Biadonhnak: Ne Win nih kumhnih chung kawlram a rak hruaihnu in Jan 9,1960 ah rampi election rak tuah than a si. 1960 kawlram election hi kawlram election lak ah a dik bikmi(fairest) a si. 1956 nak in vote thla tu a let in an rak tam deuh. Hi election hi kawlram ah a rak thawng bikmi party (tulio NLD bantuk) AFPFL an ni then hnu voikhatnak a si i U Nu hruaimi Clean AFPFL or Union Party le Kyaw Nyien hruaimi Stable AFPFL hi biatak tein an rak i phomh. Election campaign an tuah lio ah U Nu nih kawlmi vote ngah duh ruangah 'Vote nan ka pek ah cun Buddhist hi kawlram State Religion ah ka ser lai' tiin bia a rak kamh hna(Martin Smith. Burma:Insurgency and the Politics of Ethnicity.P-187).
'State Religion' Buddhism An Sernak Aruang:1960 election ah cun U Nu hruaimi Clean AFPFL nih 57% bak an rak ngah i adang party bawmh hal ho loin cozah an rak ser than. Election campaign lio a biakam bantuk in Buddhism kawlram 'State Religion' ah ser ding biatung cu parliament ah a chuah pi i August 26,1961 ah tlangcung mi an tah buin hlutdaw pahnih nih fehter a si(Hini ah buainak a chuak sual lai tiin ralkap le palik tampi nih parliament a kulh hlei ah rangon khuachung zongah hmuhma an lak cia dih ti a si,nain buainak a rak um hrawl lo).Buddhism kawlram State Religion ah ser a rak duh nak aruang pathum U Nu nih a chim: a mah pumpak hrim nih hi phunglam ser a rak duh tuk 'overpowering disire', kawlram milu tam bik nih an duhpi mi a si fawn,hiti tuah lo ah cun buainak a chuak sual lai ti a phan ruang ah a si(Richard Butwell. U Nu of Burma.P-225).
U Nu hi Buddhist zumhnak ah ai pe tuk mi a si. Next Buddha ka si te lai tiin a rak chim theu. Stable AFPFL hruaitu Kyaw Nyien le Ba Swe he an rak i ral hlan ah 'Kei Buddha ka si tikah ka kehlei le ka orhlei zultu hi nan mah pahnih nan si lai' tiin U Nu nih a rak chim bal ti a si(U Nu of Burma.P-157). May-June,1961 zongah ni 45 chung bak buddhist retreat a rak la ti a si(N. Trager. Burma:From the Kingdom to Republic.P-198). 1968 hrawngah Kyaw Nyien phu nih 'mi hur pa' tiin an rak soisel ko nain U Nu hi 1948 ah sex tuah ti lo ding in bia ai kam cang mi a si,cu ni thawk cun a nupi he inn dang in an um cang. 1949 Karen hriamtlai pawl nih cozah an rak thlak deng lio i Ne Win hruaimi Burma riffles le Chin ralkap hna nih U Nu cozah an rak khamh zong kha U Nu nih 'Buddha sin ka thlacam nak thawng in a si' a ti ve.
Zeitindah Kan Rak Let Cio:1961 ah Buddhism kawlram 'State Religion' ah an rak ser hnu in kawlram a rak kuai dih hnik. Kachin khrifa phu nih Kachin Independence Army an dirh colh,Karen hriamtlai phun an thawng chin chin. Pu Hrang Nawl hruaimi Chin hriamtlai phu zong kha hi 'State Religion' ruang bik ah hriam an rak lak ti a si,Ne Win uknak a lak hnu 1964 ah an rak lang nain(Lian H. Sakhong.The Dynamics of Sixty Years of Ethnic Conflict In Burma.P-6). Shan mi zong Buddhist an tam deuh ko nain an rak cohlang kho ve lo, hriam a tlaimi an rak thawng chin ve,1959 ah Shan hriamtlai minung 800 hrawng lawng an rak um nain 1961 dongh lei ah cun 3,000 tiang an rak karh(U Nu of Burma.P-227). Khat lei ah kawlram first president a si mi Sao Shwe Thaike hruainak in tlangcungmi vialte Taunggyi ah conference an tuah i 1947 constitution federal phung tein remh ding an rak au ve(Kan mah Chin Minister Pu Zahre Lian le adang pahnih bel nih min an thut duh lo).
Federal or Independence:Karen hriamtlai phu KNDO/KTA/KNU ,Kachin hriamtlaiphu KIA, Shan hriamtlai phu Noom Suk Harn/SSIA/SNUF tibantuk vialte hi 'federal' caah ral an rak tho lo, 'Independence' ca hrim ah ral a rak tho mi an si hna. Khatlei raltuk a duhlomi nih cozah he cabuai cung i chonh ding in an rak i zuam ve. Tlangcungmi hriamtlai phu lawng si lo, China communist nih a bawmh mi Communist Party of Burma(CPB) zong hi Karen tluk in an rak thawng ve,cozah thlak khawhnak lam a kawl mi an si. Culio ah China communist a rem lomi Yunnan Muslim ralkap KMT(Kuomintang National Revolution Army) 4,200 nih Shan ram chaklei an rak lak hoi,an nih hi US CIA le Thai Amry nih a bawmh mi an si hna. U Nu zong nih hi KMT hriamtlai pawl thawl piak ding in UN ah a rak hal ti a si(Martin Smith.P-189).
Kawlmi Kar Buainak: June, 1958 AFPFL an rak i then ah cozah ser an rak i cuh, U Nu hruaimi Clean AFPFL nih Mon MP le Arakan MP pawl kha 'kei mah lei nan tangah cun Autonomous State kan pek hna lai' tiin bia a rak kamh hna. 1960 ah U Nu Prime Minister thutnak a lak than tikah a biakamnak tlinter dingah an rak hal ve cang. Kawl mi nih sandah piah an rak thawng tuk lawmmam hoi, Shan ram ah hmunhma a la mi China communist dohtu Muslim hriamtlai phu KMT cu US nih a bawmh ti an theih caah Rangon um US embassy hmaiah US sin duhlonak an langhter i palik nih an then hna ah minung pa 3 nunnak a rak liam(Ibid.). Rangon Okkalapa ah muslim biakinn sak ding cozah nawlpeknak an duh lo caah kawl phungki le kawlmi nih Sep 14,1961 ah sandah an rak piah hoi i minung 5 an rak thi,phungki 92 telh in 279 an rak tlaih hna. Hi an tlaihmi hna thlah than ding in phungki 1,500 leng nih duhlonak an rak langhter hoi i U Nu zong a rian chiah ding tiang an rak fial rih ti a si(U Nu of Burma.P-267).
Kawlram Sipuazi A Tla Rih: 1961 ah thlichia a rak tho i minung 200,000 leng umnak ngeih loin a rak chiah hna hlei ah facang cinnak lei acre 300,000 leng a rak hrawh rih ti a si. Hiti buainak a tam tuk ruangah U Nu cozah cu rampi thanchonak sipuazi lei thazang a pek kho deuh ti lo,thil man a rak kai tuk hoi. Cutikah,1961 kum dongh lei ah cun 'Hriamtlai phu nih kawlram 10%' an lak cang tiin U Nu nih a chim ti a si(The Nation.Oct6,1961.U Nu of Burma ah lak than mi). Hlutdaw zongah U Nu nih 'kawlram nih 16,000 lenng harnak(problems) a ngei,hi vialte phisin dingah kum 20 cu a rau lai' ti tiang in a rak chim. Hiti ramchung a him ti lo hlei ah kum hnih chung a hruaimi 'Caretaker cozah' nih rampi him tein a rak hruai khawh ruangah i ngamh ngai in Ne Win nih March 2,1962 ah uknak a rak lak kha a si, Ne Win uknak a lak hnu in 'State Religion' zong a rak thah than i tutiang hi kawlram nih 'State Religion' kan ngei ti lo. Biadangah,South Korea zong kha May 16, 1961 ah Park Chung-hee nih uknak a rak la ve,Korea bel cu a rak thangcho lei nain kawlram cu a rak tumchuk ai.
Biadonghnak:Kawlram chung kum 60 leng ral kan thawh ning zoh tikah 1947 constitution le U Nu biaknak policy ruang deuh ah a si ti cu hmuh khawh ngai a si. Aung San nih Union of Burma cu 'secular state' ah rak ser a timh i 'unity in diversity' timi policy a rak hman nain ruah lo piin an rak thah caah U Nu nih a mah pumpak duh nak men hoih in Aung San biatiam vialte a rak hrawh dih. Aung San tialcia mi Federal hrambunh 1947 constitution zong a mah duhning in U Chan Htoon a rak tial ter than. 1961 ah Union of Burma cu buddhist ram ah a rak ser rih. Hi hna ruangah tlangcung mi hriam kan rak banh kha a si.
No comments:
Post a Comment