng ai thawk nak Abu Dhabi ah a kir than te lai. BBC

         

Dr. Salai Ngun Cung Lian Nih Laiholh Tein Tuni Ai Lawmhnak Capar A Tial

CNF caah rian a rak tuan lio!

Tuni NCCT le UPWC kar an ni chonh i ram pumpi huap kahdaihnak minthut ding hnatlak nak an ngah mi cung ai lawmh nak cu Dr. Salai Ngun Cung Lian nih a facebook ah Laica tein a tial, Myanmar Peace Centre ah kawlram level in rian a tuan hnu in Laica in ca a tial bal tuk ti lo nain a tu ah a hung tial than. 

A nih hi 2012 hlan CNF a um lio hrawngah cun Laiforum tibantuk ah Laica tein capar tha tha a kan tial piak tawn i a ca rel zong a rak nuam ngai, Laiforum moderator zong a rak tuan. Nain, 2012 ah kawlram chung kahdaihnak a um khawhnak hnga tiin ramchung a lut hnu in Laimi biaruahnak ah ca a tial bal ti lo, a facebook ah cun a tial pah lengmang nain kawl holh deuh in a tial tawn hna. 

Tuni NCCT le UPWC kar hnatlaknak an ngah mi cu kawlram a kir hnu in ai lawmh bik ni a si ti zong a chim. President Thein Sein le minister U Aung Min upat tlak an si nak zong a chim chih. 

'Hi bantuk in Remnak le Dainak kong ah hin President U Thein Sein hi fak lo awk a tha lo. A bia a nem te na in, a lung a hak taktak mi a si. U Aung Min hi fak lo awk a tha lo. Ni 7 hna meeting a peh in kan tuah zong ah a hmai panh te in a um kho' tiin a facebook ah a tial. 

Dr. Salai Ngun Cung Lian hi nunthap ngamh in Chinram caah kum tampi chung hriam aa tlai mi CNA pakhat a rak si. Indiana University in Doctor of Juridical Science degree a ngah. Tuhi kawlram level in ramchung kahdaihnak a um khawhnak hnga tiin Myanmar Peace Centre ah rian a tuan lio. A nih hi MPC ah riantuan ding 2012 ah kawlram a tlun ah Chinmi cheukhat sin in soiselnak tete a rak tong pah ve. 

A Mual Pho Hnu In Vawleicung A Hung Lar Mi Tawk Tha Kim Kardashian

Kim Kardashian hi mirangholh in chuahmi Mekazine le newspaper a rel pah mi nih cun kan theih dih men lai. Kan nih UK ah cun newspaper le mekazine pawl nih Kim a hmanthlak an chiah lo ah cun an manh lo ngai ti a si. Mekazine kip ah a hmanthlak hmuh khawh a si. A kal nak kip ah reporters pawl nih an dawi i hman an thlak. A pumrua le a tawk that ning cu Lailei holh in chim ah cun number 8 pungsan bak a si ko. 

A nih hi a mui ai dawh,a pum rua a tha nain 2007 hlan ah cun a rak lar tuk lem lo. Nain,a tlangval thing Ray J nih 2003 ah nupa sualnak an rak tuah lio video(sex tape) cu 2007 ah Vivid Entertainment website ah a hung tar hnu in vawlei pi theih mi ah a hung cang. 

A nih hi taklawng in hmanthlak zong a tih lo, a va pa Kanye West zong nih a taklawng a um nak hmanthlak hna Twitter ah a thlah ve leng mang ko.

Ava pa Kanye West he!

Kim cu va pathum ai thleng cang. Damon Thomas he 2000-2004 tiang an ni um, Kris Humphries he 20011-13, Kayne West he tutiang an ni um rih. Danmon Thomas he an ni um lio 2003 ah a mualpho nak 'sex tap' kha Ray J he an rak tuah mi a si, Kris Humphries he an ni um lio 2012 ah a tu a va pa Kanye West nih fa a rak pawi ter ve. Hika Kim Kardashian ah a facebook len khawh a si. Tuhi kum 34 a si i fanu pakhat a ngei.   

       

Thawngpang Bultan(March 30)

Myanmar Times Cartoon Ruangah Kawl Ralkap An Ai Puang: A cung lei cartoon hi kan hnuzarh chuak Myanmar Times thawngzamhca ah an chiah i kawl ralkap a soisel an ti caah ralkap lei nih an duhlonak thawng an thanh tiah DVB le 7Day News nih an thanh. 

Mah cartoon ah hin mi pakhat nih 'ralkap nih tlangthluan pawl an lak khawh cang' tiah mi pakhat nih a chim i a dang pakkhat nih hiti hin a leh 'Lei kuang pawl an lak mi an voi rih lo i a si lai cu'. 

Kawl ralkap nih cun 'thisen le nun thap in ram caah ral kan tu i mipi nih hi dawtnak an theithiam lo mi hi lungfah awk ngai a si' tiin an statement ah an langhter chih. Hi cartoon hi ralkap nih Kokang hriamtlai phu an phomh hna nak kong he pehtlai in suai mi a si. 

Kahdaihnak Minthut Ding Hnatlak A Si Cang: March 17-22 tiang ni 6 chung an rak i chon i rampumpi kahdaihnak minthut ding caah hnatlaknak an rak ngah kho rih lo caah tuni kha tlangcungmi hrimatlai phu ai-awhtu NCCT le cozah lei ai-awhtu UPWC cu Rangon um MPC ah an ni chon than i tuni cu a za tein hnatlaknak an ngah cang ti a si.

Mah an ceihmi ah hin Chapter 7 a um i cacang 33 le caang then 86 an um ti a si. Hi vialte hi hna tlaknak an ngah cang tiah MPC riantuan tu Hla Maung Shwe nih a facebook ah a thanh. Kahdaihnak minthutnak bel cu zeitikdah an tuah lai a fiang rih lo. 

Bangladesh Ah Blogger Pakhat An Thah Rih Hoi: Kan hnu thla ah US khuasa Bangladesh pa Avijit Roy an rak thah,tuni ah a dang blogger pakhat zong Bangladesh thiam thiam ah nam in an thah rih hoi.

An thah mi hi Washiqur Rahman ti a si i zalong tein ca a tial mi a si. Biaknak ah ai hruhpi mi pawl nih cun an rem lo ngai, a tu a that tu zong hi muslim extreme pawl an si lai tiin ruah a si. A thattu tiah an ruahmi minung pa 2 zong palik nih an tlaih cang hna. The Guardian


Singapore Palik nih Lee Kuan Yew Soisel Tu Kum 17 Pa An Tlaih: Kum 17 lawng a si mi Amos Yee cu 'Lee Kuan Yew A Thi Tak Tak Cang' timi Lee Kuan Yew a soiselnak video cu a youtube pape ah a chiah i nizaan ah khan Singapore palik nih an tlaih tiah The Guardian nih a thanh. 

"Lee Kuan Yew hi tih a nung tak tak mi miziachia pakhat a si,a ho poah nih a mah kong chiat an chim ngam lo,aruang cu tlaih an ton lai an tih caah a si. Nain,kei cu ka tih hlei lo' tiin minute 8 a sau mi a video ah a chim. Mah video hi Amos Yee nih a post hnu tlawmpal ah a delete than nain copy cu a um rih. 

Lee Kuan Yew hi Singapore a ceutertu a si nain zalong tein chimrel khawhnak (Freedom of speech) a rak khamh ngai tu a si. Micheu nih cun milung hak dictator phun khat ah an ruah ve.    

    

Thawngpang Bultan(March 29)

Pu Victor Biak Lian le Aung San Suu Kyi An Ni Tong: Tuzan lei Naypyidaw ah Aung San Suu Kyi cu KNU hruaitu le Pu Victor Biak Lian nih suimilam 2 chung an ton i tulio an kal pi cuahmah mi kahdaihnak kongah zeitindah NLD ai tel kho ve lai timi kong, 2008 constitution remhnak kong le tukum thimnak kong hna an ceih.

Hi tonnak he pehtlai in Pu Victor Biak Lian nih 'Dawh Suh hi a voikhat ka hmuh a si,kei mah pumpak ka hmuhning cu ka chim ti lai lo. Kan biaruah a hlunghlai ngai' tiah a facebook ah a tial. Hi hnu zongah i ton than lengmang ding ah hnatlaknak zong an ngei chih ti a si. 

Pu Victor Biak Lian hi CNA ah caan saupi nunthap in a rak cawlcang mi a si. A cauk'Ka Philh Kho Lo' timi zong a rel tu an tam,a rel zong a nuam. A tuhi kawlram daihnak kong ah a cawlcanghtu Euro-Burma Office(EBO) ah rian a tuan. 

Nika Vanlawng Mandalay in China Ah Ai Thawh Than Cang: Ni 10 chung Mandalay ah a cam hnu in nika thazang hmang in a zuang tu vanlawng Solar Impulse 2 cu China ram Chongqing khua ah va tum ding in ai thawh than cang, Chongqing le Mandalay kar hi 1,375 km ai hlat i suimilam 19 hrawng a rau te lai ti a si.

China ah tlawmpal a cam hnu ah US ram Hawaii ah a zuang than te lai, Hawaii lei a zuan tikah cun ninga le zaan nga chung rili cungah a zuang te lai. Cun, US ram Phoenix-New York hna ah ai din te lai i Europe pal pah in zuan hram ai thawknak Abu Dhabi a rak phan than te lai. BBC

Rakhine Hriamtlai Phu AA Le Kawl Ralkap An Ni Phomh Ve: Rakhine hriamtlai phu pakhat a si ve mi Arakan Army (AA) le kawl ralkap cu nizaan thawk in Chinram Paletwa he a naihnak Rakhine ram ah an ni phomh i cozah lei ralbawi pakhat le ral kap pakhat an thi tiah AA hruaitu pakhat nih RFA ah a chim.

Arakan Army hi Kokang hriamtlai phu MNDAA zong bia tak tein a bawmh tu an si. AA hi Col. Min Zan Wai hruainak in 2010 ah an rak dirhmi a si,hriam aa tlaimi ralkap thazang zeizah dah an ngei ti theih a si lo.

Lee Kuan Yew Ruak Thlah Cu A Ropui I Lung A Hmui Hrim Ko: Singapore ram a ceuter tu Lee Kuan Yew,91, ruak thlahnak cu tuni ah an tuah, a ruak hi 15km a sau mi lampi ah an kal pi i minung tingkhat leng nih ruahsur lak ah an mithli he an rak thlah ve. Vawleicung hruaitu tampi zong nih a ruak an rak thlah ve.  

Media kip nih an cahmai pakhatnak ah an tial dih, UK Newspaper lebang ah cun Lee Kuan Yew hmanthlak lawng hmuh khawh a si. Vawlei a hninh ko. Ruak thlah tu an mithli zoh ah lung a hno ngai. 

A nih hi mi lung hak ngai a si, cheukhat nih cun an soisel ngai ve. Prime Minister kum 31 chung a tuan ah zalong tein chimrel khawhnak(freedom of speech) a rak khamh ngai. Hikong ah New York Times nih interview an rak tuah i 'Thil ka rak tuah mi vialte cu a dik thlu ka ti lo,nain ka rak tuah mi thil vialte cu thatnak caah an si dih ko' a rak ti bal. 


Kan Rak Tih Ning Leng In Tih A Nung Deuh Chin Chin: Iran nuclear chiahter dingah US le ram thawng pa 5 hna nih Switzerland ah Iran an chonh cuahmah lio a si, a ni an khiah mi March 31 aa naih cang fawn caah mah hnatlaknak an ngah ding hi Israel nih a rak tih mi leng in tih a nung chin chin tiah Israel Prime Minister Netanyahu nih a zai hnawh hna tiah The Guardian nih a thanh. 

Thaizing kiptuh March 31 ah hin a hrampi in Iran nuclear chiahter nak kongah hnatlaknak ngah ding an si cang. Mah hnatlaknak nih Iran cu nuclear hriam sernak ah a biapi ngai mi Uranium ngeihter khawh dawh a si, mah Uranium ngeih hnu ah cun nuclear hriam ser a fawi ngai caah Israel nih a tih. Iran nih nuclear a ser khawh ah cun Israel map cu vawleicung map in a tlau kho mi a si. 

      

     

Thawngpang Bultan(March 29)

Suu Kyi A Zaw Caah Rangon Lei A Tlung Kho Lo: Kum 70 a si cangmi NLD hruaitu Aung San Suu Kyi cu a ngandam lo nak ruang le ni a linh tuk ruangah Rangon lei rak kir rih loin Naypyidaw tu ah ai din chung tiah Suu Kyi private sibawipa Tin Myo Win nih 7Day daily ah a chim.

Tukar hi Naypyidaw le Rangon ah ni a lin tuk i a leng chuah hi ngandam nak caah tih a nung ngai ti a si. Hiruangah Suu Kyi nih Mon state, Kayin state, Peekhu region le Mandalay region hna tlawn ding ai timh mi zong a rak hnon than ti a si. Hiti a dam lo ruangah Suu Kyi cu kan hnu March 16-23 kar parliament zong a kai kho lo.

Hriamtlai Phu nih Mizoram Palik 3 An Thah Hna: Assam le Manipur ramri ah a um mi Zokhawthiang khua ah Mizoram MLAs pawl khual an tlawnnak ah a zul tu palik pawl cu hriamtlai phu nih an kah hna i pa 3 an thi, 6 hliam hma an hmu tiah The Indian Express nih a thanh.

Mah hriamtlai phu hi Hmar People's Convention(Democrats)HPCD an si lai tiin zumh a si. An nih hi Mizoram le Manipur ah a um mi Hmar miphun vialte an mah dang tein autonomy ngah duh ah hriam aa tlai mi an si. 

Canada Vanlawng A Tumnak Lam A Pial Sual 25 Sizung An Phan: Tuzing ah Air Canada vanlawng cu Canada ram Halifax khua aiport ah a tum i liam a pial sual caah minung 25 leng sizung an kal pi hna, fak tuk in ai khawng mi bel an um hraw lo ti a si. 

Mah vanlawng hi minung 132 nih an ni cit mi a si, a tum ah nikhua a chia ngai. Hawhra hna a tam tuk caah khuaram hmuh a har i hiti lam a pial sual a si lai ti a si.CNN,BBC

2014 Chung Brazil Economy 0.1% Lawng A Ngan Deuh: Vawleicung economy ngan bik 7 nak a si mi Brazil ram economy GDP cu a luancia 2014 chungah 0.1% lawng in a ngan deuh, President Rousseff thutnak a lak hnu in Brazil a thancho a nuar bik kum a si. 

0.1% in GDP a ngan deuh ti mi cu 2014 Brazil ram chung thil chuak mi man vialte fonh dih mi phaisa cu nikum 2013 lio Brazil ram chuak thil vial te a man nak in 0.1% lawng a tam deuh ti nak a si. Brazil ram GDP hi 2010 ah cun 7.5% tiang in a rak thang. 2014 US GDP khi 2013 lio nak in 2.2% a ngan deuh ve. BBC 
       

Thawngpang Bultan(March 28)

Nikhat khat Cu Vawleipi Nih Ka Min An Thei Te lai: Kan hnu nihnihni ah German vanlawng a thlaktu Lutbitz i a nungak thing Maria W cu German thawngzamhca pakhat nih interview an tuah i Mr. Lutbitz nih nikum lei a rak chim mi bia a phuan, Mr. Lutbitz nih 'Nikhat khat cu thil mak ngai ka tuah te lai i vawleipi nih ka min an thei te lai' a rak ti bal a ti. 

Mr Lutbitz hi zaan tim pi zongah mangchia a manh i ai-hram hna a hmang tiah a nungak thing nih cun a chim chih. A nih hi lung nuamh lo lei zawtnak phun khat a ngei mi a si. A rian kongah lung retheih in a um nak a sau ngai ti a si. BBC

Kawl Ralkap Nih Kokang MNDAA, TNLA le KIA A Kah Peng Ko Hna: Tuni March 28 zongah kawl ralkap nih Kokang hriamtlai phu MNDAA a phomh hna lawng si loin Shan state chung um Ta'ang hriamtlai phu TNLA zong a phomh pah hna hlei ah KIA he zong an ni phomh hnik leng mang tiah VOA nih a thanh.

Kokang he an ni kahnak ah cun kawl ralkap lei nunnak a liam mi zong an um i Kokang hriamtlai phu lei in minung pa 4 hliam hma an hmu ve. TNLA he cun tuni nikhat chungah voi 3 tiang an ni kah ti a si. 

Guinea Ram Nih Ebola 'Health Emergency' An Thanh: Guinea ram Ebola zawtnak a karh ning a hung rang deuh ngai than caah hi zawtnak a tam bik nak peng 5 ah 'health emergency' kan thanh tiah Guinea President nih a chim.

Mah 'health emergency' hi ni 45 chung an chiah te lai, mah caan chungah cun duh poah in um kal khawh a si rih lai lo. Guinea bantuk in a innpa Sierra Leone ram zong Ebola a karh ning khamh khawhnak caah ni 3 chung a leng chuak lo in an rak um ve. 


Cozah Nih Kahdaihnak A Kal Pi Ning UNFC nih An Soisel: Shan state le Kachin state hna kawl ralkap nih tlangcung hriamtlai phu an kah than leng mang mi nih a tu lio cozah nih a kalpi mi kahdaihnak minthut ding an ceihmi hi a mui a chiatter tiah UNFC nih statement an chuah. 

Mah an statement ah a tu lio kawl ralkap nih Kokang siseh, TNLA le KIA a kah mi vialte ngol dih ding in an hal chih. Daihnak duhah cun hriamnam in si ti loin cabuai cung i chonh biaknak tu in daihnak ser ding zong an hal chih ti a si. BBC Burmese

   
   

Thawngpang Bultan(March 28)

President Spokesperson U Ye Htut le Eleven Media An Ni Phomh: Nizaan ah khan kawlram chung information lei vuanci+ President ai-awh biachimtu a si mi Minister Ye Htut a IP address cu Eleven Media website chung luh khawh lo ding an rak tuah caah U Ye Htut nih a facebook ah phuang colh. Tuni ah Eleven Media nih an leh colh ve. 

Eleven Media nih an lehnak ah hiti mah IP address an phih piak hi an mah Eleven Media nih an tuah mi a si lo, an website hrawk a timh tu IP address poah American company Cloundflare hmang in phih piak a si nak kong an hung thanh than ve. 

A tu cu a ho nih dah Eleven Media website hrawk a timh peng timi theih a si cang caah Ministry of Information vuanci pakhat dirhmun in dantat ding zong Eleven Media nih U Ye Htut an ti hram hram rih.

US Indiana State Ah HIV A Karh Tuk Caah Emergency An Thanh: US ram Indiana state um Scott county HIV zawtnak a ngei mi an karh tuk cang caah Indiana state Governor Mike Pence nih Public Heath Emergency a thanh tiah BBC le CNN nih an thanh. 

Mah county ah hin kum dangah cun kumkhat ah minung pa 5 sin lawngah HIV zawtnak a karh nain tukum cu a luancia December in tutiang ah minung 79 leng an karh cang. Mah Scott country hi Indiana country lakah a sifak bik lei a si i sii ai chunh mi(drug addicts) pawl nih thim needle an hman ti ruangah hi tiang in zawtnak a karh a si an ti. 

Scott County hi Laimi tam ngai kan umnak Indianapolis thlang lei 87 miles dan ah a um mi a si,suimilam 1:30 chung motor mawngh a si. Indiana hi Laimi kan tam bik nak a si caah i ralring ngai kan hau ve lai. 

Apple CEO Tim Cook Nih $800 Million Charity Hlut A Timh: Atu Apple company lutlai bik CEO Tim Cook nih a ngeih mi phaisa $800 million leng cu ka thih tikah charity sin ka hlut lai tiah Fortune Megazine ah a chim. 

Amah bantuk in vawleicung mirum a si mi Microsoft founder Bill Gates le Facebook founder Mark Zuckerberg zong hi an ngeih mi phaisa 50% tal charity ah pek ding bia khiahnak an ngei ve cang.

Sri Lanka President Thar A Nau Pa Thah A Tong: Tukum January thawk in Sri Lanka President a tuan tu M. Sirisena a nau hniang bik cu an khuami pakhat he bia al nak a um i hreitlung in a lu ah a tuk caah a thi tiah BBC nih a thanh. 

Hiti a nau pa an thah lio ah hin President cu China ram ah khual a tlawn lio a si. Mah President thar hi midang bantuk in a chungkhar caah runvengtu palik zong a chiah hna lo ti a si. 

MPC Hruaimi Youth&Peace Seminar Ah Chin Mino 20 An Kai Ve: Myanmar Peace Centre riantuan tu hruainak in Naypyidaw ah March 28-30 tiang Yount& Peace timi tlangtar in kawlram chung kahdaihnak kong hrilhfiah dingah seminar an tuah i kawlram chung mino tam pi an kai kho, Chin mino 20 leng zong an kai ve.

Mah seminar a kai mi an um kal nak ah a dih mi vialte hi MPC lei nih tuanvo lak piak dih a si lai, an tlun lio le an kir tik zongah vanlawng ticket tiang an cawk piak hna ti a si. Hakha le Thantlang in mino 5 zong an kai kho ve ti a si. Hakha Reporter  
    

Thawngpang Bultan(March 27)

Mitampi Nih Indiana Biaknak Lei Upadi Thar An Soisel: Indiana state parliament nih an chuahpi mi biaknak lei upadi thar cu Governor Mike Pence nih nizaan ah khan min a thut hnu in a nungmi upadi a si cang. Nain, nuhrin covo a aupi tu tampi nih hi upadi nih gay le lesbian pawl a thleidang hna an ti i an soisel.

Mah upadi thar ningah cun mi pakhat khat nih a biaknak he ai kalh a ti ah cun gay le lesbian pawl thil tuahpiak lo in a al kho hna lai. Biana ah, thitumnak a tuahpiaktu company hna nih nu le nu or pa le pa i umnak(sam sex-marriage) hna hi an biaknak he ai kalh an ti ah cun tuah piak lo khawh a si. Nudawk pa dawk a si ve mi Apple Company CEO Tim Cook zong nih a hung soisel len ve. BBC,CNN

Nigeria Ralkap Nih Boko Haram An Headquarters An Lak Khawh: Nigeria ram Gwoza khua um Boko Haram an umhmun ngan bik headquarters cu Nigeria cozah ralkap nih an lak kho than cang tiah BBC nih a thanh. 

Mah Boko Haram headquarters um nak Gwoza hi nikum August thla ah Boko Haram nih an rak lak mi a si. Boko Haram hi 2002 ah an rak dirh i 2009 hnu in nitlak lei Africa ram ah Islam state ser an timh. Tuhi minung thawng tampi an thah cang hna hlei ah ngakchia tampi zong an tlai hna i muslim ah an luhter hna. BBC

Rangtuk In Thlennak Kan Tuah Ah Cun Kan Ni Chuahsual Kho: Hi bia hi tuni a voi 70 nak Tamadaw Day ah ralkap lutlai Gen. Min Aung Hlaing nih a chim mi a si,a duhnak cu kawlram chung thlennak kan tuah mi hi rang tuk in kan tuah ah cun ram pumpi him lo nak hna a chuah pi kho a ti duhnak a si. 

Mah a biachim ah hin tukum election tikah tlangcungmi hriamtlai phu nih vote mee peknak ah hnahnawh lo ding zong warning a pek cia hna, vote thlaknak hna a hnawktu poah cu Tamadaw nih a zoh sawh sawh lai lo a ti hna. Irrawaddy, BBC Burmese

Rual U Nih Hakha Tennis Tual le Motor Mawngh Cawnnak Kong An Ceih Lai: March 28 ah a voi 4nak Rual U civui cu Hakha ah tuah an timh i Hakha tennis tuknak hmunhma le motor mawngh cawnnak tuah ding hna an ceih lai,tuhi ramchung ramleng in upa 50 leng Hakha an phan cang tiah The Hakha Post nih a thanh.   

Tennis tuknak tual cu a tu CCC hmun ah tuah ding ti a si i US lei nih an bawmh hna lai i a zawh lo sual ah cun cozah lei bawmh hal chap a si te lai. Motor mawngh cawnnak tuah an duhnak a ruang cu Hakha ah a felmi motor mawngh thiam an tlawmtuk caah motor mawngh cawnnak a um a herh an ti caah a si an ti. 

Avoi 12nk Chin Baptist Convention BM meeting Hakha Ah An Tuah Lio: A voi 12nak Chin Baptist Convention, BM (Board of Management) meeting cu Sang Ling Memorial Baptist Church, HBA, Hakha ah March 26 in 29 tiang tuah ding a si i, an thawk cang.

Cu meeting ah Chin Baptist Churches, USA i Vice-Chairman a tuan liomi Rev. J. Tial Lian, Associate Executive Minister Rev. Dr. Thlaawr Bawihrin le CBA, North America i General Secretary Rev. Sa Tin Lal an i tel kho. Meeting a kai ding khual 395 lakah 339 an phan. Hlasak thiam Van Dawt Cin le Mai Lal Pek Tluang (Tluang te) an sawm hna. Matupi in hlasa minung 10 zong an rak tlung. The Hakha Post     

Tulio Ceih A Tong Ngai Mi Sui Sui Le A Hla 'I Din Ta Law'

Sui Sui(Sui Ngun Rem) hi a ho set dah a si ti a thei rih lo mi kan tam pi lai nain a hla 'A Dong Cang' timi a ngai bal lo cu kan tam tuk lai ka zum lo. Mah a hla hi 2010 hrawngah a rak lar cang mi a si, youtube hmang kho lomi India le kawlram um tlangval pawl an phone ah hi hla a chiah lomi cu an tlawm ngai lai. A aw ngaih hrim hi a nuam, cim khawh a si bak lo.  

A tu hi 'A Dong Cang' timi nak in ngaih a nuam deuh mi hla pakhat 'I Din Ta Law' timi a hung sa than hoi. Ramthumnak um Laimi hrim nih ngaih nuam phun a si.A tu hi cu a mah pumpak hrim nih zukcawl in a lang. Ngaih a nuam,zoh a nuam fawn.

Hlasak a thiam cu um rih seh, a mui hrim hi ai dawh. Kei lebang cu ka zoh ka ah 'ziah Laihla ah Korea nu hna zukcawl an tuan ter hna hnga' ka rak ti len. 

Sui Sui hi Pu Chan Thang le Pi Hoi Thlia an fa nu a si, 1995 ah Hakha ah a chuak. Tuhi Australia ram Melbourne University ah sianghleirun a kum 2nak a kai lio a si. Hika ah a facebook zong len khawh a si lai.     

Hakha Ah Tlangcungmi Party 22 Leng Tonnak An Ngei Cuahmah Lio

A voi 22nk NationalitiesBrotherhood Federation (Tlangcung Unau Rual Federal Komh Party Pawl) tonpumhnak cu March 27, Hakha HBA Hall ah an tuah lio a si i, 2015 thimnak ah teinak hmuh khawh nakding kong biapi in an ceih. 

Tutan ah NBF chungtel party kip hruaitu minung 45 an ra. Hi NBF tonpumhnak honnak ah Chin Ramkulh Cozah in Zaatlaang lei Vuanci Dr. Ba Maung zong an sawm i biacah chimnak a ngei.

Hi NBF nih an dirpimi biathanh cu a tanglei bantuk in an rak chuah:
 (1) Cozah le Tlangcung hriamtlai kar ah zungzal a hmunmi remdaihnak caah ram pumpi huap kah ngolnak minthut cu a ran khawh chung in tuah i, cu khawh cun ramkheel biaruahnak tuahpiak hrimhrim seh.(2014 July 18) 

(2) Tlangcungmi hna umnak hmun ah Tlangcungmi hna holh le ca cozah sianginn cacawn ding chung ah ningcang tein tuahpiak le cawnternak nawl kan pe seh. (2014 February 2)

(3) 2008 Phunghram remhnak, chapnak le a herh lomi hlohnak tuah in Federal Ramkomh dirh ding. (2013 October 13) 

(4) Buaktlak tuak Kuzale (PR system) cu 2015 thimnak ah me petu ding rammi hna duhnak bang in Ramkulh hmun pawl ah hman a tlak rih lo. (2012 November 11) 

(5) A dikmi Federal Ramkomh a chuah khawh nakding caah NBF nih Democracy phung ning tein a chuah hlan lo kan tuan peng lai.  (2012 April 7) 

(6) Ramchung remdaihnak hmuh taktak nakding caah i kahnak ngol ding in President nih nawl a pekmi kha Ralkap lutlai nih zul in ngai seh. (2012
Agust 19) 

(7) Tlangcung hruaitu pakhat khat kha Amyotha Hluttaw nih Vice President ah thim ding in kan hal. (2011 January 15).


Hi NBF cu 2010 September 18 Yangon ah Nationalities Brotherhood Forum tiin rak dirhmi kha 2013 November 10 ah Nationalities Brotherhood Federation (Tlangcung Unau Rual Federal Komh Party hna) tiin thlen i dirhmi a si. Nihin ah cun Tlangcung party 22 an si cang i, NBF ah Hluttaw Kuzale (159) an si. The Hakha Post
  

Rev. Dr. Rual Uk nih New King James version in a lehmi Baibal Cathiang Japan ah an nam lio

Rev. Dr. Rual Uk nih New King James version in a lehmi Baibal Cathiang Japan ah an nam lio Rev. Dr. Rual Uk nih "Baibal Cathiang" tiin New King James version kha Hakha holh in a lehmi cu 2013 ah a dih, atu hi Japan ah an nam lio a si i, tu kum October thla dih lei ah cun zapi sin ah phanh khawh dawh a si.

"Hi Baibal Cathiang timi hi Mr. Mark (Asia ram i Tribal Christian hna nih anmah holh cio in Baibal an ngeih dih khawh nakding ah tuanvo latu a si) nih a namnak ding tuanvo a kan laakpiak i atu hi Japan ah uk thong kul le thong nga in an nam lio a si. A chuah tikah man lo in zapi sin ah pek a si te lai", tiah a lettu Rev. Dr. Rual Uk nih Hakha Post ah a chim.

Hi Baibal Cathiang kong he pehtlai in a namnak tuanvo latu Mr. David Gotta zong kan hnu March 19 ah Hakha a rak tlung i khuate lei pastor an cahmi pawl hna he tonnak an ngei. Cu pin ah Hakha um khuami cheu khat hna kha Baibal kong he pehtlai in an hmuh ning zong hlathlainak a ngei.

"Hi Baibal Cathiang leh duhnak chan cu, atu kan hmanmi Lai Bible Thiang hi meaning translation (a sullam in lehmi) a si i, atu Baibal Cathiang leh tharmi hi cu word translation (a biafang in lehmi) a si. Cucu aa dan deuhnak a si lai" tiah a lettu nih a chim chap. Hi Baibal Cathiang a lehmi hi kum thum chung rau in a lehmi a si. Atu hi Study Bible zong a tuah lio a si i 2015 kum chungah lim ding in a tuah cuahmah lio a si. The Hakha Post

Thawngpang Bultan(March 27)

Sianghngakchia An Halmi Fimcawnnak Budget Hluttaw Nih A Hnon: Nizaan Amyotha Hluttaw meeting ah sianghngakchia nih an buai hnawh lengmang mi kawlram chung fimcawnnak upadi kong an ceih i sianghngakchia nih an hal mi 77% hrawng cu an cohlang nain adang 23% cu an hnon piak hna,an hnon mi chungah sianghngakchia nih a bik in an hal mi rampi budget 20% cu fimcawnnak caah hman ding timi zong ai tel. 

Sianghngakchia nih Students' Union ser khawhnak, tlangcungmi holh cawn khawhnak le mah le duhmi university ah admission sawk khawhnak ti bantuk hna cu an cohlang ko hna. Fimcawnnak budget zong hi 20% si loin kumkhat hnu kumkhat kai ter deuh ding tiin an thlen mi a si. Irrawaddy, VOA Burmese

Gun Maw Nih 'Kahdaihnak Minthut Men Nih Daihnak A Chuahpi Lo' A Ti:  Kachin hriamtlai KIA an Deputy Chief of Staff Gun Maw cu Irrawaddy thawngzamhca nih interview an tuah i a tu an ceih lio mi kawlram pumpi kahdaihnak kongah hiti hin a chim mi a si. 

Mah interview ah hin KIA hruaitu hna nih President Thein Sein le Min Aung Hlaing an ton kong, a tu lio an ceih cuahmah mi kahdaihnak minthut ding kong, Rangon ah an ni chonh cuahmah lio i an ni kah than nak le Kokang hriamtlai phu kong ah Gun Maw a ruahnak hna an hal. Kahdaihnak minthut NCA hi kawl titoih puai April 17 hnu lawng in kan tuah kho men lai a ti.Tling tein hika rel khawh a si lai.Irrawaddy


Germanwings Vanlawng A Thlaktu Kha Zawtnak A Ngei Mi A Si: Kan hnu nihnih ni ah German vanlawng accident a thlaktu co-pilot Andreas Lubitz kha zawtnak a ngei mi a si i a rian ngeitu(boss) sin ah a chim hna lo tiah a um nak apartment a zohfel tu nih an chim. 

Mah a zawtnak hi zeibantuk zawtnak dah a si timi an thei kho rih lo. An tuaktan nak ah mah pa hi lung nuamh lo zawtnak phun khat a ngei men lai an ti. Ralhrang he pehtlainak a ngei ding phun cu a si lo ti a si. BBC, The Guardian. 
    

India Mi Motorbike Cung Sex An Tuah Ruangah Phaisa An Liamter Hna

India ram Goa state ah nu va hna cu motor saikel in Mandori tiva hlei an tan lio ah sex an tuah i a hmuhtu pakhat nih hman a thlak hna,mah hmanthlak hi facebook ah an hung tar tikah mipi khuaruah har in a chiah hna hnu in India palik nih an hlat hna i phaisa Rupees 1,000 an liam ter hna tiah New York Daily News le Mirror nih an thanh. 

Mah hmanthlak ning in cun saikel mawnghtu pa hi bawngbi zong ai hruk lo, angki le hmawca lawng ai hruk i a nupi hi a hmai lei in a ih ter. Mah hi motor mawnghtu pakhat nih hman a thlak hna i BJP party MP Vishnu Surya Wagh nih a facebook ah a post hi a si.  

Palik nih an hmuh hna hnu in bia an hal hna tikah 'kan tuah ko' an ti i an palhnak an cohlang hnu ah $16 hi an liam ter hna hi a si.  

Kawlram Kum 19 Chung A Uk Tu General Than Shwe A Hung Lang Than

1992 ah Gen. Saw Maung kut cung nawlngeihnak a la i 2011 tiang kawlram a rak mawnghtu Gen. Than Shwe cu President Thein Sein kut cung ah a nawl ngeihnak a chanh 2011 hnu in mit hmuh ah a lang bal ti lo,nain, tuni ah khan a tupa Nay Shwe Thway Aung nih a facebook ah a cunglei hman thlak a tunu nih Ipad hman ning a chimh lio hi a hung tar. 

Hmanthlak a tar nak ah 'Bochoh-hmuci Than Shwe le a Ipad sayama' tiin ca a tar chih. Mah hmanthlak hi tuni chungah minung 4,000 leng nih 'like' an pek, Thein Sein ai-awh biachimtu facebook ta-maa minister Ye Htut zong nih 'like' a pek colh ve. Kawlmi tam deuh an comment zoh tikah chiatnak lei si loin thatnak lei deuh an si. 'Ka pu a nun sau ko seh' a timi an tam ngai hna. 

Than Shwe hi kum 82 a si cang. Anih hi 1990 election lio NLD nawlngeihnak a pe duh lo mi lakah lutlai pakhat a si. Mah 1990 election hi Gen. Saw Maung nih a rak tuah mi a si, Gen. Saw Maung nih cun NLD nawlngeihnak pek ding a rak timh ko nain Than Shwe hruaimi ralkap lunghak deuh pawl nih an rak duh lo i 1992 ah Saw Maung zong a rian an rak thlak ti a si.


Than Shwe hi nikum hrawngah khan a zaw tuk i a thi deng tiin thawng a rak leng pah leng mang. Nain,atu a hmanthlak zoh tikah a sam zong a par tuk rih lo,a mithmai zoh tikah a ngandamnak a tha ngai rih ko ti a lang ngai. Kan mah nih teh 'ka pu na thih tuan seh or na nun sau seh' kan ti ve hnga!  

Thawngpang Bultan(March 26)

German Vanlawng Kha Vanlawng Mawngh Bawmhtu Nih A Thlak Mi A Si: Nihnih ni ah a tla i minung 144 a thah tu German vanlawng kha vanlawng mongh bawmhtu co-pilot nih a thlak hram hram mi a si tiah Black Box a zohfel tu nih an chim. 

Black Box nih record a tuah ning ah cun pilot a leng a chuak i co-pilot kha vanlawng control ding a hal nain co-pilot nih kutka a hrenh khenh hlei ah vanlawng a tum ter ti a si. Vanlawng mawnghtu um nak khan chung ah co-pilot lawng a um, pilot a leng a chuak i a luh than khawh lo nak ding caah co-pilot nih kutka a hrenh khenh i amah nih vanlawng a tlak ter ti nak a si. 

Mah co-pilot hi ralhrang he pehtlainak a ngei le ngei lo theih a si rih lo. Mah co-pilot hi zeibantuk minung dah a si timi an hlat cuahmah lio a si. 

China Ralkap nih Kawlram Ramri ah Ralkap Thazang An Langhter: Kan hnu lei kawl ralkap vanlawng nih China ram bomb a thlak i minung 5 an thih hnu in March 24 ah khan China ralkap nih kawlram ram ri ah an ralkap thazang an langhter tiah RFA nih a thanh. 

Mah ti ralkap thazang an langhter ah hin kawl ralkap vanlawng China ram a rak lut mi zong an thawl len hna ti a si. Kan hnu March 13 ah khan kawl ralkap nih Kokang hriamtlai phu an kah hna nak ah an bomb China ram ah a rak tla sual i minung 4 an thih hnu ah China le Myanmar ramri ah i hmuhthiam lo nak a rak um len. 

President Thein Sein Nih 6-party Talks Tuah Ding A Chim: March 2 ah NLD hruaitu Aung San Suu Kyi le President Thein Sein an rak i ton lio ah President Thein Sein nih Suu Kyi le Parliament nih an hal leng mang mi 6-party talks tuah ding in a chim tiah Aung San Suu Kyi nih RFA ah a chim. 

Mah 6-party talks ah hin ralkap lutlai Min Aung Hlaing, cozah lei in Thein Sein, NLD lei in Suu Kyi, tlangcungmi ai-awhtu pakhat le hluttaw pahnih luttlai ve ve an ni tel lai i 2008 constitution remhnak kong hna ceih ding a si. Suu Kyi le Parliament nih an rak hal leng mang nain Thein Sein le Min Aung Hlaing nih an rak cohlang bal lo. 

Kawlram Chung Thlahlawh Aniambik Ks 120,000 An Khiah Cang: Kawlram chung a niam bik thlahlawh(national minimum wage) cu Ks 120,000 siseh tiah khiah a si cang tiah kawlram chung finance minister nih Pyidawngsuh hluttaw ah a thanh cang. 

A duhnak cu kawlram chung rian a tuan kho mi poah nih thlakhat ah a niam bik kyat 120,000 an hmuh ding a si. Rian petu nih a riantuantu thlakhat ah hizat a pek hna lo ah cun dantat khawh a si lai ti nak a si. 7Day Daily 

Kokang Hriamtlai Phu Hriam An Chiah Ah Cung Ngaithiam An Si Lai: Shan state chaklei a um mi Kokang hriamtlai phu nih 'kan ni ngaichih i kan hriamnam kan chiah cang lai' an ti ah cun lunglawmh tein kan cohlang ko hna lai tiah ralkap nawlngeitu pakhat nih 7Day Daily ah a chim. 

Hriamnam chiah ai timh mi poah nih phone chonh ding in kawl ralkap zong nih phone number an pek cang hna, a phu siseh minung pakhat cio zong in hriam chiah khawh a si lai an ti.  

Chinram Chief Minister Hung Ngai: Chinram Nih Airport Hmang Kho Dirhmun Kan Phan Rih Lo

Kawlram chung media lakah a lar bik pakhat a si ve mi Democratic Voice of Burma(DVB) nih Chinram kan Chief Minister interview an tuah i Chinram nih Airport le University kan ngei rih lo nak kong an hal nak ah a cung lei bia hi a chim mi a si. 

'Airport a um lo tiin an zai cio, Airport hmang kho ding dirhmun hmanh kan phan rih lo buin kan ngeih hrim hrim ding a si tiin au leng mang nak cha cun.....' tiin a leh hna. A tu Falam pawngah an tuah an timh mi zong hi vanlawng ngan mi caah a si lai lo, minung 15 hrawng ai tlum mi a tum khawhnak ca lawng ah a si lai, vanlawng nganmi a tum nak ding cu Kalay le Kyauhphu ah airport a um cang ko a ti hna. 

Chinram ah University pakhat hmanh kan ngei lo nak kongah cun Kalay University tuanbia hna a chim len, Kalay University khi kan mah Chinram caah pek mi a rak si nak le a tu Hakha i College sak an timh cuahmah mi kong hna a chim. Hakha College ah hin Second Year(kumhnihnak) tiang lawng kai khawh a si lai a ti, atangmi kum 2(3rd, 4th year) cu Kalay or Pakhauhku University ah peh te dawh an si.

Part 2 ah hin Hakha vailamtung le Chinram zeitindah kawlram chung sifak bik dirhmun in kan chuah khawh lai timi kong zong tam ngai a chim.      

Thawngpang Bultan(March 25)

Indiana Nih Gay le Lesbian Thleidan Khawhnak Upadi An Fehter Kho: Nizaan Indiana state hluttaw nih 'Religious Freedom' timi upadi an fehter i Governor Mike Pence nih min a thut si cun a nungmi upadi ah a cang lai. 

Mah upadi nih biaknak lei zalonak tampi a pek te lai, minung pakhat khat nih a biaknak he ai kalh mi thil tuah lo nak nawl a ngei lai. Biana ah, thitumnak a tuahpiak tu nih biaknak he ai kalh mi nu le nu or pa le pa i um nak hna tuah piak loin a um khawh. Gay or Lesbian hna an ni thit um tikah hmanthla tu an fial zongah hmanthla tu nih 'ka biaknak he ai kalh caah kan tuah piak kho hna lo' a ti khawh hna.

Mah upadi hi gay le lesbian an nuhrin covo a buar tiin mi tampi nih an soisel, nain biaknak lei a tang deuh mi nih cun 'thil tha tuk' a si an ti ko. BBC,ABC News

US Michigan Ah Ngakchia 2 Freezer Chungah An Char Hna: Michigan state, Detroit khua ah ngakchia pa 2 cu freezer chung ah an ruak in US palik nih an char hna. Palik nih mah a thi mi pahnih u an nu cu an tlaih cang,a mah nih a thah mi an si le si lo cu a fiang rih lo. 

A thi mi hna hi an pahnih tein plastic pakhat ah tem chih an si i mah freezer chungah hin sau ngai chiah an si. Athi mi hi ta far an si i a ta pa hi kum 11, a far nu hi 14 an si hna. BBC

Tukum Kawlram Election Zohfeltu Ah US President Hlun Sawm Lai: Tukum dih lai ah tuah ding mi Myanmar general election zohfel tu ding ah US President Hlun Jimmy Carter le EU an sawm hna lai tiah cozah lei tuanvo ngei tu Minister U So Tin nih RFA nih a chim. 

Tukum election cu kum 65 chung kawlram election lakah a dik bikmi a si lai caah ramleng in zohfeltu tampi sawm an timh hna ti a si. Jimmy Carter hi 1977-1981 tiang US President a rak tuan mi a si. Tuhi kum 90 a si ve cang. 

Actor Kyaw Thu Movie Ai Thla Than Cang Lai: 2001 hrawng kawlram chung film industry ah a rak lar ngai i Academy laksawng tiang a rak ngah tu Kyaw Thu cu kum tam ngai movie ai thla ti lo nain a tu kar movie a hung i thla than cang. Tuhi 'Proffessor Dr. Sate Phwar' timi ai thla cuahmah than cang tiah Irrawaddy nih a thanh. 

A nih hi democracy a au pi ngai mi a si ve,ralkap cozah a rak duh bak lo mi a si. 2007 kawlram chung duhlonak langhter lio zongah khan biatak tein phungki pawl a rak tanhpi hna caah kawlram chung film industry in ralkap cozah nih an rak thawl i movie ai thla kho ti lo, a lak in ruak thlah tu charity a dirh than. 2013 ah khan 'If I Were The President' timi cauk a rak tial i kawlram chung cauk lar bik pakhat ah ai cang ve.  

             

Thawngpang Bultan(March 24)

Tukar Kawl Media le Kawl Mi Nih An Soisel Ngai Mi Birthday Party: Kan hnu zarhteni ah khan kawl ralkap bawi hlun Lt-Gen Tun Kyi a fanu Thi Thi Tun nih Aung San le hawi an rak thahnak hna inn a si mi Secretariat building ah a birthday a tuah i kawlmi facebook hmangtu tampi nih an hung soisel i media kip zongah thawgpang linsa ngai mi ah a hung cang. 

Mah Secretariat inn pi hi mirang chan in cozah zungah rak hman mi a si, kawl ram hruaitu vialte an rak i ton tawn nak a si. Aung San le a cabinet zong kha Independence hlan July 19, 1947 ah hika hmun ah an rak thah hna. Kawlram chung a um mi inn ah cun a biapi bik historical building a si ve.

Hibantuk historical inn private birthday tuahnak caah an hman mi hi kawl mi nih an duh bak lo, President Thein Sein ai-awh biachim tu Minister Ye Htut zong nih a facebook ah a soisel ve len.

Zarhkhat Chung Suu Kyi Parliament A Kai Kho Lo: A ngandam nak lei i zohfel ding le a dang a rian a tam caah NLD hruaitu a si mi Aung San Suu Kyi cu kan hnu March 16 in Hluttaw kai ai din i March 23 ah Pyituh Hluttaw a kai than tiah 7Day Daily nih a thanh. 

March 16 ah Hluttaw a rak kai kho lo caah a dam lo nak a zual ngai caah a rak kai kho lo a si tibantuk bia chawkvai hna a rak um len. Suu Kyi hi 2012 khual a rak tlawn lio dah ti lo cun hitluk caan sau hi ai din bal rih lo. NLD nih cun a tu ai dinhnak hi a dam lo ruangah a si lo, a rian tam tuk ruangah ai din chung mi a si an ti. 

Germany Vanlawng Nih Minung 150 A Thah Hna: Spain ram Barcelona in Germany ram Dusseldorf ah a rak zuang mi Germany vanlawng A-320 cu France ram lungpang lakah a tla i ai citmi 150 an thi dih,a nung mi an um lo.

Tuhi zeiruangah dah mah vanlawng hi a tlak khawh timi theih khawhnak caah vanlawng a um tuning vialte record a tuahtu Black Box zong an hmuh khawh cang,an zohfel cuahmah lio a si. Athi mi tambik hi German mi an si i Spain, Australia, Turkey, Denmark, Netherlands le Belgium mi hna an ni tel ve lai ti a si. BBC,The Guardian

Canada Nih Fak Deuh In IS Ralhrang Phomh A Timh: Syria le Iraq ram ah a lor tak tak mi IS ralhrang pawl cu Canada nih IS ralhrang himnak ngei lo in tuah ding ah Syria ram chung zongah kan phomh cang lai an ti,atu lawlawse cu Canada nih Iraq ram chung longah a thuat rih.

Mah ti Syria ram um IS ralhrang pawl phomh ding le 2016 tiang thuat rih ding timi hi Prime Minister Steven Harper nih a chuahpi i parliament nih fehter ding a si. Opposition party hruaitu nih cun Mr. Harper ruahnak hi an duh lo ngai,nain parliament vote tam deuh cu Prime Minister Harper party an si ko caah fawi tein an fehter ko lai. 

Atu hi Canada nih raltuknak vanlawng 6 le ralkap minung 600 leng hmang in IS ralhrang pawl Iraq ah US ralkap he an phomh cuahmah hna lio a si. BBC

Boko Haram Ralhrang Nih Nigeria Ngakchia 500 Leng An Tlaih Hoi Hna: Nigeria ram Namasak khua ngakchia 500 leng cu Boko Haram ralhrang pawl nih an kal pi hna tiah cuka khuami pakhat nih BBC ah a chim. A tlau mi ngakchia hi kum 11 tang lawng te an si hna.

Nikum zong kha Boko Haram ralhrang thiam thiam nih Nigeria sianghngakchia 200 leng an rak tlaih hna i khrifa a si mi vialte muslim ah an luhter dih hna. Mah an tlaihmi sianghngakchia nu vialte cu Boko Haram ralkap he an ni um dih cang ti a si. BBC