Oil Man A Tlaknak Aruang:A Ho Dah A Sung I A Ho Dah A Miak?

US um ka u pa he kan ni chon i 'US cu datsi man a tla tuk i a nuam ngai, zeiruangah dah hi tluk in datsi man a tla khawh hnga?' tiin a ka hal. Kei ka upa lawng si loin a ho poah nih hi oil man a tlaknak aruang theih kan duh cio lai ka zumh caah ka hung thai ta. 

Economic Theory Nih Cun:

Thil pakhat khat a man a tlak ah cun mah thil thengte kha hmunhma pakhat chungah a tam tuk caah le mipi nih an cawk duh deuh ti lo caah a si ko.Tahchunhnak ah, Mizoram Saiha ah cun zu a har tuk caah kawlram zu OB langkhat khi Kyat 30,000 in kan zuar khawh,nain, Hakha ah cun OB a tam tuk caah langkhat Kyat 1,000 lawng in cawk khawh a si than. A fawibik in chim ah cun, thil pakhat khat a chuak mi a tam deuh tikah cu thil man cu a tum thluahmah, thil pakhat khat a chuakmi a tlawm deuh tikah cu thil man cu a kai chin thluahmah ve. 

Tutan Oil Man A Tlaknak Aruang:

Vawleicung ah oil an chuah mi a tam tuk caah a si ko. US ramchung hrim hrim ah Oil a chuak mi a tam chin leng mang,'Oil shale' timi oil chuah khawhnak khor in US nih oil a chuah mi a tam chin leng mang caah ramdang in oil a caw duh ti lo,amah chuahmi ai rinh khawh cang. Hiti US ramchung oil chuakmi a tam hlan ah cun Middle East ram a si mi Saudi Arabia, UAE le adang OPEC(The Organization of the Petroleum Exporting Countries) ram in US mipi nih ni fatin hman ding oil a cawk tawn nain tuhi cu nikhat hnu nikhat a cawkmi a tlawm chin leng mang cang.

US ramchung oil chuak mi a tam chin lawng si loin Libya ram zong nih oil a chuah mi a tam chin ve i vawlei cung oil market ah hmunhma a hung lak chin ve. Cucaah, vawleicung oil chuak mi a hung tam chin leng mang caah a man zong a hung tla chin leng mang nak a si.   

Europe le China Lei Nih An Cawkmi A Tlawm Chin Ve: European Union chung tel ram pawl an sipuazi a tla hlei ah China sipuazi zong a hung nuar deuh caah oil an cawkmi a tlawm deuh ngai ve, demand a tum tuk kan ti lai cu. Cheukhat a thangcho deuhmi khuapi (London,Beijing tbk) ah cun oil nih thli a hnawmter an ti caah bus le mawtaw tampi ah oil an hmang ti lo, 'hydrogen gas' an hmang cang. Kei zong London ah cun 'Hydrogen Bus' lawng kai cit cang. Hiti oil a hmang mi an tlawm chin caah oil man zong a tlak nak a si. 

Ziah Oil Man An Control Kho Lo?

Iran,Nigeria,Venezuela le Saudi Arabia pawl hi an ram chuakmi oil tal an zuar lo ah cun adang zuar ding an ngei lo tluk a si. Zeitluk oil man a niam zong ah 'oil man a kai lai ka hngak rih lai' tiin an ram chuak oil an zuar lo ah cun an paw tam ko lai,a dang lam in income an ngah nak ding a um tuk lo. Zei he dah ai lo ti ah cun, Lai lei khua te ah zu din duh tuk ruangah saphaw angki hna Ks 1,000 men in pawn bantuk kha a si ko. 

OPEC member a si mi ram 12 nih June 5 ah meeting an tuah lai i hiti oil man a kai mi control dingah an ceih te lai,zei tiang dah an control khawh te hnga ti cu hngak rih a ho ko lai.

Oil man hi June, 2014 ah cun 1 barrel=$110 a rak si nain a tu hi cu 1 barrel=$60 lawng a si cang, 54% bak a tla. Hiti oil man a tla ruangah a dang thil man vial te zong a tum kho ve, a bik in vanlawng ticket man cu tum ngai ve dawh a si.

Western ram um mipi nih a miak an tep lai, abik in US um mi. 

Iran,Nigeria, Venezuela, Saudi Arabia, Russia le a dang OPEC chungtel ram pawl cu tah an duh ko lai.