Wa Miphun Hi Kan Mah Chinmi Zong Nih I Cawn Phu Ngai An Si

Wa ram hi bing cinnak lawngah an vawlei a tha,a dang facang le fangvoi cinnak caah an vawlei nih a pek lo tiin rak theih tawn a si. An pawcamnak caah bing lawng an cing an ti tawn hna nain a tu Irrawaddy nih Wa ram a va kal hnawh i bing ai-awh ah lakphak an cin mi hna hmuh tikah i cawnawk tha ngai an si hna. 

An ram zoh tikah Chinram bantuk a si ve. Rawn a um theng lo,tlang deuh an si hna. An mah Wa miphun bantuk in kan mah Chinmi zong nih bia tak tein lakphak cin i timh ve u sih law kan income hrampi ah aa chuah kho ve ko hnga. 

Kan hnu thla ah VOA nih UWSA aiawh biachimtu U Aung Myint bia an hal lio ah 'Bing kan cing lo,lakphak le rubber lawng kan cin' a rak ti bal cang. Lakphak car(lepheh-chauh) cu an duh tuk,a cawtu an tam tuk i an i ting lo a rak ti bal.

Wa hi kan mah Chinram bantuk in leitang chuak mansung an ngei ve lo,nain lakphak le rubber biatak tein an cing i hriamtlai phu lakah a thawng bik an i chuah hlei ah cozah budget i rinh bak loin an mah tein a nung kho mi an si hna. 

Kan mah Chinram zong nih hibantuk kan tuah khawh mi lakphak cin ti bantuk hi kan i cawn ve a herh ngai ko, Chin ram ah lakphak a tha tuk ko! Hakha siizung thlang lakphak dum hmanh khi tha tein zoh khenh ah cun a thahnem tuk ding a si! 

Lakphak car tuahnak factory

Wa bantuk in lakphak dum tampi ngei kho u sih,a tuahnak factory zong ngei kho u sih law Chin mino tampi rian a pek hna hnga i Chinram thanchonak ca zongah income source pakhat ah aa chuah ko hnga.!.  

 

 

Minung Khuaruahhar In A Tuahtu Cenghngia

Mah a tanglei video hi Ukraine ram nuclear reactor an rak hrawhnak hmun ah a si. Cenghngia nih a kaa khat lak in bread a kalpi nak a si. 

A hak kau tuk kan ti lai maw zei dek. Mah video hi minung million leng nih an zoh cang.

A fox in #Chernobyl with its mouth full of sandwiches is becoming a big hit on the Internet.
Posted by CCTV on Wednesday, April 29, 2015

Baltimore Buainak:A Nu Nih A Fa Pa A Velh Lio Video Facebook Ah A Lar Tuk

US ram Baltimore buainak ah a tel ve mi pakhat pa cu a nu nih a nu nih hiti buainak ah a tel hi a duhpi lo i heh tiah a thloh chih,a nu cu a um kho ti lo caah a bengh pah. 

A fa pa nih a tlik tak len nain a dawi chih. Hi video hi tuni facebook chungah share a tong ngai mi pakhat a si. Mi tampi nih mah nu hi an thangthat cio. 

WATCH: "Are you kidding me!?" -- Amid #Baltimore violence, woman identified as boy's mother comes out and takes a firm stand: http://abcn.ws/1JOcT5o

Posted by ABC News on Tuesday, April 28, 2015

China Ah Sexy Tuk In Thil Hruk An Khamh Hna Caah Model Pawl Lam An Zawh

China ram Shanghai khua ah Shanghai Auto Show timi motor car pawl an manh deuhnak ding caah sexy model pawl an hlan hna i an hnuk tiang langhter pah in an motor car pawl an caw-ngia tawn mi cu tukum tuah than ding an sianh ti hna lo.

Hiti cozah nih a sianh ti hna lo hnu cun hika rian a tuanmi model pawl cu rian  ngei lo ah a ni chuah i ti awk thei lo ah beggar bantuk in lam an zawh hi a si. Lam an zawh nak hi nizaan Xujiahui timi khua ah a si. Shanghaiist

Adrew Chan: Nan Ka Thah Hlan Ah Ka Chungkhar He Biakinn Kal Ta Ka Duh

Bing an phorh ruangah Indonesia cozah nih thihdan a pekmi Australia citizen Andrew Chan le Sukumaram cu April 29 zan ah thah ding an si cang. Australia cozah le a dang nuhrin covo a au pi mi phu tampi zong nih thihdan pek lo ding in Indonesia cozah sin halnak an rak tuah lengmang nain a ngah ti lo.


Andrew Chan nih cun 'an ka thah hlan ah ka chungkhar he biakinn ah kal ta ka duh ko' a ti hna. Sukumram nih cun ka thih hlan chung zuk (pa-ci) hi suai kho peng ka duh a ti ve. Andrew Chan cu a kal nak kip ah bible a philh bal lo,a kut ah bible hmuh khawh peng a si.

An ruak chiahnak ding ruakkuang cu an ser khawh cang. An ruakkuang ah khrifa caah cun vailamtung an tar piak chih hna. 

Andrew Chan le Sukumaram hi an hawi le pa 7 he Bing an phorh ruangah 2005 ah khan Indonesia cozah nih a rak tlaih mi an si. Tuhi thawnginn chungah kum 10 leng an um cang. Daily Mail

Hakha Ka Phan Ve Cang(Part-1)

Kan hngakchiat lio ah hin 'Hakha ka phan ve cang' timi hi a rak lar ngai. Hngakchia tein Hakha a phan mi cu kan rak upat hna i zeihlei thiamsang a ngei bang kan rak tih zah khun hna. Hakha ah sianginn a kai kho mi le bang cu vanmi tluk in kan rak ruah hna, kan thikhat nu pawl zong nih an rak uar khun hna. 

Sianginn ka rak kai timi ka hawi le tam deuh cu tangsarih kan kai ah Hakha an phan pah dih ngawt. Hakha an tlawn lio an hmuhtonhmi tete an chim ah hin kei cu chim awk ka ngei tawn lo i ka rak hngar ngai hna. Laiholh in cafang pakhat an chim kho mi hmanh khi rak tihzah ngai an si(Laiholh hi kawlholh nak in kan rak theih a tlawm deuh, kawl holh cu ralkap le kawl saya sin in theih khawh a si caah mu). Kei zong cu tangsarih kan kai kum October,2004 ah Congthia tiang ka rak phan kho ve. Cu hmanh cu a rak sunglawi ngai, Congthia a phan bal lomi sinah ka experience ka rak chim set ve. 


Tangsarih ah cun kum 14 ka tling ve cang. Ka nu le pa he kan thutti poah ah Hakha kal ding lawng ka rak hal hna. Leiba cawh in ka rak cawh tawn hna. Hakha lei kal an ka sianh lo ruangah rawl ei ka ung zong a rak tlawm ti lo. Calender i timit va, Aung San dum, ralkap tili le Vomthu Maung certual hna ka zoh tawn ah kei mah mit te bak in va hmuh ka duh hna,Hakha hi vanram tluk in ka rak ruah. 

2005 March thla a rak phan. Ka U pa Rangon Thang tanghra phi ding a si. Tanghra a phi mi cu an nu le an pa nih an um pi cio hna caah ka nu le ka pa zong nih va um pi ve lo cu an lung a tha ve lo. Hiti ka pa Hakha kal a timh ka theih le cangka in a thli tein ka timh colh ve. March thla thawk zingka ah cun ka pa cu Hakha lei a rak thawh,zei a thei lo bang ka um ter len ko.Nain,suimilam pakhat hnu ah Hakha lampi cu ka rak zul thluahmah ve........ peh than ding... 

Laitlang Ngaih A Um: Facang Tuh Lio Rak Zoh Ve Uh

Posted by Biak Te on Saturday, April 18, 2015

Laitlang Ngaih A Um: Facang Tuh Lio Rak Zoh Ve Uh

Posted by Biak Te on Saturday, April 18, 2015

Biak Te facebook ah lak mi a si.

US CIA Director Hlun Nungak Ruangah $100,000 An Liam Ter

US CIA director hlun a si mi David Petraeus cu a biography a tial piak tu nungak nu he thuk deuh in pehtlai an ngei hlei ah CIA thil thup tete nungak nu sin a phuan mi a um caah $100,000 dan an tat hlei ah kum hnih chung thil sual tuah lo ding in bia an kam ter(probation ah an chiah).


A tuanbia tialtu nungak nu Paula Broadwell he hin 2011-2012 kar ah pehtlainak an rak ngei hi a si i hiti an ni duh timi mipi nih an theih hnu ah CIA a chuah tak beh nak hi a si. A tu sual an puhmi zong amah nih ‘ka sual ko’tiin a palhnak a cohlang ve.

A nih hi 2007 Iraq ral ah US ralkap hruaitu pakhat a rak si hlei ah Afghanistan ram um US ralkap le NATO ralkap an commender zong a rak si bal.BBC

CNF le biaknak lei riantuan Pastor pawl remdaihnak bia an nih ruah

CNF le biaknak lei riantuan Pastor pawl remdaihnak bia an nih ruah
CNF-Cozah-Mi zapi kar lak ah remdaihnak a sertu bu a si mi Chin remdiahnak sertu committee(CPTC) tawlrel piaknak in CNF le biaknak lei riantuan Pastor pawl cu April 12 chung 12-2 tiang CPTC zung ah ramdaihnak biaruahnak an ngei.


CNF in Pu Solomon nih “ Tu lio tlangcung hriamtlai phu nih kan kal pi mi kadaih biaruahnak kong kan chim. A bik in biaknak lei riantuan tu pawl le mipi hi zeitluk in dah remdiahnak ah a biapi i tangpinak a herh ti mi pawl a si” tiah nihin an nih ruahnak kong cu Hakha Post a chim.

Hi biaruahnak ah CNF in Pu Solomon le Pu Khua Uk Lian nih bia an ruah hna in Hakha biaknak lei buukip in pastor palai pawl an kai kho tiah thawngtheih a si. The Hakha Post

Tangli le tangriat cacawn thannak ni thanh a si rih lo

Tangli le tangriat a sungmi caminpuai phit than ding cu ca chimh than ding a si nain a ni cu tutiang thanh a si rih lo tiah Hakha peng fimcawnnak zung in thawng theih a si.

“Mandalay lei hna cu April 22 in cacawn hram an thawk cang nain kan nih lei hi tutiang zei thawnghmanh theih a si rih lo. A ni caan hna a tlai sual ah cun sianghngakchia caah sunhnak ah um ding a si i thin phang a si” tiah Hakha peng fimcawnnak zung in tuanvo ngeitu Pu Shew Taung nih Hakha Post ah a chim.


Mandalay in an chuah mi Yadanapung cozah thawngzamh ca nih April 22 in cacawmhram thawk a si cang tiah a tial ve.

Hi kong he pehtlai in Hakha Post nih Chin ramkulh fimcawnnak ah thawng va hlet a si tik ah cacawn thannak ding ni cu April 27 in a si lai i phit thannak ding ni cu May 13 ah a si lai tiah cunglei in cathanh a si i peng kip ah cun thawngthanh a si rih lo tiah thawngtheih a si.
Ramkulh dangnak in cacawn thannak ding a tlai deuh mi he pehtlai in Pu Kung Lawi nih “Pengtlang tete ah cazin an palh mi a tam i tutiang feh ter kho a si rih lo. Hi ruang ah hin a si kho” tiah Hakha Post ah a chim. The Hakha Post

Ni cain hlawh pekmi cachimtu pawl rian pek an si cang lai

Tangli(primary) sianginn pawl ah ni cain rian a tuan mi cachimtu pawl cu rian pek taktak a si cang lai tiah Chin ramkulh fimcawnnak zung in thawngtheih a si.


Hakha peng fimcawnnak zung in cazi 2 Pu Shew Taung nih “ Ramkulh fimcawnnak zungin ca an kan pek dih cang. Chin ramkulh in ni cain rian a tuan mi poah cu rian pek dih a si ko lai” tiah Hakha Post ah a chim.

Hi rian peknak ding ah tangli sianginn pawl i cachimtu pawl cu May 4-31 tiang an umnak peng kip ah training kai hmasa a si lai i cu hnu cun rian pek a si tiah thawngtheih a si. 

Ni cain timi cu cozah nih rian a pek hna hlan ah loh-aa-pee in a tuan mi an si hna. The Hakha Post 

US Ralkap Nih US Citizen Pakhat le Italy Pa Pakhat An Thah Sual Hna

Aluancia January ah khan Afghanistan le Pakistan ramri ah US ralkap nih al-Qaeda ralhrang hruaitu pawl an phomh hna lio ah al-Qaeda nih an tlaihmi US pa Weinstein le Italy pa Lo Porto zong an thah chih sual hna tiah President Obama nih ngaihchiatpi nak he thawng a thanh tiah BBC nih a thanh. 


Mah an phomh lio hna ah hin al-Qaeda hruaitu lutlai pa hnih zong an rak thah khawh hna hlei ah al-Qaeda ah a lut ve mi US citizen pahnih zong an thah chih khawh hna ti a si. 

Obama nih hiti US pa le Italy pa an thah sual hna nak ah a ngaihchiatnak le a lungnuamh lo nak zong a langhter ve. 

A thimi US pa Weinstein, 72, Pakistan ram Lahore a um lio 2011 ah ralhrang nih an rak tlaih mi a si. Italy pa Lo Porto,39, zong hi Pakistan ram 2012 ah ralhrang al-Qaeda nih an rak tlaih mi a si ve.   

Tlangcungmi Party An Zia A Tam Ve Ning Hi,Dr. Aye Maung Nih A Kan Aiawh Lo An Ti Hoi

Parliament ah MP 159 hlei a ngei mi tlangcung party phu 21 an i komhnak bu NBF (Nationalities Brotherhood Federation) nih tuni ah cathluan an chuah ve i Myanmar hruaitu 6 i tonnak ah tlang cungmi aiawh in Dr. Aye Maung ai tel hi kan mah a kan ai-awh kho lo an ti ve.


Nizaan ah khan Khun Htun Oo hruaimi SNLD nih NBF bantuk in an zia an rak chuah ve cang. Tuhi NBF nih cun SNLD a zia an ni cawn ve rua. 

Tutan an cathluan ah Dr. Aye Maung hi NBF nih kan thim mi a si lo, Pyidawngsu Hluttaw (Amyotha +Pyituh hluttaw) um tlangcung MP cheukhat nih an thim mi a si an ti.

Zeiruangah dah hiti statement an chuah hnga timi hi ruah awk a har ngai, thahnemnak zong a chuah pi lem lai lo dah. Pakhat le pakhat i theithiam lo nak lehlam a chuah pi deuh lai,ka ti.   

KIA nih Kawl Ralkap An I Citmi Motor Bomb An Puah Hnawh

Kachin News

Kachin ram Hpakant peng Duanbain khua pawngah kawl ralkap an i cit mi motor pakhat cu Kachin hriamtlai phu KIA nih bomb an puah hnawh hna i a thi mi an um le um lo theih a si lo nain kawl ralkap pakhat cu fak ngai in hliam hma a hmu tiah RFA nih a thanh.

Hiti bomb an puah hnawh hna hnu in kap hnih kar i kahnak zong a zual deuh ngai ti a si. Hiti an ni kah than leng mang mi a zor deuh nak ding caah kap hnih kar i tonnak cu tuan tein Myitkyina ah tuah an timh nain April 27 lei ah an thawn than caah i kah rih lengmang dawh an si.


KIA lawng si loin Kokang hriamtlaiphu MNDAA le Rakhine hriamtlai phu AA he zong tukar an ni phomh ning a fak chin leng mang ko. MNDAA he cun tuni zong ah voi tam ngai an ni phomh ti a si. 

Kawlmi Lakah A Lar Ngai Mi Chinnu Sexy Model Hanny Kim

Hanny Kim hi kan mah Laiholh a hmangmi tam deuh nih cun kan thei bal theng lai lo dah. Kei zong ka hawipa nih nizaan ah khan 'Chinnu sexy model Hanny Kim he khan nan ni thei maw' a ka ti le 'ka thei bal lo' tiin ka leh. A ka zumh lo, hitluk a lar mi mah miphun hmanh theih lo cu a ka ti len. 

Sexy model hi model phun khat a si ve ko. Vawleicung model minthang tampi khi sexy tak in an um hnu ah a lar mi an tam ngai hna, a tu UK le US um mekazin vialte ah an cover photo bantuk in an hman mi Kim Kardishian te pawl zong khi an taklawng hmanh in hman ai thla mi an si. C. Ronaldo a darling nu Irina Shayk zong cu thiam thiam. Nain,kan mah Chinmi mit le kawlmi mit bel ah cun sia aa rem deuh tawn rua lo(kan zoh duh ngai cio ko nain, hehe). 


Hanny Kim hi a konglam fiang tuk in ka thei lo. Kawlram ah a thangmi si dawh a si. Singapore ah um pah ve rua,a hmanthlak zoh tikah Singapore ah sau ngai a um mi a lo ngai. A min hi 'Kim' timi ai tel caah Tedim lei Chimi si dawh a si. A facebook rak leng cio ve uh. Hanny Kim  

Tonzang Khua Ah Kawl Palik Pa 2 Nih Chin Nungak No Te An Tlaihrem

Tangriat a kai lio mi kum 15 lawng a si rih mi Tonzang khuami nungak no te cu April 11 ah khan kawl palik pa hnih nih motor cycle in a u nu sin kal pi ding an rak auh nain a dang hmun ah an kal pi i an tlaihrem beh tiah Chinland Guardian nih a thanh.


Mah palik pa hnih hi tlaihrem a tongmi a u nu a va pa i a hawi le an si hna. An kal pi ning zong hi a u nu sin kal pi ding ah an auh i a dang hmun ah an kal pi hi a si. 

Hiti an tlaihrem hnu ah palik hna cu thawnginn luh lai an tih caah an tlaihhremmi chungkhar cu phaisa ting sawm thum pek ding ah April 15 ah khan an rak nawl hna nain an chungkhar nih an cohlang lo, upadi ning in bia ceih ding ah palik sin an theih ter cang hna ti a si. 

A tlaihremtu kawl palik pahnih cu Pyo Paing le Pyo Ko Ko an si hna. 

Delhi Kala Nih Fa An Hrinter Mi Chin Nu Velh A Tong

A luancia 2011 ah Delhi Kala pa pakhat nih a tlaihrem i i fa a rak ngeitu Chin nu pakhat cu April 19 ah khan Delhi Kala pathum nih an velh i fak ngai in ai khong tiah Chinland Guardian sin in theih a si.

A nih hi kum 17 a si lio 2011 ah thitumnak puai tuahnak ah rian a rak tuan,hi a riantuannak ah Kala pa nih a rak tlaihhrem i December thla 2011 ah fa pakaht a rak ngei. Tuhi hnuk cancer a ngei rih fawn caah a fa zong mi dang nih an zoh piak ti a si.

Tutan an velh hna nak hi Korean House ah rian kawl ding an vah lio ah a si. Tutiang hi a tho kho rih lo, si a din cuahmah lio a si rih.

Hakha A Ra Mi US Ambassador Nih CPTC A Mawtchiat Hna

April 21 ah Hakha a rak phan mi US Ambassador Derek Mitchell cu Chin ram chung kahdaihnak kong a cawlcangtu Chin Peace and Tranquillity Committee(CPTC) he tonnak an ngei lio ah nu le pa i tlukruannak kong a chim i CPTC chungtel ah nu a hmu hna lo caah a mawtchiat hna.

Tonnak an ngei lio ah ‘Nu le pa thleidannak um hlah seh nan ti ka theih nain a tu a ra kho mi nu pakhat hmanh ka hmu hna lo’ tiin US Ambassador nih cun a mawtchiat hna. CPTC chungtel a si ve mi Rev. Paul Tum Ceu nih ‘Nu le pa thleidan nak cu kan ngei lo. Kan thangcho lo tuk i rian tuan ding kan ngei lo caah a si. Hihi a ruangbik cu a si’ tiin a leh ve.

Cun, Derek Mitchell nih ‘A kakip ah nu hi an ni tel ve a hau.Nu hi an tuah kho mi zong a tampi ve caah an ni tel ve ah cun nan tlamtling deuh lai. Nu le pa thleidannak a um lo nak hnga tuanvo nan lak cio a herh’ tiin forhfial nak zong a chim chap.

CPTC cu CNF-Cozah-Mipi kar daihnak rian a tuan tu a si i a tu hi chungtel 15 an ngei hna,hi hna lakah nu pakhat lawng ai tel.

Kokang Hriamtlai Phu Cu China Nih A Lungkil Te Ah A Tenh Peng Ko Rua

Asia le Africa ram hruaitu hna i tonnak cu nizaan ah khan Indonesia ram khualipi Jakarta ah an ngei,hi tonnak a dih hnu in President Thein Sein le China President Xi Jinping a dang tein tonnak an ngei than. Hi tonnak ah Xi Jinping nih Kokang hriamtlai phu MNDAA he kahdaihnak nan tuah awk a si tiin a forhfial tiah BBC Burmese nih a thanh.

Hihi China President ngai nih Kokang hriamtlai phu kong Thein Sein sin a chim hi Kokang hriamtlai phu a lungkil te te ah a tenh ko hna timi a lang ngai. Kokang mipi tam deuh hi Chinese Han miphun an si hna, Chinese holh an hmang hlei ah China chuak thil deuh a hmang mi an si ca zongah a dawt hna a si kho.

Thein Sein nih zeitindah a leh timi cu theih a si lo nain Thein Sein ai-awh biachimtu U Ye Htut nih NCCT member tling phu 16 he lawng kahdaihnak ser kan timh ko,a dang hriamtlai phu he i chonh ding kan timh lo tiah BBC ah a chim.

A tu Wa ram i an tuah ding mi phu 12 i tonnak zong hi a tu lio kawl ralkap he ai kah cuahmah mi Kokang hriamtlai phu le Arakan Army(AA) kong ceih timh dawh an si. A tu NCCT nih a kal pi mi rampumpi huap kahdaih minthutnak(NCA) zongah an mah phu hnih hi ai tel kho ding an si lo. NCCT nih an mah phu 2 kal tak in kahdaih minthutnak(NCA) tuah an timh mi hi China cozah le Wa, Mongla hriamtlai phu pawl nih an duh lo caah a dang tein conference tuah an timh zong a si kho mi a si.

China nih cun Kachin,Mongla,Wa le Kokang hi cu a lungkil te ah tanh peng te dawh an si ko rua!

Bungzung-Cangva-Lungtar-Surkhua Motor Lam A Pem Cang

Senthang peng khuami tampi nih nihlawh le phaisa tampi dih in kum tampi an rak cawh mi Bungzung-Surkhua kar motor lampi cu Thein Sein cozah a kai hnu in cozah nih an cawh piak hna i April 20 ah khan an pem dih cang tiah The Hakha Post nih a thanh.

Hi lam hi cozah phaisa in Naingmin Company nih Bungzung in menghra tiang a cawh piak hna, a tangmi hi Pu Maung Maung a company Shwe Hakha nih a cawh than i April 20 ah a lim beh hi a si.

Hi lam an pemh cang caah CARD nih Bungzung cu Chinram khuapi ah kan ser lai i Senthang, Zotung, Lautu, Mara le Zophei hna caah tlunkal a fawi cang lai caah thahnemnak tampi a chuah pi lai an ti.

US Ambassador Nih Hakha Khuachung A Luh Hlan Ah Vailamgtung A Zoh Hmasa

Myanmar ram caah US Ambassador Derek Mitchel cu April 21 ah Hakha a rak tlung, khuanu khua pa nih khua luh lai ah an don i khuachung a luh hlan ah Pu Hung Ngai nih phur a rak timh mi vailamtung a va zoh hmasa tiah The Hakha Post nih a thanh.

Hiti vailamtung zoh ding tlang a kai ah hin Hakha um pastor le Hakha khua upa tampi zong nih an zulh i hmantlak nak zong an ngei hna ti a si.

Hakha a cam lio ah CPTC,CNF,Pu Hung Ngai le media pawl he tonnak zong an ngei kho i a lung um bia zong a chim hna. CNF le CPC he tonnak an ngei lio ah tukum thimnak a biapit tluk in ramchung daihnak zong a biapit ve ning, hi daihnak ngah khawh ding caah US zong nih biatak tein a cawlcanghnak kong hna a chim hna.

Cun,thimnak tuah tikah media pawl an bia pit ning, zei party hmanh tanh deuh lo in rian an tuan a herh ning hna zong media he tonnak an ngei lio ah a chim.

Australia Melbourne Ah Muslim Centre An Khar Cang

Kan hnu zarh ah ralhrang he pehtlainak a ngeimi muslim mino 5 Melbourne ah an rak tlaih hna,hi mino 5 lak ah pa hnih nih an rak kal balnak muslim centre al-Furqan Islamic Centre cu media le politician pawl nih an tuahto ning hna a dik lo ngai an ti caah cu centre tuanvo ngeitu muslim upa nih an khar cang tiah BBC nih a thanh.

Hiti an centre kan khar hi ruah ciammam hnu ah kan khar mi a si an ti. Ralhrang he pehtlainak a ngei mi mino pa hnih hi hika centre ah a ra leng mang mi an si caah Australia media le politician pawl nih lunghrinnak le soisel a um len caah a si an ti.

Mah al-Furgan Islamic Centre hi Melbourne thlang lei nitlak lei(south-west) ah a um mi a si. Islam pawl cu khua an phaknak kip ah hi bantuk i tonnnak le thlacamti nak centre hi an ngei hna.

Lungrawk A Si Ko:Hriamtlai Phu Conference Ah CNF Sawm An Timh Hna Lo

May thla 1-3 ah Wa hriamtlai phu UWSA hmun ah tuah an timh mi hriamtlai phu conference ah tuan deuh kan rak theih bang in hriamtlai phu 12 lawng an sawm ko hna lai, a dang hriamtlai phu sawm rih ding timhtuahnak kan ngei ti lo tiah hi tonnak a tuahtu UWSA nih an fehter cang tiah Eleven Media nih a thanh.

Mah conference hi China ramri um hriamtlai phu Wa, Mongla le Kachin nih tuanvo an lak mi a si. An sawm mi hriamtlai phu 12 hna hi China le Thailand ramri ah a um mi lawng te an si(AA dah ti lo cun). India ramri um pakhat hmanh an sawm hna lo tiah S.H.A.N editorial nih a tial.

An sawm lo mi hriamtlai phu ah CNF telh in min lang deuh Democratic Karen Benevolent Army(DKBA), Arakan Libertion Army(ALP) le Lahu Democratic Union(LDU) hna hi an si.

Tulio kawl ralkap he ai kah cuahmah mi Arakan Army(AA) le Kokang hriamtlai phu MNDAA cu cozah lei nih ‘sawm hlah uh’ a rak ti len hna nain an sawm chih ko hna. AA nak in ALP hi an hriamnam zong a tha deuh hlei ah ralkap thazang zong tam deuh an ngei hna. Zeiruangah dah ALP kal tak in AA lawng an sawm hna hnga ti awk in a um.

Hi conference an kal pi ning zoh tikah NCCT nih an kal pi mi NCA draft min an thut mi kha hi hriamtlai phu hna nih an pom piak hna rua lo timi lunghrin awk ngai a si. NCA draft ah Kokang hriamtlai phu MNDAA le AA an ni tel lo caah an lung tlin lo zong a si kho ko rua. (NCCT zong nih AA le MNDAA an kal tak ding a si ve lo nain).

Media kip nih hi kong an chim tikah CNF min hmaisa ah an chiah leng mang. Phudang nak in a biapi deuh ah an kan chiah piak ko in a lang. Nain, hi phu 12 ah an ni tel lo,sawm ding zong an timh hna lo cu lung rawk ngai a si!

SNLD Nih Dr. Aye Maung An Nahchuah Mi A Lo Ngai

2008 Constitution remhnak kong he pehtlaih in Myanmar ram hruaitu lutlai 6 i tonnak ah tlangcungmi aiawh in Dr. Aye Maung ai tel ve. Tonnak an ngei lio an ceihmi vialte cu tlangcungmi aiawhtu party vialte sinah ka theih ter cang hna tiin Irrawaddy sin ah a chim.

Nain, Khun Htun Oo hruaimi Shan Nationalities League for Democracy(SNLD) nih kan mah a kan theihter ve lo,kan mah he pehtlainak kan ngei lo tiah tuni ah khan cathluan statement an chuah. An cathluan chuahmi ah SNLD nih mah hruaitu 6 i tonnak in ruahchannak kan ngei tuk lem lo, ruahchannak pakhat hmanh kan ngei lo cu a si ve lo an ti tiah BBC Burmese nih a thanh.

SNLD hi thimnak ai cuh lomi an si, parliament ah MP pakhat hmanh an ngei lo. Hiti thimnak ai cuh lomi party Dr. Aye Maung nih va kal hnawh lengmang ding cu a har ngai mi a si ve,ka ti.

SNLD cu 1990 election ah Shan ram chung tei nak a rak hmu tu a si. Ram pumpi huap in NLD changtu a rak si. A tu party hruaitu Khun Htun Oo hi cozah a doh ngai tu a si i kum sau ngai thawng an thlak mi a si.

Ruahning Lengin Facebook A Rum Chin,A Hmangtu 1.44 Billion An Phan Cang

Tukum January-March thlathum chungah Facebook nih phaisa $512 million a ngah hlei ah facebook hmangtu 1.44 tiang an karh cang, nikum nak in 13% bak in an tam deuh cang.Hihi an ruah ning leng in a thangcho tiah BBC nih a thanh.

Facebook hmangtu lakah mobile phone in a hmangmi an tam bik, an karh ning zong a rang khun ti a si. Facebook nih a ngah mi phaisa dihlak 75% hi mobile phone hmangtu sin in a ngah mi a si.

Facebook a thancho deuhnak dingah tukum chung phaisa a hman ding bel cu a tam ngai than, $566 million bak hman a timh,nikum kha $181 million lawng a rak hman.

Ralkap Party USDP nih Hmunhma Dihlak In Aa Cuh Lai

Tukum donghlai ah tuah ding mi Myanmar ram chung general election ah ralkap party a si mi USDP cu Myanmar ram chung hmunhma dihlak ah i cuh ding in USDP nawlngeitu hna nih timhtuahnak an ngei cuahmah cang tiah RFA nih a thanh.

Myanmar ram chungah MP hmunhma 1,112 a um, Pyituh Hluttaw ah 314 le Amyotha Hluttaw ah 159 an si i State le Region hluttaw ah 639 an um hna. USDP cu hi 1,112 hmunhma vialte ah aa cuh lai ti nak a si.

Thimnak aa cuhding candidate hna cu a ralaimi June thla chungah fehter in mipi sin langhter an timh. USDP hi a tu Hluttaw ah thutnak 882 a ngah tu an si. Hluttaw ah thutnak 25% hi ralkap nih an lak cia.

IS Ralhrang He Pehtlainak A Ngeitu Pakhat 'I Cei Seh' Ti Awk In A Um

IS le al-Qaeda ralhrang he pehtlainak a ngeitu pakhat nih France ram Paris ah a um mi khrifa biakinn hrawh a timh lio ah a mah tein ai kah sual i ambulance a auh hna hnu ah palik nih a sining an kherhlai i IS le al-Qaeda he pehtlainak a ngei mi a rak si diam tiah BBC nih a thanh.


Palik nih a mawtaw an check piak i a mawtaw chungah meithal, meithal kuan a khamh kho tu angki le a dang hriamnam pawl an hmuh chih ti a si. A um nak inn an check than i al-Qaeda le IS ralhrang he pehtlainak an tuahmi document pawl zong an lak khawh hna. 

Syria um IS ralhrang ai-awhtu nih Mr Ghlam cu khrifa biak in hrawh ding ah ruahnak an rak peknak document pawl zong palik nih an hmuh. 

Mr Ghlam cu Africa continent um Algeria ram mi a si. IS sin kal ding ah Syria lei kal ai timh tiin palik nih rak theih bal cang mi a si. 

Kim Kardashian Bantuk Body Tha Lainu Kan Ngei Ve Ko

A cung hmanthlak hi US le Australia um tam deuh nih cun nan hmu bal rih lai lo dah! Nain, EU um Lai tlangval nih Dawt Chin Par a thei lomi cu kan um tuk lai ka zum lo. A nih hi a mui ai dawh cu um rih ko seh, a body hrim hi Lainu ah cun a tha bik lai, ka ti. Hakha Sui Nan Kyi a tawk tha an rak ti tawn nain Dawt Chin Par tluk cun a tha lai lo dah.

‘Tawk tha’ timi a thei tuk rih lomi nih cun a nih a body hi zoh uhlaw nan ni fiang ko lai. Hitluk a tawk that khawh hi zeitindah a tuah hnga ti awk in a um, tawkthat si maw a ei hnga!hehe.

Dawt Chin Par hi ai dannak pakhat te a um. Facebook ah a thei lomi nih ‘friend request’ an pek ah a cohlang bak hna lo. Cun,adang Lainu bantuk in ‘facebook friends’ thawng tampi a ngei mi a si lo. Mitam pi cu ‘accept’ rih lo in ‘followers’ list ah a tap rih mi zong an tam ngai(nai tel ve sual ah cun ka ngaithiam,hehe).

Tuhi Nursing a kai cuahmah,Denmark Laimi nih nurse nu dawh te an ngei te lai ti nak a si. A nih hi Zophei tlang Lawngtlang khuami Pu Hram Tum Lian le Pi Ni Hlei Par an fanu a si.2006 ah an chungkhar in Denmark an phan. Kum 20 nungak no te a si.

Hika ah a facebook len khawh a si lai. Dawt Chin Par

Note:’Tawk tha’ hi micheu nih a chiatnak(negative) in nan ruah kho men. Nain, ‘tawk tha’ timi cu i dawh nak pakhat a si ve tiin kei ka pom ning a si.

Rezua Ah Nufarual Velh An Tong,Pakhat A Thi I Pakhat Sizung A Phan

Rezua khuami Pu Kaw Ling kum 40 hrawng nih April 22 zing suimilaam 5:00 ah Pi Sung Nah te nufa a velh hna i, a fanu hniang kum 4 a thi, a u deuh kum 7 hrawng cu Hakha sii-inn ah an kalpi tiah The Hakha Post nih a thanh.


“A fanu hniang deuh hi cu a hmun ah a thi colh. A u nu zong hi Hakha an phanh hlan zong ah a thi khomi a si. A nu le a pi zong a velh hna i annih zong hi fak ngai in a velh ve hna,” tiah Rezua in Zotung Chiatthat Buu ah Co-ordinator le pastor pakhat zong a simi Saya Thang Bawi Lian nih Hakha Post ah a chim. Pu Kaw Ling hi a lung a tlamtlinglomi a si i 2010 hrawng ah an khualtlung pakhat zong a rak thah bal i thong ah sau nawn a tlami a si. A tha cang ti in a chuah hnu ah atu mahti hin mi a thah thanmi a si. 

“A thimi ngakchia ruak hi Rezua palek nih Matupi sii-inn ah nan kalpi lai i nan zohter lai tiah khuami an ti hna. A ruang cu Rezua sii-inn ah siibawi a tlawmbik pahnih um ding asinain cozah nih a chiah lo caah a si. Matupi sii-inn he an kemhter hna. Asinain khuami nih Matupi ah kan kalpi kho lai lo, tiah an duh lo. Peng (then) pakhat a si vemi sii-inn ah siibawi pakhat hmanh Chin Cozah nih a chiah khawh lomi cu mahbantuk thil ton tikah khuami caah a hlei in harnak kan tong,” tiah Saya Thang Bawi Lian nih a chim chap. 

Pu Kaw Ling hi Rezua palek nih an tlaih i a phung ning in a kong ceih ding a si. Hakha sii-inn i an ratpimi ngakchia nu zong hi lampi ah lam cawhnak seh nganmi nih lam an cawh lio hngah pah lengmang ding a si caah tuan ah Hakha an phanh pi khawh lo ahcun a nunnak caah thinphang a sinak kong a cunglei upa sin in theih a si. The Hakha Post. 

New Zealand Prime Minister John Key A Mual Pho

New Zealand ram Auckland khuapi um coffee dawr pakhat ah cabuai hngak mi nu pakhat cu a duh lo buin New Zealand Prime Minister John Key nih a sam a tongh piak leng  mang tiah The Daily Blog ah an tial hnu in mi tam ngai nih an soisel, John Key zong nih ngaihthiam a hal than tiah BBC nih a thanh.


Hiti John Key nih waitress nu a sam a tongh piak hi nikum November thla thawk in a si cang. Dawr ah a rat fa tin te hi hrial aa timh peng hlei ah a body guard pawl zong hiti a sam a tongh piak mi a duhlonak zong a chim cang hna.John Key sin zongah a duh lo nak a chim beh nain a tongh piak thiam thiam ko. A hnu ah John Key nih wine dur hnih he ngaihthiam a hal ti a si.

Hi kong hi New Zealand mipi facebook le twitter a hmangmi lakah ceih ngai a si i a cheu nih 'a rian chiah seh' a ti mi zong an um.  

Vawleicung Media A Zalong Lo Bik Ram Top 10 Ah Myanmar Ai Tel Rih

CPJ timi vawleicung media zalon nak kong a zohfeltu nih vawleicung media a zalong lo bik ram 10 an thim hna i Myanmar hi China changtu 9nak ah a um, Eritrea le North Korea hi media zalon lo bik ram an si hna. 


Myanmar ram hi Thein Sein cozah a kai hnu in media zalonnak tampi cu a tuah ve ko nain a cung lei nawlngei tu nih fekthup in an tlaih rih ko,zalonnak dik tak tak a um kho rih lo tiah CPJ nih an langhter. 

2013 hnu in Myanmar ram chung journalist 20 thawng an thlak cang hna, tuhi minung 12 leng thawnginn ah an um rih ko ti a si. Nikum zong kha journalist Ko Par Kyi cu kawl ral kap nih an rak thah i ram lak ah an rak phum. Hi kong zong CPJ nih an langhter chih ve. Irrawaddy

Hmanthlak Pakhat Ruangah Suu Kyi Soisel A Tong

Nizan kha U Win Tin a thih kum khat tlinnak NLD nih an tuah i cuka hmun ah NLD hruaitu Suu Kyi nih biaknak lei upa vialte upat a pek hna nak hmanthlak cu ‘The Voice Weekly’ nih an facebook page ah an phawtzamh hnu in muslim a rem lomi kawl mipi nih fak ngai in an soisel.


Hika hmanthlak ah hin Suu Kyi hmai ah muslim pa pakhat a dir, Suu Kyi nih mah muslim pa thengte upat a pek mi a lo ngai. Hihi mah muslim pa lawng upat a pek si loin hika a um mi biaknak lei hruaitu vialte(Buddhist phungki telh in) upat a pek hna nak a si.

Hiti soisel nak a tam tuk ruangah The Voice Weekly nih hi hmanthlak cu an lak than colh i ngaihthiam hal nak zong an tuah than.

Suu Kyi hi bantuk soiselnak a ton hi a tu voikhat lawng si lo, nikum lei zong kha Photoshop in muslim thilthuam an hruk ter U Ye Htut nupi zong nih a rak share bal ve. Irrawaddy

Chinese Myitsone Project A Rak Khamhtu Nih Golden Environmental Prize A Hmuh

Myint Zaw

Chinese company le ralkap cozah hnatlaknak in Irrawaddy tiva ah Myitsone Dam timi mei laknak tuah an rak timh mi hnon dingah a rak cawlcang tu Myint Zaw cu vawleipi nih an tihzah mi Golden Envoromental Prize timi laksawng a hmuh, phaisa in $175,000 a ngah lai.


Myitonse Project hi kawl cozah le China caah cun a thahnem ngai ding a si ko nain a pawngkam um Kachin mipi le Irrawaddy tiva kam ah a ummi caah cun chiatnak tampi a chuah pi ding a si. Pawngkam zong tampi a hrawh lai hlei ah Irrawaddy tiva zong a hnawm ter lai caah Irrawaddy tiva in a paw ai cawmmi caah cun sunghnak ngan tuk a si. 

Mah project nih zeitluk in dah mipi caah chiatnak a chuahpi lai timi a aupi tu lakah Myint Zaw hi thazang a chuah biktu a si. Hiti an rak au pi i Myanmar ram pumpi ah duhlo nak an rak langhter hnu ah Pu Thein Sein nih a mah President a tuan kum nga chung hi project cu ngol rih ding in nawl a rak chuah i tuhi an ngol chung.

A tu an pek mi laksawng hi Asia continent in cun a mah lawng nih a ngah. A nih hi Australia National University College of Asia and the Pacific’s Crawford School of Public Policy timi ah 'Resource Management' subject in PhD a kai cuahmah lio a si. IRRAWADDy

US Pa Nih A Computer Meithal In A Kah Ruangah Thawngthlak A Tong

US ram Colorado Springs khuami Mr Lucas Hinch cu a computer a riantuanning a dik lo caah a si vang, a ai puang caah a leng a chuah pi i meithal in voi 8 tiang a kah caah caan tawi te palik nih thawng an thlak tiah BBC nih a thanh.

Hiti meithal voi 8 tiang khuachung ah a puah hi US upadi nih a onh mi a si lo. A mah nih cun phung a buar hi aa thei lo ti a si,an tlaih hnu lawngah a thei.

Biaceihtu nih zei bantuk dantatnak pek ding dah a si lai timi bia a chah piak te lai.

***Kan facebook page 'like' kan pek piak cio ve uh. Chinland News